Búgin Aýǵanstannyń Parvan aımaǵyndaǵy Charıkar qalasynda joıqyn jarylystar bolyp, artynsha atys bastaldy. Afghanistan International arnasy habarlaǵandaı qarýly qaqtyǵys "Talıban" jasaqtary men DAISh sodyrlary arasynda bolǵan. Belgili bolǵandaı urysta ondaǵan adam qaza tapqan.
Aýǵanstanda tálibter basyp alǵannan keıin DAISh sodyrlary jańa bılikke ashyq qarsylyq kórsetetinin bildirip, 26-tamyzda Kabýl áýejaıynda joıqyn jarylystar jasady. Artynsha Aýǵanstannyń birneshe aımaǵynda tálibter men DAISh sodyrlary arasynda shaıqastar bastaldy. DAISh sodyrlary arnaıy pátýá shyǵaryp, onda betpe bet urystan aýlaq bolýǵa, tálibterge jarylystar men terror arqyly jaýap qatýǵa shaqyrdy.
Aýǵanstannyń soltústik aımaqtarynda DAISh sodyrlary ondaǵan tálibterdi qyryp salǵany jaıly aqparat bar. Sarapshylar qos terrorlyq uıym arasyndaǵy qaqtyǵys naǵyz soǵysqa ulasady dep otyr.
