قازاقستاننىڭ ەڭبەك ەرى، كسرو جانە قازاقستاننىڭ حالىق ءارتيسى، مەملەكەتتىك سىيلىقتاردىڭ لاۋرەاتى، كورنەكتى تەاتر جانە كينو اكتەرى، پروفەسسور ءاسانالى ءاشىموۆ جۋىردا بىشكەك قالاسىندا وتكەن قازاقستاننىڭ مادەنيەت پەن ونەر كۇندەرى اياسىندا الەمدىك كينەماتوگرافيانىڭ دامۋىنا قوسقان زور ۇلەسى ءۇشىن قىرعىز رەسپۋبليكاسىنىڭ "اق ءىلبىرىس" (بەلىي يلبيريس) ۇلتتىق كينو سىيلىعىنا يە بولدى. سونىمەن بىرگە شىڭعىس ايتماتوۆ اتىنداعى حالىقارالىق سىيلىقتىڭ يەگەرى اتاندى.
بۇل تۋرالى فەيسبۋك پاراقشاسىندا رەجيسسەر اسحات ماەميروۆ جازدى.
"سوناۋ الپىسىنشى جىلداردىڭ باسىندا قازاق تەاتر جانە كينو كەڭىستىگىنە "جانارتاۋ" بولىپ كەلگەن ءاسانالى ءاشىموۆ – ۇلت ونەرىندەگى شىن ماعىناسىنداعى "قۇبىلىسقا" اينالدى.
اكتەرلىك ونەردىڭ كوركەمدىك دەڭگەيىنىڭ بيىكتەۋىنە ايرىقشا ەڭبەك سىڭىرگەن ساحناگەر، قازاق تەاترى مەن كينو ونەرىندە فيلوسوفيالىق تانىم مەن تاعىلىم قالىپتاستىردى.
ءاسانالى ءاشىموۆ – ۇلتتىق ساحنا مەن كينو ونەرىنىڭ كوكجيەگىن كەڭەيتىپ الەمدىك ارەناعا شىعارۋعا ات سالىسقان ەرەكشە دارىن يەسى. سوندىقتان ءاسانالى اعا جاساعان وبرازدار گالەرياسى - ۇلت قۇندىلىعى. باتىس پەن شىعىس كلاسسيكتەرىنىڭ دراماتۋرگياسىن جاتسىنباي، كاسىبي بيىك تۇرعىدا مەڭگەرە ءبىلدى.
ال قازاق كلاسسيكاسىنىڭ زاڭعار شىڭدارى – م.اۋەزوۆ، ع.مۇسىرەپوۆ، س.مۇقانوۆ، ءا.نۇرپەيىسوۆ، ش.ايتماتوۆتاردىڭ دراماتۋرگياسىنداعى كەيىپكەرلەر بويىنداعى ۇلت مۇراتى مەن مۇددەسiن ءوزىنىڭ ومىرشەڭ بولمىس-بىتىمىمەن ورنەكتەدى. ال كينو ونەرىندەگى ءاسانالى ءاشىموۆ جاساعان «بەكەجان» وبرازى – قازاق رۋحىنىڭ حرەستوماتياسى. اڭعال باتىردىڭ بولمىسىن حالىق جۇرەگىنە شىنايى جەتكىزە بىلگەن، اكتەر دانالىعىنىڭ، دارالىعىنىڭ سىرى دا - وسىندا! سودان با ەكەن، قازاق ونەرى مەن ءاشىموۆ – ەگىز ۇعىم.
ءاسانالى ءاشىموۆتىڭ سۋرەتكەرلىك بولمىسىنىڭ ەكىنشى ءبىر بيىك قىرى – رەجيسسەرلىگى. ءيا، رەجيسسەر رەتىندە كينو تىلىمەن شوقاننىڭ اسقاق ارمانىن، ۇركەر ءۇمىتىن، قۇيرىقتى جۇلدىزداي جارق ەتكەن اكتەر، ءارى تۇلپاردىڭ تۇياعى ساعي ءاشىموۆتىڭ بەينەسى ارقىلى جەتكىزسە، "قوزى كورپەش – بايان سۇلۋ" - "قازاقفيلمنىڭ" التىن قورىنا اينالدى. ال قازاق ساحنالارىندا تەاتر رەجيسسەرى رەتىندە كلاسسيكالىق دۇنيەلەردى وزىندىك قولتاڭباسىمەن سويلەتە ءبىلدى. ەلىمىزدەگى تەاتر پەداگوگيكاسىندا، ءاسانالى اعامىزدىڭ ۇستاز رەتىندە قايتالانباس ءوز ءۇنى، ماشىعى مەن مانەرى، ايشىعى مەن ورنەگى بار. ءاسانالى ءاشىموۆ شىعارماشىلىعى – "ۇلت" ۇعىمىنىڭ تەرەڭىنە بويلاتادى. تەاتر مەن كينودا سومداعان ءاسانالى اعامىزدىڭ بەينەلەرى – ءوز كورەرمەنىنە قانات ءبىتىرىپ، "جانام" دەگەن جۇرەكتەرگە وت بەرەدى. بويىڭداعى "ۇلتتىق رۋحتى" بيىكتەتەدى. بەكەجان، قاسىمحان، اتامان شادياروۆتار بەينەسى - نامىسىڭدى مازداتىپ، ادىلدىك پەن شىندىقتىڭ تۋىن جەلبىرەتەدى.
اساعاڭ – قازاق ونەرىنىڭ اسقاق شىڭدى الاتاۋى. ءاسانالى ءاشىموۆ شىڭى - ەشقاشان الاسارمايدى!",-دەپ جازدى ول.
"ادىرنا" ۇلتتىق پورتالى.
