ەلىمىزدە دارىندى دا زەرەك بالالاردىڭ قاتارى جىل سايىن ارتىپ كەلەدى. زامانداستارىنان وق بويى وزىق تۇراتىن سونداي جاستاردىڭ ءبىرى – مۇقاتوۆ قاجىمۇقان امانبەكۇلى. اتىراۋ وبلىسى, يندەر اۋدانىنا قاراستى ساكەن سەيفۋللين اتىنداعى ورتا مەكتەبىنىڭ 8-سىنىپ وقۋشىسى تامشىلاتا سۋارۋ قوندىرعىسىن ويلاپ تاپقان.
ونىڭ ونەرتابىسى سۋدى جانە مينەرالدى تىڭايتقىشتاردى ۇنەمدەۋگە مۇمكىندىك بەرەدى.
«باستى نازارىمدى تىڭايتقىشتاردى ۇنەمدەۋ مەن سۋدىڭ وسىمدىك تامىرىنا تىكەلەي بارۋىنا اۋداردىم. ويىمدى جۇزەگە اسىراتىن بولسام، ونىمدىلىكتى ارتتىراتىنىمدى ءتۇسىندىم. تامشىلاتىپ سۋارۋ ءادىسىنىڭ ارتىقشىلىقتارىن الەم ەلدەرى جاقسى بىلەدى. بۇل تەحنولوگيانىڭ قازاقستاندا دا دامىعانىن قالايمىن. اتىراۋ ءوڭىرىنىڭ تۋماسى بولعاندىقتان، جايىق وزەنىنىڭ تارتىلىپ بارا جاتقانىن ءوز كوزىممەن كورىپ ءجۇرمىن. وسى قوندىرعىنى پايدالانىپ، وزەن اڭعارىنىڭ ەكوجۇيەسىن ساقتاپ قالعىم كەلەدى»,– دەدى ول تىلشىمىزگە بەرگەن سۇقباتىندا.
اڭگىمە بارىسىندا دارىندى وقۋشى قوندىرعىنى ىسكە اسىرۋعا مۇعالىمىنىڭ كومەتەسكەنىن اتاپ ءوتتى.
قاجىمۇقان مۇقاتوۆ: يندەر اۋداندىق ءبىلىم ءبولىمىنىڭ وقۋشىلار شىعارماشىلىق ورتالىعىنداعى «شەبەر» ۇيىرمەسىنە 2017-2018 وقۋ جىلىنان باستاپ قاتىسامىن. ۇستازىم – وتەپقالي ناسىپقالي زينەلعابيدەنۇلى. ول كىسى يدەيامدى جۇزەگە اسىرۋعا كومەكتەسىپ، باعىت-باعدار بەردى. وسىلايشا قوندىرعىنى ويلاپ تاپتىق.
ۇيىرمە جەتەكشىسىنىڭ ايتۋىنشا، قاجىمۇقان – وتە سابىرلى, اڭعارىمپاز بالا.
«قاجىمۇقان امانبەكۇلى مۇمكىندىگى شەكتەۋلى بولعانىنا قاراماستان، ۇنەمى ىزدەنىستە جۇرەدى. اۋداندىق، وبلىستىق رەسپۋبليكالىق جارىستارعا قاتىسىپ، جۇلدەگەر اتانىپ ۇلگەردى. مەن تالانتتى شاكىرتىممەن ماقتانامىن»,— دەدى وتەپقالي زينەلعابيدەنۇلى.
سۇقبات سوڭىندا جاس ونەرتاپقىش بولاشاقتاعى ارمانىمەن ءبولىستى.
«جەكە كاسىپكەر بولعىم كەلەدى. اقشام كوپ بولسا، مۇمكىندىگى شەكتەۋلى بالالارعا كومەكتەسەر ەدىم»،— دەپ ءسوزىن قورىتىندىلادى ول.
ديانا اسان،
«ادىرنا» ۇلتتىق پورتالى
