بۇگىن اۋعانستاننىڭ پارۆان ايماعىنداعى چاريكار قالاسىندا جويقىن جارىلىستار بولىپ، ارتىنشا اتىس باستالدى. Afghanistan International ارناسى حابارلاعانداي قارۋلى قاقتىعىس "تاليبان" جاساقتارى مەن دايش سودىرلارى اراسىندا بولعان. بەلگىلى بولعانداي ۇرىستا ونداعان ادام قازا تاپقان.
اۋعانستاندا تالىبتەر باسىپ العاننان كەيىن دايش سودىرلارى جاڭا بيلىككە اشىق قارسىلىق كورسەتەتىنىن ءبىلدىرىپ، 26-تامىزدا كابۋل اۋەجايىندا جويقىن جارىلىستار جاسادى. ارتىنشا اۋعانستاننىڭ بىرنەشە ايماعىندا تالىبتەر مەن دايش سودىرلارى اراسىندا شايقاستار باستالدى. دايش سودىرلارى ارنايى ءپاتۋا شىعارىپ، وندا بەتپە بەت ۇرىستان اۋلاق بولۋعا، تالىبتەرگە جارىلىستار مەن تەررور ارقىلى جاۋاپ قاتۋعا شاقىردى.
اۋعانستاننىڭ سولتۇستىك ايماقتارىندا دايش سودىرلارى ونداعان تالىبتەردى قىرىپ سالعانى جايلى اقپارات بار. ساراپشىلار قوس تەررورلىق ۇيىم اراسىنداعى قاقتىعىس ناعىز سوعىسقا ۇلاسادى دەپ وتىر.
