اياز ايتىپ كەلدى. اپتا باسىنان بەرى باستالعان سارىشۇناق اياز قازىر كارىنە ءمىنىپ-اق تۇر. الماتىنىڭ ىلعالى -25 گرادۋستىڭ ءوزىن كوتەرە الماي، ساق-ساق كۇلەدى. شاھارداعى ءۇيسىز-كۇيسىزدەرگە باسپانا بولعان بەيىمدەۋ ورتالىعى اۋزى-مۇرنىنان شىعىپ جاتىر. 180 ادامعا شاقتالعان مەكەمەگە قازىردىڭ وزىندە 200-گە جۋىق قاڭعىباس تۇراقتاعان. اياق-قولى ءۇسىپ، دالادا قالىپ، جانساقتاۋ ءۇشىن كەلىپ جاتقاندارى قانشاما؟! بازار مەن تەمىرجول ۆوكزالدارىن جاعالاپ، كۇندەلىكتى ناپاقا تاۋىپ جۇرگەندەر دە قارا سۋىقتان توڭىپ وسىندا اعىلىپتى. قارلى-بوراندا تاپقان باسپاناسى، بۇل.
جىل قۇسى سياقتى: جازدا قاڭعىرىپ كەتىپ، قايىر تىلەپ كۇنەلتەتىندەردىڭ كوبى كۇن سۋىتسا، وسىندا قوناقتايدى ەكەن. ءۇيسىز ادامعا بۇل دا اجەپتاۋىر باسپانا. كۇن سايىن ماي شايناپ، قازى-قارتا جەمەسە دە، اشتان ولتىرمەيدى. ءبىزدى ورتالىق قىزمەتكەرلەرى وزدەرى ەرتىپ ءجۇرىپ ارالاتتى. كارى-جاسى ارالاس. جۇزدەرى سىنىق. جاتاقحانا ءتارىزدى سالىنعان ۇلكەن زالدىڭ بوساعاسىنا دەيىن ەكى قابات توسەك قويىلعان. ءبىز بىرىنەن-ءبىرى ۇلكەن، بىرىنەن-ءبىرى ادامدارىمەن وزگەشە ءتورت زالعا كىرىپ شىقتىق. العاشقى ەكەۋىندە جاتقانداردىڭ قىرى سىنا قويماعان، سەرگەكتەۋ كورىندى. ۇشىنشىسىندەگىلەر دە سونداي. بۇل زالدا جاتقاندار كۇندىز جۇمىس ىستەپ، كەشكە قونالقاعا كەلەدى ەكەن. ال ءتورتىنشى زالدى ءوزىمىز «تىلەپ» الدىق. جولباستاپ جۇرگەندەر «وندا «كارانتين». كىرمەي-اق قويىڭىزدار. ول زالداعىلار مۇگەدەكتەر» — دەپ ەسكەرتكەن ەدى. قوياردا قويماي كىردىك. ۇلكەن ەسىگىن اشقاننان-اق قولقانى قاباتىن اششى ءيىس بەتكە ۇردى. تورگە وزباي بوساعادان قايتۋعا تۋرا كەلدى. ويتكەنى، اياق باساتىن جەر جوق. ونىڭ ۇستىنە كەتەۋى كەتكەن جانداردىڭ قاسىنا جاقىنداۋدىڭ ءوزى، شىندىعىن ايتقاندا، قيىن. ەسىك كوزىنەن فوتوكامەرامىزدى تۋرالاپ بىرنەشە كادر الدىق تا، كەرى شەگىندىك…
ءبىزدى قارسى الىپ، جولباستاپ جۇرگەن جاننا مەن ايناگۇل ءبىر جىلدان بەرى وسىندا جۇمىس ىستەيدى. جاننا جاقىپبەكوۆا ورتالىقتا وسى ۋاقىت ارالىعىندا كىمدەردىڭ پانالاعانىن ايتىپ بەردى. ول «مۇندا ساپارباي ارىنوۆ دەگەن فيزيك بولدى. جۋىردا كەتىپ قالدى. تسىگانوۆ دەگەن سپورتشى بار ەدى. ونى جاقىندارى الىپ كەتتى. ت.جۇرگەنوۆ اكادەمياسىن بىتىرگەن رۋسلان سيقىمبەكوۆ دەگەن كومپوزيتور تۇسكەن. ول ماقپال ءجۇنىسوۆانىڭ بىرنەشە ءانىنىڭ اۆتورى ەكەن. ول جىگىت تە كوپ تۇراقتاعان جوق. ونداي نامىستى كىسىلەر مۇندا كوپ جاتپايدى» — دەپ ءتۇسىندىردى. ال ايناگۇل جاسكەلەڭوۆا بىزگە قاراعاندىنىڭ بۇرىنعى ميليتسيا مەكتەبىن وقىعان ايەلدىڭ وسىندا جاتقانىن جەتكىزدى. 49 جاستاعى گۇلزيرا تالاسباەۆانى فوتوكامەرادان ءجۇزىن جاسىرىپ وتىردى. سوزگە ساراڭداۋ كىسى ەكەن. بىراق تاعدىرىنىڭ قالاي تاس-تالقان بولعانىن بايانداپ بەردى. «قاراعاندىداعى ميليتسيا مەكتەبىن بىتىرگەن سوڭ، زاڭگەر بولىپ بىرنەشە جەردە جۇمىس ىستەدىم» — دەپ باستادى اڭگىمەسىن. «بىلتىر ءۇيىم ورتەنىپ كەتتى. سول جولى بارلىق قۇجاتىمنان ايىرىلدىم. سودان كەيىن، مىنە مىنانداي جاعدايعا تاپ بولدىم. كۇزدەن بەرى وسىندا جاتىرمىن. قۇجاتىم قالپىنا كەلسە، جۇمىس تاۋىپ ىستەسەم دەگەن ويىم بار» — دەيدى.
باسپاناسىزداردىڭ باسپاناسىندا الۋان تاعدىر بار. قايسىبىرىن ايتىپ تاۋىساسىز؟! وسىندا كەلىپ، بىرىمەن-ءبىرى تانىسىپ، تابىسىپ جاتاتىن ەرلى-زايىپتىلار دا بار. ءۇش رەت تۇرمەگە ءتۇسىپ شىققان قاندىقول دا ءجۇر اراسىندا. 14 جاستاعى قىزدى زورلاعان ازعىن دا الگى 200 مىسكىننىڭ اراسىندا وتىر. «التىن القا» يەگەرى – كوپ بالالى انا باۋىر ەتى بالالارىنا سىيماي، وسىندا تۇراقتاپتى. اۋعان سوعىسىنا قاتىسقان ەكى باتىردى كەزدەستىردىك.ءبىرى – قازاق، ءبىرى – ورىس ۇلتىنىڭ وكىلى. 55 جاستاعى الەكساندر سەرگەەۆيچپەن تىلدەستىك. ءوز ءومىرىن ءوزى قۇرتقانىنا قاتتى وكىنىپ وتىرعانىن ايتادى. «اۋعان سوعىسىنىڭ ارداگەرىمىن» دەپ ايتۋدان ۇيالامىن» — دەيدى. ەكىنشى ارداگەر بىزگە سۇحبات بەرۋدەن ءۇزىلدى-كەسىلدى باس تارتتى. ءبىز دە قىستاي المادىق.
كەلگەن ىزىمىزبەن كەرى قايتىپ بارا جاتقانبىز. ەسىك كوزىنەن ورتالىق قىزمەتكەرلەرىنىڭ تاعى ەكى قاڭعىباستى اكەلگەنىن بايقاپ قالدىق. بىرەۋى قولىن جايىپ اقشا سۇرادى. بىرەۋى ۋداي ماس.
اياز قىسقان الماتى قالتىراپ تۇر. ال ورتالىقتى پانا قىلعان قاڭعىباستار جىل قۇستارى سياقتى كوكتەم كەلسە «ۇشىپ» كەتەدى.
جاراس شوكە،
سالتانات شىرىنحان
