شىمكەنتتە ءدىني كونفەسسيا وكىلدەرى اراسىنداعى سپورتتىق سايىستار جالعاسۋدا. ءدىن وكىلدەرىنىڭ سپارتاكياداسىنىڭ اياسىنداعى ۇستەل تەننيسى جارىسى «مۇز سارايىندا» ءوتتى. سپورت باسەكەسىنە 20-دان استام قاتىسۋشى جينالدى.
– ءدىن وكىلدەرىنىڭ اراسىنداعى سپورت سايىستارى جىلدا ۇيىمداستىرىلىپ تۇرادى. بيىلعى ەرەكشەلىك – جارىستار ءبىر كۇندە ەمەس، ءبىر اي بويى سپارتياكيادا تۇرىندە وتۋدە. بۇل جولى ۇستەل تەننيسىنەن جارىس وتكىزىلىپ، ءوزارا مىقتىلار انىقتالادى. ال جەڭىمپازدار سپارتاكيادانىڭ سالتاناتتى جابىلۋ راسىمىندە ماراپاتتالادى، – دەدى شىمكەنت قالاسىنىڭ ءدىن ىستەرى باسقارماسىنىڭ قىزمەتكەرى عالىمجان سارمانوۆ.
جوسپار بويىنشا الداعى ۋاقىتتا قاجىمۇقان اتىنداعى ورتالىق ستاديوندا شاحمات جارىسى وتەدى.
ايتا كەتەيىك، ءدىن وكىلدەرى اراسىنداعى سپارتاكيادا قازاقستان رەسپۋبليكاسى تاۋەلسىزدىگىنىڭ 30 جىلدىعى مەن 18 قازان – رۋحاني كەلىسىم كۇنىنە ورايلاستىرىپ وتكىزىلۋدە. مۇنداعى ماقسات – تۇرعىندار اراسىنداعى تاتۋلىق پەن كەلىسىمدى نىعايتۋ، بۇقارالىق سپورتتى ناسيحاتتاۋ، سالاۋاتتى ءومىر سالتىن راسىمدەۋ. ءبىر ايلىق باسەكە 15 قازان كۇنى مارەسىنە جەتىپ، ءتۇرلى سايىستاردىڭ جەڭىمپازدارىنا باعالى سىيلىقتار تابىستالادى.
