قازاقتىڭ ۇلتتىق ناقىشتاعى كيىمدەرىنە تەك ناۋرىز مەرەكەسى مەن سالتاناتتى جيىنداردىڭ ەمەس، كۇندەلىكتى قولدانىستاعى كيىمگە اينالۋ كەرەك. قر تاۋەلسىزدىگىنىڭ 30 جىلدىعىنا وراي وتكىزىلگەن «ۇزدىك پەداگوگ-2021» بايقاۋىنىڭ قالالىق كەزەڭىنىڭ جەڭىمپازى، شىمكەنتتەگى ءابىلحان قاستەەۆ اتىنداعى ونەر جانە ديزاين كوللەدجىنىڭ ارنايى پاندەر مۇعالىمى گاۋھار قويلانوۆا وسىلاي دەيدى.
ون ساۋساعىنان ونەر تامعان شەبەر ديزاينەر مەن تىگىنشىلەردى تاربيەلەپ، قازاقتىڭ ۇلتتىق ويۋ-ورنەگىن جاستاردىڭ ساناسىنا سىڭىرگەن گاۋھار جاراسقىزى وسى سالادا 20 جىلدان بەرى ەڭبەك ەتىپ كەلەدى.
–ەڭ ادەمى كيىم – ۇلتتىق كيىم. قازاقتىڭ ۇلتتىق كيىمى تەك بۇرمەلى ۇزىن كويلەك پەن قىزىلدى-جاسىلدى قامزولمەن شەكتەلمەيدى. باعزى زاماننىڭ كىمدەرىن زەرتتەگەندە ولاردىڭ ەرەكشە ديزاينى مەن گرافيكاسى ادامدى ەرىكسىز تاڭداندىرادى. ءوزىمنىڭ ەڭبەك جولىمدا كونە ۇلگىلەردى قازىرگى ۋاقىتقا ۇشتاستىرىپ، زاماناۋي ۇلگىدە قولدانىسقا ەنۋگە ارناپ كەلەمىن، - دەيدى ۇستاز.
قويلانوۆانىڭ شاكىرتتەرى تالاي دودادا توپ جارىپ، باس بايگەنى ەنشىلەگەن. شىمكەنتتە وتكەن «جىبەك جولى ايشىقتارى» ۇلتتىق كيىم ديزاينەرلەرىنىڭ بايقاۋىندا ستۋدەنتتەرى «ەڭ ۇزدىك بالالار مەن جاسوسپىرىمدەردىڭ كيىم ۇلگىسى» نوميناتسياسىنىڭ جەڭىمپازى اتاندى. ال 2017 جىلعى وسى بايقاۋدا «نيۋ فولكلور» اتتى كيىم جيىنتىعىمەن قاتىستى.
باعىتى ايقىن، شىعارماشىلىعى شىڭدالعان گ.قويلانوۆانىڭ 2019 جىلى «كيىم ديزاينى» ماماندىعىندا ءبىلىم الۋشىلار ءۇشىن «ماتەريالوۆەدەنيە ۆ ديزاينە ودەجدى» دەپ اتالاتىن اۆتورلىق وقۋ قۇرالى جارىق كوردى. بيىل «بالالار جەڭىل كويلەگى نەگىزىندە مودەلدىك ەرەكشەلىكتەردى ءتۇسىرۋ» مەن «بالالار شالبارىنىڭ نەگىزگى سىزباسىن قۇرۋ» جانە «كوستيۋم كومپوزيتسياسىنداعى ءتۇس» تاقىرىبى بويىنشا ادىستەمەلىك ۇسىنىستار، «كوستيۋم تاريحى» تاقىرىبىندا لەكتسيا جيناعىن دايىندادى.
گاۋھار جاراسقىزى شاكىرتتەرىن كرەاتيۆتى شىعارماشىلىق جۇمىستاردى ورىنداۋمەن قاتار، قازىرگى زامان تالابىنا ساي گرافيكالىق باعدارلامالاردى دا تەرەڭ وقىتىپ، كاسىبي ساۋاتىن تەرەڭدەتە تۇسۋدە.
بيىلعى وقۋ جىلى ۇستاز ءۇشىن جەڭىستى جىل بولدى. «ۇزدىك پەداگوگ 2021» بايقاۋىنىنڭ قالالىق كەزەڭىنىڭ جەڭىمپازى اتانىپ، قر ءبىلىم جانە عىلىم ءمينيسترى ا.ايماعامبەتوۆتىڭ العىس حاتىمەن ماراپاتتالدى.
گ.قويلانوۆا سەكىلدى ۇستازدارى بار شىمكەنتتە تالاي شاكىرت ۇلتتىق كيىمدەردى قايتا جاڭعىرتىپ، ترەندكە اينالدىرارى ءسوزسىز.
