Batys Qazaqstan oblysyndaǵy Báıterek aýdanyna qarasty Dostyq aýlynyń turǵyndary balalaryn syrtqa jiberýge qorqyp otyr, dep habarlady “Astana” arnasy.
Ata-analardyń aıtýynsha, 6 jáne 9-synyp oqýshylaryn eresekter soqqyǵa jyǵýdy ádetke aınaldyrǵan. Bul qylyǵyn aýyl tentekteri "tárbıe jumysy" dep túsindiripti.
Eresek balalar kishilerden udaıy amandasyp, sypaıy bolýdy talap etken. Al buǵan kónbegenderdi soqqyǵa jyǵyp, qalǵandaryn qorqytyp-úrkitýge kirisken. Amaly taýsylǵan ata-analar polıııaǵa da shaǵymdanyp, aryz jazypty.
"Balalardyń denesinde kógergen jer paıda bolmaý úshin, búıreginen, jumsaq jerinen urady. Tipti betinen urǵanda ózine yńǵaıly bolýy úshin oqýshylardy júrelep otyrǵyzyp qoıǵan. Ulyma belgisiz bireýler telefon shalyp, úıden jıi ketip qalady. Kim shaqyryp jatqanyn da aıtpaıdy. Urǵandardyń ishinde joǵary synyp oqýshylary, mektep túlekteri, tipti stýdentter de bar", - deıdi jábirlengen oqýshynyń anasy Natalıa Korkına.
Mektep dırektory mundaı jaǵdaıdyń baryn joqqa shyǵardy. Ata-analar ásirelep otyr deıdi. Bul oqıǵadan quqyq qorǵaýshylar da habardar. Jaýaptylar bilim ordasyndaǵy jaǵdaı baqylaýda dep sendirdi.
"Balalar sózge kelip qalǵan. Bir-birin shapalaqpen urǵan. Biz bul máseleni kóterip, balalarmen de, ata-analarmen de sóılestik. Balalar bir-birinen keshirim surap, ózderiniń qatelikterin moıyndady, - deıdi "Dostyq" orta mektebiniń dırektory Svetlana Golýbeva.
