Atyraýlyq jas ónertapqysh: Múmkindigi shekteýli jandarǵa kómekteskim keledi

3021
Adyrna.kz Telegram

Elimizde daryndy da zerek balalardyń qatary jyl saıyn artyp keledi. Zamandastarynan oq boıy ozyq turatyn sondaı jastardyń biri – Muqatov Qajymuqan Amanbekuly. Atyraý oblysy, Inder aýdanyna qarasty Sáken Seıfýllın atyndaǵy orta mektebiniń 8-synyp oqýshysy tamshylata sýarý qondyrǵysyn oılap tapqan.

Onyń ónertabysy sýdy jáne mıneraldy tyńaıtqyshtardy únemdeýge múmkindik beredi.

«Basty nazarymdy tyńaıtqyshtardy únemdeý men sýdyń ósimdik tamyryna tikeleı barýyna aýdardym. Oıymdy júzege asyratyn bolsam, ónimdilikti arttyratynymdy túsindim. Tamshylatyp sýarý ádisiniń artyqshylyqtaryn álem elderi jaqsy biledi. Bul tehnologııanyń Qazaqstanda da damyǵanyn qalaımyn. Atyraý óńiriniń týmasy bolǵandyqtan, Jaıyq ózeniniń tartylyp bara jatqanyn óz kózimmen kórip júrmin. Osy qondyrǵyny paıdalanyp, ózen ańǵarynyń ekojúıesin saqtap qalǵym keledi»,– dedi ol tilshimizge bergen suqbatynda.

Áńgime barysynda daryndy oqýshy qondyrǵyny iske asyrýǵa muǵaliminiń kómeteskenin atap ótti.

Qajymuqan Muqatov: Inder aýdandyq bilim bóliminiń oqýshylar shyǵarmashylyq ortalyǵyndaǵy «Sheber» úıirmesine 2017-2018 oqý jylynan bastap qatysamyn.  Ustazym – Ótepqalı Násipqalı Zınelǵabıdenuly. Ol kisi ıdeıamdy júzege asyrýǵa kómektesip, baǵyt-baǵdar berdi. Osylaısha qondyrǵyny oılap taptyq.

Úıirme jetekshisiniń aıtýynsha, Qajymuqan – óte sabyrly, ańǵarympaz bala.

«Qajymuqan Amanbekuly múmkindigi shekteýli bolǵanyna qaramastan, únemi izdeniste júredi. Aýdandyq, oblystyq respýblıkalyq jarystarǵa qatysyp, júldeger atanyp úlgerdi. Men talantty shákirtimmen maqtanamyn»,— dedi Ótepqalı Zınelǵabıdenuly.

Suqbat sońynda jas ónertapqysh bolashaqtaǵy armanymen bólisti.

«Jeke kásipker bolǵym keledi. Aqsham kóp bolsa,  múmkindigi shekteýli balalarǵa kómekteser edim»,— dep sózin qorytyndylady ol.

Dıana ASAN,

«Adyrna» ulttyq portaly

Pikirler