قايرات قۇماتاي. قايران، دۇنيە!

5546

ءبىر كەم دۇنيە...

دۇنيە ءبىر كەم دەگەنى،

شىندىقتىڭ جەردە جوقتىعى.

اشتىقتان كەدەي تالىقسىپ،

كەكىرگەن بايدىڭ توقتىعى.

دۇنيە ءبىر كەم دەگەنى،

ادىلدىكتىڭ جوقتىعى.

كۇن ءۇشىن جۇرگەن كەدەيگە،

بايلاردىڭ ايتقان بوقتىعى.

دۇنيە ءبىر كەم دەگەنى،

اقيقاتتىڭ جوقتىعى.

ەلىم دەپ تۋعان ەستىدەن،

ەسسىزدەردىڭ كوپتىگى.

دۇنيە ءبىر كەم دەگەنى،

قۇندىلىقتىڭ جوقتىعى

ءداستۇر مەن ءتىلدى ۇمىتقان،

ماڭگۇرتتەردىڭ كوپتىگى.

دۇنيە ءبىر كەم دەگەنى،

قاناعاتتىڭ جوقتىعى.

ءحالى مۇشكىل قارادان،

جەمقورلاردىڭ كوپتىگى.

دۇنيە ءبىر كەم دەگەنى،

 بىلىمنىڭ بىزدە جوقتىعى.

جاڭالىق اشار عالىمنان،

زالىنىڭ بيىك شوقتىعى.

دۇنيە ءبىر كەم دەگەنى،

اق پەن قارا ەگەسى.

جاقسىنىڭ مىنگەن اتىنان،

(جاقسىنىڭ ۇشقىر ويىنان،)

جاماننىڭ وزعان ەسەگى.

(جاماننىڭ وزعان ەسەبى.)

دۇنيە ءبىر كەم دەگەنى،

جاستىقتىڭ داۋرەن وتكەنى،

تاياعىنا سۇيەنىپ،

اياڭداپ قارتتىق جەتكەنى.

دۇنيە ءبىر كەم دەگەنى،

مەيىرىم كەتكەن ادامنان.

قۋ دۇنيە ءۇشىن ءىنىسى،

اعاسىن العان جاعادان.

دۇنيە ءبىر كەم دەگەنى،

ار-ۇيات كەتكەن سانادان،

 تول-ءتىلىن بىلمەي ولگەنشە،

باقيلىق بولدى قانشا ادام.

دۇنيە ءبىر كەم دەگەنى،

شەرحاننىڭ تارتقان،

 شەر-مۇڭى.

ازعانتاي قارا قازاقتىڭ،

قاسىرەتىنىڭ كوپتىگى.

 

قۇلىق جوق زامان، قايتەيىن... 

باقىر باستىڭ ەركىندىگىن، قايتەيىن...

قاسىقتاي ءتىلىم قانسىراپ جاتسا.

ساناۋلى بايدىڭ شالقىعانىن، قايتەيىن...

قارايعان حالىق نان سۇراپ جاتسا.

دارحان دالامنىڭ كەڭ ەكەنىن، قايتەيىن...

تۋلاقتاي جەر دە بۇيىرماي جاتسا.

ەلدە جوق بايلىق كوپ ەكەنىن، قايتەيىن...

جەگى قۇرت جەمقور اسىرماي جاتسا.

الاشىمنىڭ ارلى ەكەنىن، قايتەيىن...

قازاقتى قازاق الالاپ جاتسا.

كورشىلەردىڭ «ۇلى» ەكەنىن، قايتەيىن...

ساياساتىمەن سابالاپ جاتسا.

ءجۇز وتىز ۇلىس كوپ ەكەنىن، قايتەيىن...

باسىڭا شىعىپ باسىنىپ جاتسا.

كوكەلەردىڭ كوپ ەكەنىن، قايتەيىن...

كوسەگەسىن ەلدىڭ كوگەرتپەي جاتسا.

دەپۋتاتتاردىڭ «انت» بەرگەنىن، قايتەيىن...

ءوز انا-ءتىلىن ەجەلەپ جاتسا.

اكىمدەردىڭ «ۋادەسىن»، قايتەيىن...

شارشاعان حالىق نالا بوپ جاتسا.

اقىنداردىڭ «ادۋىنىن»، قايتەيىن...

ماقتاۋمەن ءوسىپ دارا بوپ جاتسا.

انشىلەردىڭ «اۋەلەگەنىن»، قايتەيىن...

جاراپازانى جارناما بوپ جاتسا.

باعىلانداردىڭ باتىلدىعىن، قايتەيىن...

«كوك قاعازعا» باس ۇرىپ جاتسا.

انالاردىڭ اشىنعانىن، قايتەيىن...

«تالابى» وزىنە جالا بوپ جاتسا.

ەل سەنگەن جاستىڭ جالىنداعانىن، قايتەيىن...

«اتا-سالتىڭا» تاس ۇرىپ جاتسا.

بالا-باقشانىڭ بار ەكەنىن، قايتەيىن..

بالدىرعان ءتىلى شالا بوپ جاتسا.

ارىز-ارماننىڭ كوپ ەكەنىن، قايتەيىن...

ادىلدىك تاپپاي «قازا» بوپ جاتسا.

قازاقتىڭ قارا ۇلى ەكەنىمدى، قايتەيىن..

حالقىمنىڭ مۇڭى مازالاپ جاتسا.

ومىردە مىنا ءتىرى ەكەنىمدى، قايتەيىن...

ىندەتتەن حالقىم قازا بوپ جاتسا.

قايتەيىن ەندى قاسىرەتىڭدى، قايتەيىن..

قاسيەتىم قارا بوپ جاتسا.

تاڭ قالماڭدار.

وسى جازعانىم،

اينالىپ كەلىپ «پالە» بوپ جاتسا.

 

قازاق...

قازاق مەنىڭ حالقىم،

قازاق مەنىڭ قالپىم.

قازاق مەنىڭ جانىم،

قازاق مەنىڭ قانىم.

قازاق مەنىڭ بابام،

قازاق مەنىڭ انام.

قازاق مەنىڭ سانام،

قازاق مەنىڭ سالتىم.

قازاق مەنىڭ زاتىم،

قازاق مەنىڭ تەگىم.

قازاق مەنىڭ ءتىلىم،

قازاق مەنىڭ ءدىلىم.

قازاق مەنىڭ ءور رۋحىم،

قازاق مەنىڭ نامىسىم.

قازاق مەنىڭ اتىم.

قازاق مەنىڭ سەنىڭ،

قازاق دەگەن ەلىڭ!

 

ەل ەرتەڭى جاستاردا... 

تاۋەلسىزدىك تۇعىرىم،

جەلبىرەر ماڭگى كوك تۋىم.

جالىنداعان جاستارىم،

تەكتى بوپ تۋعان ۇل-قىزىم،

مەن سەندەرگە سەنەمىن.

اقىل ويدىڭ كەمەلى،

ار-ۇجداننىڭ سەمسەرى.

ەستىدەن تۋعان ەستى بوپ،

مەن جاستارعا سەنەمىن.

اسىلدىڭ قالعان سىنىعى،

تۇلپارداي بەكەم تۇياعى،

قىراندايىن قىراعى.

مەن جاستارعا سەنەمىن.

ەل مەن جەردىڭ تاعدىرى،

انا ءتىلدىڭ قال-مۇڭى.

قابىرعاڭدى سوگەردەي،

ءوزىڭدى ءتىرى كومەردەي،

سالت-ساناڭدى قور قىلىپ،

ءوزىن سەنەن زور قىلىپ.

ەركەكپەن ەركەك تابىسىپ،

ايەلگە ايەل جابىسىپ،

تەكە ساقال ءدىن بۇزار.

ساناڭدى ۋلاپ سالت بۇزىپ،

كەلەمىز اتتەڭ، ساندى ۇرىپ.

ەل بيلىگى ەنجار ما؟

جوق ساناسى كەمتار ما؟

جول بەرىپ قاراپ وتىرار،

شىعاتىن باسقا جول بارما؟

اينالايىن جاستارىم،

ءجاي وتىنداي جارقىلداپ.

جۇلدىزدايىن جامىراپ،

قاراڭعى مىنا جۇرتىڭا،

كۇن بولىپ تۋشى جارقىراپ.

بولاشاق سەنىڭ قولىڭدا،

ءبىز سەندەرگە سەنەمىز!

 

كىم بولامىز؟

ەلىمدى ەز قورلاسا،

كىم بولامىز؟

ۇڭگىردە ۇلتىن سۇيگەن،

ءبىز بولامىز.

تۇك كورمەي قاراڭعىدا

جۇرسەك تاعى،

ساناسى جارقىراعان،

ءبىز بولامىز.

ماڭگۇرتتەر ايتتى ەكەن دەپ،

ءبىر جامان ءسوز.

جامانمەن جاعالاسساق،

كىم بولامىز؟

ەرىڭدى ەر قولداسا،

 ەل بولامىز.

بەرەكە بىرلىك ارتىپ،

ءبىر بولامىز.

جاقسىنى جاقسى دەسەك،

قادىرلەسەك،

الاشىم قازاق بولماي،

كىم بولامىز؟!

ەلىڭدى ەر قورعاسا،

ەل بولامىز.

ەرلەرى ەلىم دەيتىن،

ەر بولامىز.

قازاقتى قازاق سۇيسە،

جالعىزىم دەپ،

قازاعىم «الاش» بولماي،

كىم بولامىز؟!

نامىسىڭ بيىك بولسا،

تۋ بولامىز.

رۋحىڭ اسقاقتاسا،

شىڭ بولامىز.

انا ءتىلى،

امان بولسا،

تاۋەلسىز ماڭگىلىككە،

ەل بولامىز!

 

ويان قازاق...

ويان قازاق!

ءبىر عاسىر، ۇيقتاپ جاتقان.

مەن ەمەسپىن، مىرجاقىپ،

قاداپ ايتقان.

تىرلىك قايدا؟

ىنتىماق، بىرلىك قايدا؟

ءتىرى ادامعا جاراماس،

ءۇنسىز جاتقان.

ويان قازاق!

ءتىلى قايدا انامنىڭ تىلدەسەتىن.

«قازاقپىن!» - دەپ جارقىراپ،

كۇن كەشەتىن.

ءتىل جوق جەردە، تىرلىگىڭ

تىرلىك ەمەس،

«ءۇنىڭ قايدا؟» - ۇنىڭمەن،

تىلدەسەتىڭ.

رۋح قايدا بويداعى،

نامىس قايدا؟

ۇيات قايدا؟

ۇجداندى، وياتپاي ما؟

ەسىنەپ، ەستى جيماي

ءالى ءجۇرسىڭ،

بۇل «قازاقتىڭ» عاسىردا

تاڭى اتپاي ما؟!

ويان قازاق!

بوي تۇزە،

ويعا باتپا.

ءبىر اللا بەرەدى - دەپ،

قاراپ جاتپا.

ونەر ۇيرەن، ءبىلىم ال،

بىلىكتى بول.

نامىسىڭدى كۇن ءۇشىن،

نانعا ساتپا.

ويان قازاق!

وتكەننەن، ساباق الدا.

ءتۇسۋ كەرەك بولاشاق،

دارا جولعا.

ەلىڭ جەرىڭ تۇرعاندا،

ەكەلەنبەي،

كوشىمىزدى باستايىق،

سارا جولعا!!!

 

قازاق دەگەن، الاش دەگەن بىز ەدىك...

قازاق ەدىك تاريحىن تاسقا ويعان،

الاش ەدىك اتويلاپ، اتقا قونعان.

قازاق ەدىك ءور ەدىك، ءورشىل ەدىك،

بەرمەپ ەدىك نامىستى، جاتقا قولدان.

قازاق ەدىك ايبىندى اسقار ەدىك،

الاش ەدىك وزگەدەن، اسقاق ەدىك.

قازاق ەدىك ءبورى ەدىك، ەركىن ەدىك،

الاش ەدىك قىرانداي قىراعى ەدىك.

قازاق ەدىك تۇلپارى، توپتان وزعان،

الاش ەدىك اقىلى، جۇرتتان وزعان.

قازاق ەدىك ءدام-تۇزىن اقتاي بىلگەن،

الاش ەدىك ءداستۇردى ساقتاي بىلگەن.

قازاق ەدىك قامشىسى داۋ قايىراعان،

الاش ەدىك قىلىشى جاۋ قايىرعان.

قازاق ەدىك كۇش العان تاۋ-تاسىنان،

الاش ەدىك ولمەگەن سان عاسىردان.

قازاق ەدىك اڭقىلداق، اڭعال ەدىك،

الاش ەدىك مەيرىمدى، قورمالى ەدىك.

قازاق ەدىك جاۋىنا قاتال ەدىك،

الاش ەدىك دوستىققا ادال ەدىك.

قازاق ەدىك ەلىنە قورعان ەدىك،

الاش ەدىك سايالى ورمان ەدىك.

قازاق ەدىك قۇرعىر-اي قۇل دا بولدىق.

الاش ەدىك «ارىس» بوپ توردا ولدىك.

قايران مەنىڭ «جەلتوقسان» بوزداقتارىم،

ەرلىگىڭمەن ەگەمەن ەلدە بولدىق.

تاۋەلسىزبىن قاستەرلى ءتىلىم قايدا؟!

ەرلىك جاسار ەل دەيتىن ەرىم قايدا؟!

مەن سەنەيىن «جاقسى ءسوز جارىم ىرىس».

بولاشاققا سەنەيىن، سەنىم بارما؟!

 

كوكەيدەگى ءبىر سۇراق؟

كوكەيدەگى ءبىر سۇراق،

سالماعى اۋىر ءزىل سۇراق.

ەتەكتە قالدى قايران ءتىل،

توبەسىنەن قۇز قۇلاپ.

ءتىرى بوپ تۋعان الاشىم،

ءتىلى جوق اتتەڭ، مىڭ سۇراق؟!

وتىز جىل ءوتتى ءتىلىڭ جوق،

وزگەدەن سورلى بولدىق پا.

ەستى بوپ تۋعان ەل ەدىك،

ەز بولىپ قايتا تۋدىق پا.

توردە وتىرعان ۇلداردىڭ،

ساناسى اتتەڭ قۇلدىقتا!

 

نە دەيسىڭ تاعى نە دەيسىڭ؟...

ابايسىزدا سۇرىنسەڭ،

قۇلادىڭ دەيسىڭ...

قازاقتىڭ شەرتسەم

شەر-مۇڭىن،

جىلادىڭ دەيسىڭ...

نامىسىم تۇرسا ىشقىنىپ،

تۋلادىڭ دەيسىڭ...

ءبىر ساتكە ءۇنسىز جوعالسام،

تۇرمادىڭ دەيسىڭ...

ءتىلىم ءۇشىن ءتىل قاتسام،

تىلەمشى دەيسىڭ...

ۇلتىم ءۇشىن ءۇن قاتسام،

ۇرانشىل دەيسىڭ...

جوعىمدى تاپپاي سۇراسام،

سۇرامشى دەيسىڭ...

تۇركىنىڭ ايتسام بىرلىگىن،

«تۇرانشىل» دەيسىڭ..

شىندىقتى ايتسام شىرىلداپ،

شۋلاتتىڭ دەيسىڭ...

اللانى السام اۋزىما،

«قۇرانشىل» دەيسىڭ...

«ارۋاقتى» ايتسام بابالاپ،

ءتاڭىرشىل دەيسىڭ....

وزىممەن ءوزىم كۇي كەشسەم،

ءوزىمشىل دەيسىڭ...

تەگىمدى ايتىپ قايتەيىن،

رۋشىل دەيسىڭ...

ۇل بولىپ جەسەڭ ۇلت قامىن،

ەەە-ەي.. ۇلتشىل دەيسىڭ.

مەنى قويشى ەلەۋسىز

 جاي پەندەمىن.

ۇلى اباي مەن مۇقاعالي،

 نە كورمەدى!

زارينا اشىربەك،

"ادىرنا" ۇلتتىق پورتالى

پىكىرلەر
ۇقساس جاڭالىقتار
Серіктестер/Партнеры
Студия IMA - создание сайтов Доставка цветов Астана - Lova Buket