قازاقستان مۇسىلماندار ءدىني باسقارماسىنا قارىستى عۇلامالار كەڭەسى "فورەكس" نارىعىندا ساۋدا جاساپ، تابىس تابۋعا تىيىم سالدى. سونداي-اق، شاريعات نەگىزدەرىنە سۇيەنگەن عالىمدار سوڭعى كەزدەرى قوعامدى تولعاندىرعان تۇيتكىلدى ماسەلەلەردى تالقىلاپ، بىرقاتار جاڭا ءپاتۋا شىعاردى دەپ حابارلايدى "ادىرنا" ۇلتتىق پورتالى "31 ارناعا" سىلتەمە جاساپ.
بيىل ءحححى رەت وتكىزىلگەن عۇلامالار كەڭەسىندە ەلدى تولعانتقان ەڭ وزەكتى ماسەلەلەر جان-جاقتى تالقىلانىپ، بىرقاتار جاڭا ءپاتۋا قابىلداندى.
شاريعات نەگىزدەرىنە سۇيەنگەن عالىمدار سوڭعى كەزدەرى قوعامدى تولعاندىرعان تۇيتكىلدى ماسەلەلەردى تالقىلاپ، بىرقاتار جاڭا ءپاتۋا شىعاردى. مىسالى، كوپتەگەن جاستاردى "ونلاين نەكە قيۋ" ماسەلەسى قىزىقتىرعان. ءدىن قىزمەتكەرلەرى كۇيەۋ جىگىت پەن قالىڭدىق جانە كۋاگەرلەر ءبىر جەردە وتىرماسا نەمەسە سويلەگەن سوزدەرى ەستىلمەسە نەكە قيۋعا رۇقسات جوق دەپ شەشكەن. بىراق بەلگىلى ءبىر سەبەپتەرمەن نەكە قياتىن يمام باسقا جەردە، ال قالعاندارى ءبىر شاڭىراق استىندا بولسا رۇقسات ەتىلەدى ەكەن.
ال "گيۆ" ويناتقاندا پاراقشاعا تىركەلۋشىلەر تاراپىنان كىرۋ جارناسى الىنسا نە ءبىر زاتتى ساتىپ الۋ شارتى قويىلسا كونكۋرسقا قاتىسۋعا بولمايدى. ياعني، تىيىم سالىنادى. ەگەر تىركەلۋشىلەردەن جارنا الىنباي، ۇتىس دەمەۋشىلەر تاراپىنان قويىلسا قاتىسۋعا رۇقسات.
الەۋمەتتىك جەلىدە بىرنەشە رەت "گيۆ" ۇيىمداستىرعان اقمارال ەلشىنباي كوپ جاعدايدا ويىنعا تىگىلگەن ۇتىستار دەمەۋشىلەر جاعىنان بولادى دەدى. تيىسىنشە، عالىمدار ايتقان ەرەجە دە بۇزىلمايدى ەكەن.
"قاتىساتىن قاراپايىم حالىقتان ەشقانداي اقشا المايمىز. ولاردان تەك قانا وزىمىزدەن جانە دەمەۋشىلەردەن بولاتىن قاراجاتقا سىيلىعىمىزدى الامىز دا سول سىيلىقتى تەگىن تاراتىپ بەرەتىن بولامىز", – دەدى بلوگەر اقمارال ەلشىن.
كەڭەستە قارالعان تاعى ءبىر ماسەلە تۇرمىس قۇرعان ايەلدىڭ تەگىن اۋىستىرۋى. عالىمدار تالقىلاي كەلە "اركىم ءوز اكەسىنىڭ اتىمەن اتالۋى كەرەك. اكەسىنىڭ اتىن وزگەرتۋ حارام" دەپ ۇكىم شىعارىپتى. ءارى تۇرمىسقا شىققان ايەل دە ءوز تەگىندە قالعانى دۇرىس، ال جارىنىڭ تەگىنە ءوتۋ-وتپەۋى ءوز ەركىندە دەدى. بىراق ەر ادامعا زايىبىن تەگىنە وتۋگە مىندەتتەۋگە بولمايدى.
سونداي-اق، زامان تالابىنا ساي عىلىم مەن تەحنولوگيانى پايدالانا وتىرىپ جاڭبىر جاۋدىرۋ - شاريعاتقا قايشى ەمەس دەپ تانىلعان. باستىسى قورشاعان ورتاعا زيانى كەلمەسە بولعانى.
“ونىڭ ماڭىزدىلىعىن، ونىڭ وزەكتىلىگىن وعان قاتىستى ءبىزدىڭ حانافي مازحابىندا جانە دە بۇرىنعى كلاسسيكالىق ەڭبەكتەردە جانە كەيىنگى عالىمداردىڭ وعان قاتىستى تۇجىرىمدارى قانداي سوعان توقتالا وتىرىپ، بۇگىنگى قوعامعا، جاستارعا، حالىققا ۇعىنىقتى، تۇسىنىكتى تىلدە وسىلايشا ءپاتۋا شىعارىلادى”، – دەدى قمدب ۋاعىز-ناسيحات ءبولىمىنىڭ مەڭگەرۋشىسى باتىرجان مانسۇروۆ.
ءدىن قىزمەتكەرلەرى جەرلەنگەن ءمايىتتى ەشبىر سەبەپسىز قايتا قازىپ الىپ، ەكىنشى ءبىر جەرگە كوشىرىپ جەرلەۋگە شاريعات تىيىم سالاتىنىن ايتادى. ال مارقۇمنىڭ زيراتىنان توپىراق الىپ، باسقا جەرگە اپارىپ قابىر جاساۋ دۇرىس ەمەس. سەبەبى ول قابىر بولىپ سانالمايدى ەكەن.
"ادىرنا" ۇلتتىق پورتالى.
