الماتى وبلىسىنداعى ءوندىرىس ورنىندا 1 ميلليون دوزاعا دەيىن ۆاكتسينانى قۇتىعا قۇيا الادى

595

ەل پرەزيدەنتى قاسىم-جومارت توقاەۆتىڭ تاپسىرماسى بويىنشا وتاندىق QazVac ۆاكتسيناسى ازىرلەندى. ونەركاسىپتىك ءوندىرىستى ۇيىمداستىرۋ ماقساتىندا پرەمەر-مينيستر اسقار مامين وتكەن جىلدىڭ 12-ءشى ماۋسىمىندا بيولوگيالىق قاۋىپسىزدىك ماسەلەلەرى عىلىمي-زەرتتەۋ ينستيتۋتى بازاسىندا بيوفارماتسەۆتيكالىق زاۋىتتىڭ قۇرىلىسىن باستادى.

"بيولوگيالىق قاۋىپسىزدىك پروبلەمالارى عزي-مەن قاتار الماتى وبلىسى قاراساي اۋدانى اباي اۋىلىنداعى "انتيگەن" جشس بازاسىنداعى ۆاكتسينانى قۇيۋ بويىنشا وندىرىستىك الاڭدى دايىنداۋ باستالدى. "انتيگەن" جشس - دە الماتى وبلىسى اكىمدىگىنىڭ "جەتىسۋ" اكك ارقىلى جالپى سوماسى 420 ملن.تەڭگەدەن استام ليزينگكە 13 بىرلىك زاماناۋي تەحنولوگيالىق جابدىق ساتىپ الىندى", - دەپ ءبولىستى الماتى وبلىسى اكىمىنىڭ ورىنباسارى باتىرجان بايجۇمانوۆ.
مۇنداعى ءوندىرىس جەلىسى اسەپتيكالىق ءوندىرىستىڭ بارلىق تالاپتارى مەن سانيتارلىق نورمالارىنا سايكەس كەلەدى.
"يتالياندىق اپپارات ۆاكتسينانى ءبىر مينۋت ىشىندە 60 قۇتىعا قۇيۋى مۇمكىن. ءار قۇتىدا 3 دوزا. ءبىر ايدا ول 1 ميلليون دوزاعا دەيىن تولتىرىلۋى ىقتيمال. قۇتىعا قۇيىلۋعا دەيىنگى دايىندىقتى اعىمداعى جىلدىڭ ءساۋىر ايىنان باستادىق. ال شىلدە ايىنان باستاپ 300 مىڭ دوزا توگىلدى. بۇل ۆاليداتسيالىق سەريا. جابدىقتى جانە بۇكىل پروتسەستى تەكسەرۋگە ارنالعان. بۇگىنگى كۇنى الىنعان ۆاكتسينانىڭ 300 مىڭ دوزاسى بيولوگيالىق قاۋىپسىزدىك پروبلەمالارى عىلىمي-زەرتتەۋ ينستيتۋتىندا جاتىر. زەرتتەۋلەر اياقتالۋعا جاقىن. "انتيگەن" جشس-دەگى ۆاكتسينالار تولىق ءساتتى تەكسەرۋدەن كەيىن عانا قولدانىلاتىنىن اتاپ وتكەن ءجون", - دەدى "انتيگەن" ۇكپ ديرەكتورى نۇرلان احمەتسادىقوۆ.
ديرەكتوردىڭ ايتۋىنشا، بارلىق جابدىقتار ەۋروپادان، امەريكا مەن قىتايدان اكەلىنگەن. وسىلايشا، حالىقارالىق ساپا ستاندارتتارى كومپانياعا جوعارى تەحنيكالىق دەڭگەيگە، ءوندىرىستىڭ بارلىق كەزەڭىندە ساپاعا قول جەتكىزۋگە مۇمكىندىك بەرەدى.
"انتيگەن" ۇكپ جشس بيوفارماتسەۆتيكالىق زاۋىتپەن قاتار بيولوگيالىق قاۋىپسىزدىك ماسەلەلەرىنىڭ عىلىمي-زەرتتەۋ ينستيتۋتى بازاسىندا ەكىنشى وندىرىستىك الاڭعا اينالعانىن اتاپ وتەمىز.
بۇگىنگى كۇنى جوبانى ىسكە اسىرۋ قازاقستان رەسپۋبليكاسى ۇكىمەتىنىڭ باقىلاۋىندا ەكەنىن ەرەكشە اتاپ وتكەن ءجون.

پىكىرلەر
رەداكتسيا تاڭداۋى