وبلىس اكىمى وڭداسىن ورازالين اقتوبە قالاسىن ارالاپ، وبلىس ورتالىعىنىڭ الەۋمەتتىك جانە ينفراقۇرىلىمدىق دامۋى بويىنشا بىرقاتار جوبالاردىڭ جۇزەگە اسىرىلۋىمەن تانىستى دەپ حابارلايدى "ادىرنا" ۇلتتىق پورتالى.
جۇمىس ساپارى جاڭاقونىس-3 تۇرعىن ءۇي الابىنىڭ گازبەن قامتۋ جەلىلەرىنىڭ قۇرىلىسىن قاراۋدان باستالدى. جوبا تامىز ايىندا باستالعان، بيىل قازان ايىندا اياقتالادى دەپ جوسپارلانىپ وتىر. جوعارى جانە ورتاشا قىسىمداعى بارلىعى 43 مىڭ گاز جەلىسى تارتىلماق.
ايتا كەتەيىك، وسى جىلى اقتوبەدە تۇرعىن ءۇي الاپتارىنداعى ينجەنەرلىك ينفراقۇرىلىمداردى دامىتاتىن بىرقاتار جوبالار جۇزەگە اسىرىلۋدا. اتاپ ايتقاندا، جاڭاقونىس-3 تۇرعىن ءۇي الابىمەن قاتار قۋرايلى، قۇراشاساي، اقشات-3 پەن اقجار+ اۋىلدارىندا دا گازبەن جابدىقتاۋ جوبالارى جۇزەگە اسىرىلىپ جاتىر. ال باتىس-3 شاعىن اۋدانىندا، زارەچنىي-1 جانە زارەچنىي-2 تۇرعىن ءۇي الاپتارىندا، قۇراشاساي مەن قۋرايلى اۋىلدارىندا سۋمەن جابدىقتاۋ جانە سۋ تارتۋ جەلىلەرىنىڭ قۇرىلىسى بويىنشا اۋقىمدى جوبالار جۇرگىزىلىپ، سايا تۇرعىن ءۇي الابىندا، سونداي-اق راۋان، اقجار+, قۇراشاساي، قۋرايلى اۋىلدارىندا جاڭادان ەلەكتر جەلىلەرى توسەلۋدە.
سونىمەن قاتار بيىل جاڭاقونىس-4 جانە جاڭاقونىس-5, باۋىرلاستار-5, شىعىس-1, اقجار+ تۇرعىن ءۇي الاپتارىن كوگىلدىر وتىنمەن، شىعىس-1, جاناقونىس-5, باۋىرلاستار-5 جانە سارباز تۇرعىن ءۇي الاپتارىن جارىقپەن قامتۋعا قاراجات ءبولىنىپ، جوبالاردى جۇزەگە اسىرۋ باستالماق.
وبلىس اكىمى قالا باسشىلىعىنا جوبالاردى كورسەتىلگەن مەرزىمدە ساپالى اياقتاۋدى تاپسىردى.
كەيىن ءوڭىر باسشىسى باتىس-2 شاعىن اۋدانىنداعى «ۋنيۆەر» مەديتسينالىق ورتالىعى ەمحاناسىنىڭ قۇرىلىسىمەن تانىستى. نىسان جەكە ينۆەستيتسيا ەسەبىنەن تۇرعىزىلىپ جاتىر. جاڭا مەديتسينا مەكەمەسىنىڭ جالپى اۋماعى — 2 مىڭ شارشى مەتر. ەمحانا كەمىندە 25 مىڭ ادامعا مەديتسينالىق قىزمەت كورسەتەتىن بولادى.
— 150-دەن استام جاڭا جۇمىس ورنى اشىلادى. العاشقى مەديتسينالىق-سانيتارلىق كومەكتىڭ بارلىق قىزمەتى قاراستىرىلعان. جالپى تاجىريبەلىك دارىگەرلەردىڭ، حيرۋرگيا مەن ۋرولوگيا، پەدياتريا، وڭالتۋ جانە فيزيكالىق ەم قابىلداۋ كابينەتتەرى جۇمىس جاسايتىن بولادى. دياگنوستيكالىق جابدىق اكەلىندى، ءارى قاراي ماگنيتتىك-رەزونانستىق جانە كومپيۋتەرلىك توموگرافيا ورتالىقتارىن ىسكە قوسۋ، امبۋلاتوريالىق حيرۋرگيانى دامىتۋ جوسپارلانىپ وتىر، — دەدى وبلىستىق دەنساۋلىق ساقتاۋ باسقارماسىنىڭ باسشىسى رۇستەم يساەۆ.
بيىل مەملەكەت باسشىسىنىڭ بۇقارالىق سپورتتى دامىتۋ بويىنشا تاپسىرماسىن جۇزەگە اسىرۋ اياسىندا باتىس-2 شاعىن اۋدانىندا فيزيكالىق مۇمكىندىگى شەكتەۋلى جاندارعا ارنالعان سپورت كەشەنىنىڭ قۇرىلىسى باستالدى. بۇگىندە جالپى اۋماعى 4,6 مىڭ شارشى مەتردى قۇرايتىن ەكى قاباتتى عيماراتتىڭ ىرگەتاسىن قالاۋ جۇمىستارى باستالىپ كەتتى. سپورت كەشەنىندە سپورتتىق، جاتتىعۋ زالدارىنان بولەك الاڭى 400 شارشى مەتر بولاتىن باسسەين بار.
وبلىس اكىمى بۇل كۇنى اۋە قالاشىعى اۋدانىنداعى جاڭا قازاندىقتى دا قاراپ شىقتى. نىسان ءالى اياقتالماعان. وسىعان وراي ءوڭىر باسشىسى بۇل باعىتتاعى جۇمىستاردى جەلتوقسان ايىنا دەيىن پايدالانۋعا بەرۋدى تاپسىردى.
سونداي-اق وڭداسىن ورازالين ناريمانوۆ كوشەسى بويىنداعى كولىك قوياتىن جەرلەردى ىڭعايلاستىرۋ جۇمىستارىنىڭ بارىسىمەن دە تانىستى.
اتالمىش جوبانى جۇزەگە اسىرۋ كولىك قويۋدى رەتتەۋگە جانە كولىكتەر وتەتىن جەردە قاۋىپسىزدىك قوزعالىسىن قامتاماسىز ەتۋگە مۇمكىندىك بەرەدى. جۇمىستاردىڭ بارلىعى وسى اپتادا اياقتالادى.
"ادىرنا" ۇلتتىق پورتالى.
