بۇگىن ەكس-مينيستر ەلجان ءبىرتانوۆتىڭ تۋعان كۇنى. ۇيقاماقتا وتىرعان ءبىرتانوۆ بۇگىن ەلۋدى ەڭسەردى، دەپ حابارلايدى "ادىرنا" ۇلتتىق پورتالى.
وسىدان تۋرا ءبىر جىل بۇرىن مەملەكەت قازىناسىنان 526 ميلليون تەڭگەنى جىمقىردى دەگەن كۇدىككە ىلىنگەن ەكس-مينيستر قازىرگى تاڭدا ۇيقاماقتا وتىر.
ەستەرىڭىزدە بولسا، ەلجان ءبىرتانوۆ - پرەزيدەنت جارلىعىمەن 2020 جىلدىڭ ماۋسىمنىڭ 25-دە قىزمەتىنەن قۋىلعان ەدى.
دوسىم ساتپاەۆ، ساياساتتانۋشى:
نەگىزى دەنساۋلىق سالاسىندا ءبىرىنشى رەت كوررۋپتسيالىق جانجال تۋىنداپ وتىرعان جوق. جەمقورلىقتىڭ تامىرى تەرەڭدە جاتىر. مەنىمشە بۇل جەردە ول، "قۇرباندىققا كەتكەن جان".
ياعني پارا الىپ "دوكەيلەر دە" ۇستالىپ جاتىر دەگەننىڭ كورىنىسى. قالاي بولعانىمەن جان-جاقتى دۇرىس تەرگەۋ قاجەت. تاعى ءبىر ايتا كەتەرلىگى كورونوۆيرۋسپەن كۇرەستە ءبىر عانا - دەنساۋلىق ساقتاۋ مينيسترلىگى عانا ەمەس كوپتەگەن مەكەمەلەر مەن جەرگىلىكتى بيلىك ءوزىنىڭ قاۋھارسىزدىعىن كورسەتتى،- دەگەن ەدى.
تەك قانا ساياساتتانۋشىلار عانا ەمەس، قاراپايىم حالىق تا ءبىرتانوۆتىڭ جازىقسىز ەكەنىنە سەنىممەن قارايدى. "كوپتىڭ كۇناسىن ارقالادى" دەگەن دە پىكىرلەردى ەستىپ ءجۇرمىز.
جۋرناليست گۇلميرا ابىكاي ءبىرتانوۆتى 50 جاسىمەن قۇتتىقتاپ، اسەرلى جازبا قالدىردى. ايتۋىنشا، ارباعا تاڭىلعان توميريس اتتى ءپىل اياق قىزدىڭ ەمىنە كومەك سۇراپ جازعان حاتىن جاۋاپسىز قالدىرماعان.
“ەكس-مينيستر ەلجان بىرتانوۆقا ءبىر تىلەكشى بار بولسا، ول توميريس ەكەۋمىز. ەڭ العاشقى باعدارلامادا سوزاقتىق ءتوميريستىڭ جاعدايىن كورسەتتىك. ءپىل اياق قىزعا وتا جاسالۋى كەرەك ەدى. ونىڭ تاعدىرىن بايانداپ، ەلجان بىرتانوۆقا حات جازدىم. ول كىسى “كومەك كورسەتەمىز، قاجەت بولسا شەتەلگە ەمدەتەمىز” دەپ جاۋاپ بەردى. سودان شەتەلگە شىقپاي-اق استانادا ەم جاساتتىق. 8 وتانىڭ 4-ءۋى جاسالدى. ءتوميريستىڭ تومارداي اياعى كىشىرەيىپ، اياققا تۇردى. اقىرىنداپ جۇرە باستادى. ءبىرىنشى رەت باتىڭكە كيدى. كورشىلەرى قۇتتى بولسىن ايتىپ، باتىڭكەسىنە كورىمدىك بەرىپ جاتىر. شاعىن اۋىل ءۇشىن بۇل ۇلكەن قۋانىش”، – دەپ جازدى جۋرناليست.
سونداي-اق ءبىرتانوۆتان كەيىن وتىرعان جاڭا مينيسترلەرگە سىن تاقتى. ولار كومەككە مۇقتاج كەيىپكەرلەرگە كومەكتەسپەك تۇگىل، حاتقا جاۋاپ جازباعانىن دا اشىپ ايتتى.
“بۇگىن ەلجان اعامىز ەردىڭ جاسى 50-گە تولدى. ءوز باسىم ءجۇزى جىلىدان تۇڭىلمەيمىن، اقتالىپ شىعۋىنا تىلەكتەسپىن. بىرتانوۆ قالاي قاماۋعا الىندى، ودان كەيىنگى مينيستر قينالعان كەيىپكەرلەرگە كومەكتەسپەك تۇگىل، بەلگىلەگەن ءبىر پوستقا جاۋاپ بەرگەن ەمەس!”، – دەدى ابىقاي.
"ادىرنا" ۇلتتىق پورتالى
