«حابار» تەلەارناسىنىڭ 30 جىلدىعىنا وراي جاڭارتىلعان فورماتتا ەفيرگە قايتا ورالعان «ازامات» ينتەللەكتۋالدى باعدارلاماسى مارەسىنە جەتىپ، ماۋسىم جەڭىمپازىن انىقتادى. فينالدىق ويىندا حالەل دوسمۇحامەدوۆ اتىنداعى اتىراۋ ۋنيۆەرسيتەتى مەن كەنجەعالي ساعاديەۆ اتىنداعى حالىقارالىق بيزنەس ۋنيۆەرسيتەتىنىڭ كوماندالارى كەزدەستى. اقتىق كەزەڭنىڭ تاقىرىبى – «قازاقستان ەكونوميكاسىنىڭ باستى درايۆەرى».
فينال بارىسىندا كوماندالار ءوز پوزيتسيالارىن دالەلدەۋ، قارسى تاراپتىڭ ۋاجىنە جاۋاپ بەرۋ جانە لوگيكالىق ارگۋمەنتاتسيا تۇرعىسىنان جوعارى دايىندىق دەڭگەيىن كورسەتتى. تارتىستى وتكەن ويىن ناتيجەسىندە 3:2 ەسەبىمەن حالەل دوسمۇحامەدوۆ اتىنداعى اتىراۋ ۋنيۆەرسيتەتى جەڭىسكە جەتىپ، «ازامات» ينتەللەكتۋالدى باعدارلاماسىنىڭ جەڭىمپازى اتاندى.
فينالدىق ويىندى قر پارلامەنتى ءماجىلىسىنىڭ دەپۋتاتى اسحات ايماعامبەتوۆ، عىلىم جانە جوعارى ءبىلىم ءمينيسترى ساياسات نۇربەك، «Respublica» پارتياسىنىڭ توراعاسى ايداربەك قوجانازاروۆ، «حابار» اگەنتتىگى» اق باسقارما توراعاسى كەمەلبەك ويشىباەۆ جانە QazaqDebate قوزعالىسىنىڭ نەگىزىن قالاۋشى ەربولات مۇحامەدجان باعالادى.
جوبا قورىتىندىسى بويىنشا ىنتالاندىرۋ سىيلىعى – 250 مىڭ تەڭگەدەن شاكارىم ۋنيۆەرسيتەتىنە، ءال-فارابي اتىنداعى قازاق ۇلتتىق ۋنيۆەرسيتەتىنە، قازاق ۇلتتىق قىزدار پەداگوگيكالىق ۋنيۆەرسيتەتىنە جانە نارحوزۋنيۆەرسيتەتىنە تابىستالدى.
ءتورتىنشى ورىندى جانە 400 مىڭ تەڭگە جۇلدەنى اباي اتىنداعى قازاق ۇلتتىق پەداگوگيكالىق ۋنيۆەرسيتەتى يەلەندى. ءۇشىنشى ورىن – قۇدايبەرگەن جۇبانوۆ اتىنداعى اقتوبە وڭىرلىك ۋنيۆەرسيتەتىنە (600 مىڭ تەڭگە). ەكىنشى ورىن جانە 1 ميلليون تەڭگە جۇلدە كەنجەعالي ساعاديەۆ اتىنداعى حالىقارالىق بيزنەس ۋنيۆەرسيتەتىنە بۇيىردى. ال ءبىرىنشى ورىن مەن 2 ميلليون تەڭگە جۇلدەنى حالەل دوسمۇحامەدوۆ اتىنداعى اتىراۋ ۋنيۆەرسيتەتى جەڭىپ الدى. وسىلايشا، جوبانىڭ جالپى جۇلدە قورى 5 ميلليون تەڭگەنى قۇرادى
ايتا كەتەيىك، «ازامات» ينتەللەكتۋالدى باعدارلاماسى العاش رەت 2000-جىلداردىڭ باسىندا «حابار» تەلەارناسىندا ەفيرگە شىعىپ، ەلدەگى پىكىرسايىس قوزعالىسىنىڭ دامۋىنا سەرپىن بەرگەن جوبالاردىڭ ءبىرى بولدى. جاڭارتىلعان ماۋسىم اياسىندا ەلىمىزدەگى 100-دەن استام جوعارى وقۋ ورنىنىڭ ىشىنەن ىرىكتەلگەن 32 ۋنيۆەرسيتەت قاتىستى. ەسكەرتە كەتەيىك، قازىرگى تاڭدا «ازامات» ينتەللەكتۋالدى باعدارلاماسىنىڭ ەكىنشى ماۋسىمىنا ىرىكتەۋ باستالىپ كەتتى. جاڭا ماۋسىمعا ەلىمىزدىڭ جوعارى وقۋورىندارى قاتىسا الادى.
