Búgin eks-mınıstr Eljan Birtanovtyń týǵan kúni. Úıqamaqta otyrǵan Birtanov búgin elýdi eńserdi, dep habarlaıdy "Adyrna" ulttyq portaly.
Osydan týra bir jyl buryn memleket qazynasynan 526 mıllıon teńgeni jymqyrdy degen kúdikke ilingen eks-mınıstr qazirgi tańda úıqamaqta otyr.
Esterińizde bolsa, Eljan Birtanov - Prezıdent jarlyǵymen 2020 jyldyń maýsymnyń 25-de qyzmetinen qýylǵan edi.
Dosym SÁTPAEV, SAIaSATTANÝShY:
Negizi densaýlyq salasynda birinshi ret korrýpııalyq janjal týyndap otyrǵan joq. Jemqorlyqtyń tamyry tereńde jatyr. Menimshe bul jerde ol, "qurbandyqqa ketken jan".
Iaǵnı para alyp "dókeıler de" ustalyp jatyr degenniń kórinisi. Qalaı bolǵanymen jan-jaqty durys tergeý qajet. Taǵy bir aıta keterligi koronovırýspen kúreste bir ǵana - Densaýlyq saqtaý mınıstrligi ǵana emes kóptegen mekemeler men jergilikti bılik óziniń qaýharsyzdyǵyn kórsetti,- degen edi.
Tek qana saıasattanýshylar ǵana emes, qarapaıym halyq ta Birtanovtyń jazyqsyz ekenine senimmen qaraıdy. "Kóptiń kúnásin arqalady" degen de pikirlerdi estip júrmiz.
Jýrnalıst Gúlmıra Ábikaı Birtanovty 50 jasymen quttyqtap, áserli jazba qaldyrdy. Aıtýynsha, arbaǵa tańylǵan Tomırıs atty pil aıaq qyzdyń emine kómek surap jazǵan hatyn jaýapsyz qaldyrmaǵan.
“Eks-mınıstr Eljan Birtanovqa bir tilekshi bar bolsa, ol Tomırıs ekeýmiz. Eń alǵashqy baǵdarlamada sozaqtyq Tomırıstiń jaǵdaıyn kórsettik. Pil aıaq qyzǵa ota jasalýy kerek edi. Onyń taǵdyryn baıandap, Eljan BIrtanovqa hat jazdym. Ol kisi “kómek kórsetemiz, qajet bolsa shetelge emdetemiz” dep jaýap berdi. Sodan shetelge shyqpaı-aq astanada em jasattyq. 8 otanyń 4-ýi jasaldy. Tomırıstiń tomardaı aıaǵy kishireıip, aıaqqa turdy. Aqyryndap júre bastady. Birinshi ret bátińke kıdi. Kórshileri qutty bolsyn aıtyp, bátińkesine kórimdik berip jatyr. Shaǵyn aýyl úshin bul úlken qýanysh”, – dep jazdy jýrnalıst.
Sondaı-aq Birtanovtan keıin otyrǵan jańa mınıstrlerge syn taqty. Olar kómekke muqtaj keıipkerlerge kómektespek túgil, hatqa jaýap jazbaǵanyn da ashyp aıtty.
“Búgin Eljan aǵamyz erdiń jasy 50-ge toldy. Óz basym júzi jylydan túńilmeımin, aqtalyp shyǵýyna tilektespin. Birtanov qalaı qamaýǵa alyndy, odan keıingi mınıstr qınalǵan keıipkerlerge kómektespek túgil, belgilegen bir postqa jaýap bergen emes!”, – dedi Ábiqaı.
"Adyrna" ulttyq portaly
