ەندى ەلىمىزدە لاۋازىمدى قىزمەتكەرلەر مەن ولاردىڭ وتباسى مۇشەلەرىنىڭ قارجىلىق وپەراتسيالارى، ءتىپتى ساتىپ العان ۇيلەرى دە تەكسەرىلمەك. ول ءۇشىن جىلجىمايتىن مۇلىك قۇنى 50 ميلليون تەڭگەدەن اسسا جەتكىلىكتى دەپ حابارلايدى "ادىرنا" ۇلتتىق پورتالى "كتك" ارناسىنا سىلتەمە جاساپ.
وسىنداي وزگەرىستەر ەنگىزىلگەن زاڭ جوباسىن قازىر ءماجىلىس قاراپ جاتىر. بۇعان دەيىنگى زاڭدا 200 ميلليون تەڭگەنىڭ ءۇيىن العاندار عانا قوسىمشا تەكسەرىلگەن. ەندى ول سوما ءتورت ەسە تومەندەتىلىپ وتىر. ويتكەنى زاڭسىز جولمەن تابىلعان قارجى كوبىنە وسى جىلجىمايتىن مۇلىك ارقىلى ءىزىن جوعالتادى ەكەن. ال لاۋازىمدى قىزمەتكەرلەر ساناتىنا مەملەكەتتىكتەن باستاپ، كۆازيسەكتورداعى باسشىلاردىڭ ءبارى جاتادى. ولاردان بولەك، باسشىلاردىڭ ايەلى، بالالارى 50 ميلليوننىڭ ءۇيىن العان جاعدايدا اقشانىڭ زاڭدى جولمەن كەلگەنىن دالەلدەۋى ءتيىس.
جالپىعا بىردەي دەكلاراتسيالاۋدىڭ ءبىرىنشى كەزەڭىنىڭ ناتيجەسىندە 500-گە تارتا لاۋازىمدى قىزمەتكەردىڭ 58 ەلدىڭ بانكتەرىندە شوتى بارى انىقتالعان.
قالتالى شەنەۋنىكتەردىڭ كوبى اقشاسىن رەسەي، اقش پەن شۆەيتساريا بانكتەرىندە ساقتايدى.
“اقشامەن جانە باسقا مۇلىكپەن جاسالاتىن وپەراتسيالار بويىنشا مونيتورينگ جۇرگىزىلەتىن ادامدار ءتىزىمىن پرەزيدەنت بەكىتەدى. قارجىلىق مونيتورينگ اگەنتتىگى بۇل ادامداردىڭ، ولاردىڭ وتباسى مۇشەلەرىنىڭ جانە جاقىن تۋىستارىنىڭ جەكە ءتىزىمىن جاسايدى. ياعني ەلىمىزدىڭ شەنەۋنىكتەرى مەن ولاردىڭ تۋىستارى قارجىلىق مونيتورينگ سۋبەكتىلەرىنەن ءتيىستى قىزمەتتەردى العاننان كەيىن، سونىمەن قاتار شەتەلدىك مەملەكەتتىك قىزمەتكەرلەرگە قوسىمشا تەكسەرۋدەن وتەدى. مۇنداي تىزىمگە مەملەكەت جانە ۇكىمەت باسشىلارى، ۇكىمەتتىڭ اعا قىزمەتكەرلەرى، سوت جانە اسكەري قىزمەتكەرلەر، كورنەكتى ساياسي قايراتكەرلەر، سونداي-اق مەملەكەتتىك كورپوراتسيالاردىڭ باسشىلارى ەنگىزىلگەن. اراسىندا ساياسي پارتيالاردىڭ قوعامدىق تۇلعالارى دا بار”، – دەيدى قر ءماجىلىس دەپۋتاتى سەرگەي سيمونوۆ.
ايتا كەتۋ كەرەك، ولاردىڭ جاقىن تۋىستارىنىڭ قاتارىنا "نەكە جانە وتباسى" تۋرالى كودەكسكە سايكەس، اتا-انا، بالا، اعا-ءىنى، اپا-ءسىڭلى، اتا، اجە، نەمەرە كىرەدى.
"ادىرنا" ۇلتتىق پورتالى.
