بۇگىن شىمكەنت قالاسىنىڭ اكىمى مۇرات ايتەنوۆ مەملەكەت باسشىسى مىندەتتەگەن تاپسىرمالاردىڭ قاراتاۋ اۋدانىندا جۇزەگە اسىرىلۋىن باقىلاۋ ءۇشىن اۋدانداعى ينجەنەرلىك ينفراقۇرىلىم جۇمىستارىمەن تانىستى.
اۋدان اۋماعىندا ورنالاسقان 24 ەلدى مەكەندە 247 مىڭنان استام حالىق تۇراتىنىن ايتقان اۋدان اكىمى ا.الىقۇلوۆ بۇگىندە 18 ەلدى مەكەن ساپالى اۋىز سۋمەن قامتىلعانىن، ەكى ەلدىمەكەن كەستەمەن، قالعان تورتەۋى تاسىمالدى سۋ پايدالاناتىنىن جەتكىزدى.
حالىق تۇتىناتىن سۋدىڭ ساپاسىن ارتتىرۋ ماقساتىندا بيىل قاراتاۋ اۋدانى بويىنشا 3 ماگيسترالدى سۋاققىنىڭ قۇرىلىسى جانە 3 شاعىن اۋداندا اۋىز سۋ جۇيەسى تارتىلىپ جاتىر.
قاراتاۋ اۋدانىندا اۋىز سۋ ينفراقۇرىلىمى بويىنشا اتقارالىپ جاتقان جۇمىستار جايىن شىمكەنت قالاسىنىڭ ەنەرگەتيكا جانە ينفراقۇرىلىمدى دامىتۋ باسقارماسىنىڭ باسشىسى ب.بولاتبەكوۆ باياندادى.
ونىڭ ايتۋىنشا، 3 ماگيسترالدى سۋاققىنىڭ قۇرىلىسى كەستەگە ساي جۇرگىزىلۋدە ەكەن. سونىمەن بىرگە جالپى ۇزىندىعى 59,8 شاقىرىمدى قۇرايتىن تۇران شاعىن اۋدانىنداعى اۋىز سۋ قۇبىرىنىڭ قۇرىلىسى 100 پايىز اياقتالىپ، بۇگىندە قۇبىرلاردى جۋىپ-شايۋ جۇمىستارى اتقارىلۋدا.
ال، اسار-2 شاعىن اۋدانىن اۋىز سۋمەن قامتاماسىز ەتۋ بويىنشا 156,1 شاقىرىمدى قۇرايتىن ىشكى ورامدىق جۇيەلەرىنىڭ قۇرىلىس جۇمىستارى جۇرگىزىلۋدە. جىل سوڭىنا دەيىن پايدالانۋعا بەرىلەتىن بولادى. نۇرتاس شاعىن اۋدانىنداعى ۇزىندىعى 40,8 شاقىرىمدى قۇرايتىن اۋىز سۋ قۇبىرىنىڭ بۇگىندە 18,36 شاقىرىمى ورناتىلعان.
اتالعان جۇمىستار اياقتالۋىنا وراي، اۋداندا 7 مىڭعا جۋىق تۇرعىن ساپالى اۋىز سۋمەن قامتىلىپ، كورسەتكىش 83,5 پايىزدى قۇرايتىن بولادى.
ايتا كەتەيىك، اۋدان اۋماعىندا اۋىز سۋمەن قامتۋدى قاجەت ەتەتىن 6 ەلدى مەكەن بار. ولار اسار-2 ش/ا (2 كەزەك), بوزارىق س/ج، قايناربۇلاق ت/ا، يسفيدجاب ت/ا، سايرام ت/ا، قىزىلسۋ تۇرعىن الاپتارىنىڭ جاڭا قۇرىلىس اۋماقتارى. اتالعان ەلدى مەكەندەر «شىمكەنت قالاسىن دامىتۋدىڭ 2020-2023 جىلدارعا ارنالعان ءىس-شارا جوسپارىنا» ەنگىزىلگەن.
