ءبىلىم جانە عىلىم ۆيتسە-ءمينيسترى: "ەل ايماقتارىندا مەكتەپ قۇرىلىسى جوسپارىنىڭ ورىندالماۋ قاۋپى بار"

2165
Adyrna.kz Telegram

قر ءبىلىم جانە عىلىم ۆيتسە-ءمينيسترى ب.اسىلوۆا فەيسبۋكتەگى پاراقشاسىندا پوست جاريالاپ، ەلىمىزدە بيۋدجەت قاراجاتىنا مەكتەپ سالۋ ماسەلەلەرىنە توقتالدى. ونىڭ ايتۋىنشا، ەل وڭىرلەرىندە مەكتەپ قۇرىلىسى جوسپارىن ورىنداۋ بويىنشا جاعداي ءماز ەمەس دەپ حابارلايدى "ادىرنا" ۇلتتىق پورتالى.

"ال ەندى بيۋدجەت قاراجاتى ەسەبىنەن مەكتەپ سالۋ تۋرالى! وكىنىشكە قاراي، جاعداي ءماز ەمەس جانە الاڭداۋشىلىق تۋدىرىپ وتىر. مەكتەپ قۇرىلىسىنىڭ بەكىتىلگەن ادىستەمەسى،  تەتىكتەرى بار، قارجىلىق قامتاماسىز ەتۋ بار، الايدا 1 قازانداعى جاعداي بويىنشا قاراجاتتى يگەرۋ بار بولعانى 56,3 ملرد تەڭگەنى نەمەسە جوسپارداعى 96,6 ملرد تەڭگەنىڭ 58%-ءىن قۇرادى. ماسەلەن، سولتۇستىك قازاقستان وبلىسى بويىنشا يگەرۋ – 86%، جامبىل وبلىسى بويىنشا – 78% جانە الماتى قالاسى بويىنشا – 75%.  الايدا قارجىنى يگەرۋدە رەسپۋبليكالىق ورتاشا كورسەتكىشتەن ەداۋىر تومەن كورسەتكىشتەر اقتوبە وبلىسى بويىنشا – 31%، ماڭعىستاۋ وبلىسى بويىنشا – 39%، ال اتىراۋ وبلىسى بويىنشا قارجى مۇلدەم يگەرىلمەگەن»، —  دەپ ب. اسىلوۆا بيۋدجەت قاراجاتى ەسەبىنەن مەكتەپ سالۋ ماسەلەسىنە ناقتى ساندارمەن تالداۋ جاسادى.

سونىمەن قاتار، وسى سالاداعى بىتكەن ءىستى دە اتاپ ءوتتى.

"1 قازانداعى جاعداي بويىنشا مەملەكەتتىك بيۋدجەت ەسەبىنەن 20,6 مىڭ وقۋشى ورنىنا ارنالعان 52 مەكتەپ پايدالانۋعا بەرىلدى، 3 اپاتتى مەكتەپ ماسەلەسى شەشىلدى، 12 مەكتەپتە ءۇش اۋىسىمدى وقىتۋ جويىلدى، 25 مەكتەپتە وقۋشى ورىندارىنىڭ تاپشىلىعى جويىلدى", — دەدى ۆيتسە-مينيستر.

بۇدان باسقا جىل سوڭىنا دەيىن "جىر" بولاتىن ماسەلە دە بار ەكەنىن جاسىرمادى.

"بيىلعى جىلدىڭ سوڭىنا دەيىن 18 نىساننىڭ، اقمولا وبلىسىندا – 3, الماتى وبلىسىندا – 5, قىزىلوردا وبلىسىندا – 1, تۇركىستان وبلىسىندا – 1 جانە الماتى قالاسىندا 8 نىسان بويىنشا ۋاقىتىلى پايدالانۋعا بەرمەۋ قاۋپى بار", - دەلىنگەن پوستتا.

 

 

"ادىرنا" ۇلتتىق پورتالى.

پىكىرلەر