اۋعانستان استاناسى كابۋل قالاسىنداعى يدگاح مەشىتىنىڭ الدىندا جويقىن جارىلىس بولدى. بۇل تۋرالى Agence France-Presse باسىلىمى جازدى.
«تاليبان» وكىلى زابيۋللا مۋدجاحيد وقيعانىڭ بولعانىن رەسمي تۇردە مويىندادى. جارىلىس سالدارىنان بىرنەشە ادام قازا تاۋىپ، ونداعان ادام جاراقات العان. Kabul Newsتىڭ حابارلاۋى بويىنشا مەشىت الدىندا جارىلىس بولعان ساتتە مەشىت ىشىندە ءمۋدجاحيدتىڭ اناسىمەن قوشتاسۋ ءراسىمى ءوتىپ جاتقان. جارىلىستان كەيىن مەشىت ماڭىندا تالىبتەر مەن دايش سودىرلارى اراسىندا اتىس باستالعان. اتىس سالدارىنان قانشا ادام زارداپ شەككەنى جايلى ناقتى اقپارات جوق.
ءبىر كۇن بۇرىن دايش سودىرلارى جالالاباد قالاسىنىڭ اكىمشىلىگى ماڭىندا جارىلىس جاساپ، ارتى اتىسقا ۇلاسقان ەدى. دايش تالىبتەردى قارسىلاس ساناپ، ولارعا قاسيەتتى سوعىس جاريالاعان بولاتىن.
"ادىرنا" ۇلتتىق پورتالى
