زەينەتاقىنىڭ جاڭا ورتاشا مولشەرى 100 مىڭ تەڭگە

2882
Adyrna.kz Telegram

ەڭبەك جانە حالىقتى الەۋمەتتىك قورعاۋ مينيسترلىگى 1 قازانداعى جاعداي بويىنشا قازاقستانداعى زەينەتاقى تولەمدەرىنىڭ ورتاشا مولشەرىن اتادى، - دەپ حابارلايدى “ادىرنا” ۇلتتىق پورتالى ۆەدومستۆو سايتىنا سىلتەمە جاساپ.

2021 جىلعى قاڭتاردان قىركۇيەككە دەيىن رەسپۋبليكالىق بيۋدجەتتەن بازالىق زەينەتاقى تولەۋگە شامامەن 614,9 ميلليارد تەڭگە، ىنتىماقتى زەينەتاقىعا - 1 تريلليون 390,1 ميلليارد تەڭگە جۇمسالعان.

"2021 جىلى 1 قازانداعى ەسەپ بويىنشا زەينەتكەرلەر سانى 2 ملن 229 مىڭنان استام بولدى. 2021 جىلى 1 قازاندا زەينەتاقى تولەمدەرىنىڭ ورتاشا مولشەرى (بازالىق زەينەتاقى تولەمىن ەسكەرە وتىرىپ) 99 887 تەڭگەگە جەتتى", - دەلىنگەن حابارلامادا.

ۆەدومستۆودا 2018 جىلى 1 شىلدەدەن باستاپ مەملەكەتتىك بازالىق زەينەتاقى تولەمى ءار زەينەتكەردىڭ زەينەتاقى جۇيەسىنە قاتىسۋ ءوتىلىن ەسكەرە وتىرىپ، جەكە تاعايىندالاتىنى ايتىلدى. زەينەتاقى جۇيەسىنە قاتىسۋ وتىلىنە 1998 جىلى 1 قاڭتارداعى جاعداي بويىنشا ىنتىماقتى جۇيەدە جينالعان ەڭبەك ءوتىلى، سونداي-اق، مىندەتتى زەينەتاقى جارنالارى تولەنگەن كەزەڭدەر قوسىلادى.

بۇعان دەيىن مينيسترلىك زەينەتاقى جۇيەسىنىڭ قولدانىستاعى ۇلگىسىن 2030 جىلعا دەيىن جاڭعىرتۋ بويىنشا ازىرلەنگەن تۇزەتۋلەر تۋرالى جاريالادى.

14 ماۋسىمدا ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ەلىمىزدە زەينەت جاسىن تومەندەتۋ جوسپارلانبايتىنىن حابارلادى.

”ادىرنا” ۇلتتىق پورتالى

پىكىرلەر