اتىراۋدا قاتىگەز انا 4 ايلىق بالاسىن 38 جەردەن پىشاقتاعان

5917
Adyrna.kz Telegram

اتىراۋدا ءتورت ايلىق بالاسىن پىشاقتاپ ولتىرگەن بەزبۇيرەك انا سوت الدىندا جاۋاپ بەرە باستادى. سوت ساراپتامالىق زەرتتەۋ ناتيجەسىندە قاتىگەز كەلىنشەك ءسابيىن 38 جەردەن پىشاقتاعانى انىقتالدى، دەپ حابارلايدى “ادىرنا” ۇلتتىق پورتالى  كتك جاڭالىقتارىنا سىلتەمە جاساپ.

ال كۇدىكتىنىڭ كۇيەۋى: «ايەلىم بوسانعان سوڭ پسيحيكالىق اۋىتقۋ بايقالدى» دەيدى. ءتىپتى ءسابيى جىلاعان كەزدە كوزىنە ەلەس كورىنەتىنىن ءجيى ايتقان. ايەلىن ەمشىگە كورسەتكەنىمەن، دەرتىنە داۋا تاپپاپتى.

"نارەستەنىڭ ءولىمى جۇرەك قابىعىن جاراقاتتاۋىمەن، وڭ جاق قابىقشاسىن جارىپ وتكەن. كەۋدەسىن تەسىپ وتكەن. ءولىم – تۇيرەپ تەسىلگەن جاراقات سالدارىنان، جۇرەكتىڭ قانسىراۋىنان بولعانى انىقتالدى", - دەيدى  پروكۋرور نۇربولات ءابىلوۆ.

بەس اي بويى تەرگەلگەن كۇدىكتى بۇگىنگى سوت وتىرىسىنا قاتىسا المادى.  ويتكەنى 42 جاستاعى ايەل پسيحولوگيالىق ديسپانسەردە قاتاڭ باقىلاۋدا جاتىر. ونداعى ماماندار ايەلدىڭ دياگنوزىن سوت وتىرىسى اياقتالعانشا ايتۋى ءتيىس.

دارىگەرلەر وسى كۇنگە دەيىن ناۋقاستىڭ باۋىر ەتى – بالاسىن ىزدەپ نەمەسە وتكەن ىسكە وكىنگەن ارەكەتىن بايقاماعان. «بىراق جاعدايى ازىرگە تۇراقتى» - دەيدى اق حالاتتىلار.

ءساۋىر ايىندا كوپتوعاي اۋىلىنىڭ تۇرعىنى ءتورت ايلىق ءسابيىن ۇيىندە پىشاقتاپ ولتىرگەن. ول جولداسى اۋدان ورتالىعىنا كەتكەندە وسىنداي قىلمىسقا بارىپتى.

"قازىر ول ايەل سوت شەشىمىمەن تامىزدىڭ 20-سىنان بەرى بىزدە ەمدەلۋدە. ونىڭ دياگنوزى ازىرگە دارىگەرلىك قۇپيا بولىپ سانالعاندىقتان، ايتا المايمىن. بىراق جۇيكە-جۇيەسىندە اۋىتقۋ بارى جاسىرىن ەمەس. سوت شەشىمى شىقسا، ناۋقاس ايەلدى الماتىعا ەمگە جىبەرۋىمىز مۇمكىن. ازىرگە باقىلاۋدا ۇستاپ وتىرمىز", - دەيدى اتىراۋ وبلىسى پسيحيكالىق دەنساۋلىق ورتالىعى ديرەكتورىنىڭ ورىنباسارى دامير قوجامتاەۆ.

پىكىرلەر