قازاقتىڭ يگى ءداستۇرى بويىنشا اتىراۋ قالاسىنداعى نازارباەۆ زياتكەرلىك مەكتەبىندە سالتاناتتى ءراسىم شاشۋمەن باستالىپ، «شەلل» مۇناي-گاز كومپانياسى ورناتقان كۇن ستانتسياسىنىڭ ديسپلەيىندە العاشقى ساندار جۇگىردى.
اتىراۋ قالاسىنداعى NIS-تە «شەلل» مۇناي-گاز كومپانياسى ورناتقان كۇن ستانتسياسى پايدالانۋعا بەرىلدى. بۇل NIS پەن شەلل اراسىنداعى «كۇن ەنەرگياسى – مەكتەپتەرگە» بىرلەسكەن جوباسىنىڭ ءتورتىنشى فوتوەلەكترلىك جۇيەسى.
2018 جىلدىڭ مامىر ايىندا استانا ەكونوميكالىق فورۋمى شەڭبەرىندە قازاقستان رەسپۋبليكاسىنىڭ ەنەرگەتيكا مينيسترلىگى، استانا قالاسىنىڭ اكىمدىگى، «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمى جانە «شەلل» كومپانياسى اراسىندا مەموراندۋمعا قول قويىلدى، ونىڭ باستى ماقساتى «كۇن ەنەرگياسى – مەكتەپتەرگە» پيلوتتىق جوباسىن ىسكە اسىرۋ بولىپ تابىلادى.
جوبانىڭ رەسمي تۇردە اشىلۋى 2018 جىلى 1 جەلتوقساندا NIS-ءتىڭ 10 جىلدىعىن تويلاۋ اياسىندا ەلباسى – قازاقستان رەسپۋبليكاسىنىڭ تۇڭعىش پرەزيدەنتى نۇرسۇلتان ءابىشۇلى نازارباەۆتىڭ قاتىسۋىمەن ءوتتى.
قازىرگى ۋاقىتتا كۇن فوتوەلەكتر جۇيەلەرى نۇر-سۇلتان، اقتاۋ جانە ورال قالالارىنىڭ نازارباەۆ زياتكەرلىك مەكتەپتەرىندە ورناتىلعان. سونداي-اق تۇركىستان قالاسىنداعى جاڭا زياتكەرلىك مەكتەپتە كۇن ستانتسياسىنىڭ قۇرىلىسى جوسپارلانۋدا.
اتىراۋ قالاسىنداعى نازارباەۆ زياتكەرلىك مەكتەبىنىڭ اۋماعىندا كۇن پانەلدەرىنىڭ قۇرىلىسى 2021 جىلدىڭ مامىر ايىندا باستالدى. ەلەكتر ستانتسياسىنىڭ جالپى ۇزىندىعى 73 مەتر بولسا، الدىڭعى بيىكتىگى 4 مەترگە جەتەدى. كۇن باتارەيالارىنىڭ تىرەكتەرى 13 بلوگقا بولىنگەن، ولاردىڭ اراسىندا سپورتتىق ءىس-شارالار كەزىندە كورەرمەندەرگە ىڭعايلى بولۋ ءۇشىن ەكى ساتىلى تريبۋنالار ورناتىلعان. كۇن جۇيەسى مەكتەپتىڭ جىلدىق ەنەرگيا شىعىنىن 30%-عا دەيىن قىسقارتۋعا مۇمكىندىك بەرەدى.
«كۇن ەنەرگياسى – مەكتەپتەرگە» جوباسى جاسىل ەكونوميكاعا بىرتىندەپ كوشۋگە جانە پارنيكتىك گازداردى قىسقارتۋعا، جاڭارتىلاتىن ەنەرگيا كوزدەرىن دامىتۋعا باعىتتالعان، سونداي-اق وقۋشىلاردىڭ ناقتى عىلىمداردى (STEM) زەرتتەۋگە قىزىعۋشىلىعىن ارتتىرۋ جانە ولاردىڭ ەكولوگيالىق مادەنيەتىن قالىپتاستىرۋعا ۇلەس قوسادى.
كۇن ستانتسياسىن اتىراۋ وبلىسى اكىمىنىڭ ورىنباسارى باقىتگۇل حامەنوۆا، «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا، قازاقستانداعى «شەلل» كونتسەرنىنىڭ اعا ۆيتسە-پرەزيدەنتى جانە توراعاسى حەرمان بۋرمەيستەر ىسكە قوستى.
– «كۇن ەنەرگياسى – مەكتەپتەرگە» – بۇل ەكولوگيالىق جانە ءبىلىم بەرۋ جوباسى، ول جاسىل ەكونوميكانى كەڭەيتۋگە، جاڭارتىلاتىن ەنەرگيا كوزدەرىن ەنگىزۋگە، ەكولوگيالىق مادەنيەتتى قالىپتاستىرۋعا جانە STEM-ءبىلىم بەرۋدى دامىتۋعا باعىتتالعان. جوبانى بيزنەستىڭ الەۋمەتتىك جاۋاپكەرشىلىگى، سونداي-اق ەنەرگەتيكالىق جانە ءبىلىم بەرۋ كومپانيالارىنىڭ تابىستى ىنتىماقتاستىعىنىڭ ۇلگىسى دەپ اتاۋعا بولادى، - دەدى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش ءشامشيدينوۆا.
قازاقستانداعى «شەلل» كونتسەرنىنىڭ اعا ۆيتسە-پرەزيدەنتى جانە توراعاسى حەرمان بۋرمەيستەر NIS-ءتىڭ جوعارى سىنىپ وقۋشىلارىمەن كەزدەسۋى بارىسىندا جاڭارتىلاتىن ەنەرگيا كوزدەرى مەن كۇن ستانتسيالارىن ەنگىزۋدەگى باسىمدىقتار تالقىلاندى. وقۋشىلاردى بەدەلدى ەنەرگەتيكالىق كونتسەرننىڭ كاسىبي عانا ەمەس، ومىرلىك تاريحى دا قىزىقتىردى. بالالار نانو جانە بيوتەحنولوگيا سالاسىنداعى عىلىمي جەتىستىكتەرى مەن جاڭا ونەرتابىستارىن تانىستىردى، اسىرەسە ەكولوگيالىق باعىتتاعى پلاستماسسا جانە وسىمدىك قالدىقتارىن قايتا وڭدەۋ جوبالارىن ۇسىندى.
قازاقستانداعى «شەلل» كونتسەرنىنىڭ اعا ۆيتسە-پرەزيدەنتى جانە توراعاسى گەرمان بۋرمەيستەر ءوز سوزىندە:
– شيرەك عاسىردان استام ۋاقىت بويى «شەلل» قازاقستانداعى ەنەرگەتيكالىق جوبالارعا ينۆەستيتسيا سالىپ كەلەدى. قازىرگى كەزدە ءبىز بالامالى ەنەرگيا كوزدەرىن پايدالانۋ جونىندەگى جوبالاردى ىسكە اسىرۋ ارقىلى قازاقستاننىڭ «جاسىل ەكونوميكاعا» كوشۋىنە جاردەمدەسۋ ءۇشىن كۇش-جىگەرىمىزدى سالىپ جاتىرمىز. سونداي-اق بۇل جوبا جاڭارتىلاتىن ەنەرگيا كوزدەرى سالاسىنداعى قازاقستاندىق كومپانيالاردىڭ مۇمكىندىكتەرىن جاقسارتا وتىرىپ، وتاندىق شاعىن جانە ورتا بيزنەستىڭ الەۋەتىن ارتتىرادى.
حەرمان بۋرمەيستەردىڭ باستاماسىمەن فۋتبولدان جولداستىق ماتچ باستالدى، ال العاشقى كورەرمەندەر كۇن پانەلدەرىنىڭ استىنداعى جاڭا تريبۋنادا جانكۇيەر بولدى.
"ادىرنا" ۇلتتىق پورتالى
