Eńbek jáne halyqty áleýmettik qorǵaý mınıstrligi 1 qazandaǵy jaǵdaı boıynsha Qazaqstandaǵy zeınetaqy tólemderiniń ortasha mólsherin atady, - dep habarlaıdy “Adyrna” ulttyq portaly vedomstvo saıtyna silteme jasap.
2021 jylǵy qańtardan qyrkúıekke deıin respýblıkalyq bıýdjetten bazalyq zeınetaqy tóleýge shamamen 614,9 mıllıard teńge, yntymaqty zeınetaqyǵa - 1 trıllıon 390,1 mıllıard teńge jumsalǵan.
"2021 jyly 1 qazandaǵy esep boıynsha zeınetkerler sany 2 mln 229 myńnan astam boldy. 2021 jyly 1 qazanda zeınetaqy tólemderiniń ortasha mólsheri (bazalyq zeınetaqy tólemin eskere otyryp) 99 887 teńgege jetti", - delingen habarlamada.
Vedomstvoda 2018 jyly 1 shildeden bastap memlekettik bazalyq zeınetaqy tólemi ár zeınetkerdiń zeınetaqy júıesine qatysý ótilin eskere otyryp, jeke taǵaıyndalatyny aıtyldy. Zeınetaqy júıesine qatysý ótiline 1998 jyly 1 qańtardaǵy jaǵdaı boıynsha yntymaqty júıede jınalǵan eńbek ótili, sondaı-aq, mindetti zeınetaqy jarnalary tólengen kezeńder qosylady.
Buǵan deıin mınıstrlik zeınetaqy júıesiniń qoldanystaǵy úlgisin 2030 jylǵa deıin jańǵyrtý boıynsha ázirlengen túzetýler týraly jarııalady.
14 maýsymda Eńbek jáne halyqty áleýmettik qorǵaý mınıstri Serik Shapkenov elimizde zeınet jasyn tómendetý josparlanbaıtynyn habarlady.
”Adyrna” ulttyq portaly
