"كوشە پارتياسىنىڭ" 4 بەلسەندىسى 5 جىلعا سوتتالدى

4097
Adyrna.kz Telegram

ازاماتتىق 4 بەلسەندى — اسحات جەكسەباەۆ، اباي بەگىمبەتوۆ، قايرات قىلىشەۆ، نويان راحىمجانوۆتار 5 جىلعا باس بوستاندىعىنان ايىرىلدى. ولار ەندى جازاسىن قاۋىپسىزدىگى ورتاشا مەكەمەلەردە وتەيدى. سونداي-اق جابىرلەنۋشىلەر قورىنا 20 اەك ايىپپۇل سالىندى، دەپ حابارلايدى «ادىرنا» ۇلتتىق پورتالى «Orda.kz-كە» سىلتەمە جاساپ.

الماتى قالاسى المالى اۋداندىق №2 اۋداندىق سوتىنىڭ سۋدياسى ەرنار قاسىمبەكوۆ سوت مويىنداعان «ەكسترەميستىك» «كوشە پارتياسى» ۇيىمىنىڭ قىزمەتىنە قاتىسقان 12 ايىپتالۋشىنىڭ بارلىعىنا ايىپتاۋ ۇكىمىن شىعاردى.

— ديانا بايماعامبەتوۆانىڭ ەكى جىلعا باس بوستاندىعى شەكتەلەدى جانە ءجۇز ساعاتتىق تۇزەۋ جۇمىسىن اتقارادى. ال قالعاندارى (دامەتكەن اسپاندياروۆا، باقداۋلەت الىبەكوۆ، گۇلزيپا جاۋكەروۆا، نيناگۇل جۇمانيازوۆا، ەرمەك قوزيەۆ، مارات قۇربانوۆ، دارحان ۋاليەۆ) ءبىر جىل باس بوستاندىعىنان ايرىلىپ، ءۇش جىلعا دەيىن قوعامدىق قىزمەتتە  جۇمىس ىستەۋگە تىيىم سالىندى. باس بوستاندىعىنان شەكتەلگەندەر سونداي-اق 10 ايلىق ەسەپتىك كورسەتكىش ايىپپۇل سالىندى، — دەدى قورعاۋشى جانار بالعاباەۆا.

وسىلايشا سۋديا ايىپتالۋشىلارعا جازا تاعايىنداۋ تۋرالى پروكۋروردىڭ تالاپتارىن قاناعاتتاندىردى.

قورعاۋشىنىڭ ايتۋىنشا، اتالعان ازاماتتار ۇكىمگە اپەللياتسيالىق تارتىپتە شاعىمداناتىنى ءسوزسىز.

ەستەرىڭىزگە سالا كەتەيىك، بەلسەندىلەردىڭ سوتى 27 شىلدەدە باستالعان. ولاردىڭ بارلىعى قوعامدىق-ساياسي ماسەلەلەر بويىنشا ءوز پىكىرىن اشىق ايتقان، سونىمەن قاتار ميتينگتەرگە قاتىسقان.

 

«ادىرنا» ۇلتتىق پورتالى.

 

پىكىرلەر