جانتۇرشىگەرلىك جول اپاتى: ماڭعىستاۋ وبلىسىندا 5 ادام قازا تاپتى

1965
Adyrna.kz Telegram

ماڭعىستاۋ وبلىسىنداعى تاس جولدا جانتۇرشىگەرلىك جول اپاتى بولدى. اپات سالدارىنان بەس ادام قازا تاپتى، ونىڭ ىشىندە جۇكتى ايەل دە بار ، - دەپ حابارلايدى "ادىرنا" ۇلتتىق پورتالى"  وبلىستىق دەنساۋلىق ساقتاۋ باسقارماسىنىڭ ءباسپاسوز قىزمەتىنە سىلتەمە جاساپ.

- بيىلعى جىلدىڭ 16 قىركۇيەگىندە ساعات 01.48-دە Lexus LX 470 اۆتوكولىگى اۋدارىلدى. كولىك تىزگىنىندەگى 27 جاستاعى قىز، وقيعا ورنىندا قازا بولدى. قازا بولعانداردىڭ ەكىنشىسى 1966 جىلى تۋعان ايەل، ءۇشىنشىسى جاڭاوزەن قالاسىنىڭ 31 جاستاعى تۇرعىنى، ايەل جۇكتىلىكتىڭ 27-ءشى اپتاسىندا بولعان. قالعاندارى 1964 جانە 1967 جىلدارى تۋعان ەكى ەر ادام. جول-كولىك وقيعاسى سالدارىنان بارلىعى توعىز ادام زارداپ شەكتى. بەس ەرەسەك وقيعا ورنىندا قازا بولدى. قالعان ءتورت بالا ءتۇرلى جاراقاتتار العان، - دەلىنگەن حابارلامادا.

مالىمەت بويىنشا، 2011, 2012 جانە 2019 جىلدارى تۋىلعان ءۇش بالا جەدەل جاردەم كۇتپەستەن جەتىباي اۋداندىق اۋرۋحاناسىنا جەتكىزىلدى.

- 2013 جىلى تۋىلعان بالانى تۇندە جەدەل جاردەم كۇتپەي ماشينامەن ماڭعىستاۋ وبلىستىق كوپبەيىندى بالالار اۋرۋحاناسىنا جاتقىزدى. قازىرگى ۋاقىتتا بالا جانساقتاۋ بولىمىندە جاتىر. ونىڭ جاعدايى وتە اۋىر. ميدىڭ گەمورراگيالىق كونتۋزياسىن، ءىى دارەجەلى مي كوماسىن، ءىى دارەجەلى تراۆماتيكالىق شوك الدى. ءوجج اپپاراتىنا قوسىلعان،-دەپ تولىقتىردى ءباسپاسوز قىزمەتى.

زارداپ شەككەندەرگە ميدىڭ جابىق جاراقاتى، ميدىڭ كونتۋزياسى، ماڭداي مەن شىنتاق بۋىنىنىڭ جاراقاتتانۋى، راديۋستىڭ جابىق سىنۋى، تراۆماتيكالىق شوك دياگنوزى قويىلدى. دارىگەرلەر ەكى بالانىڭ جاعدايىن تۇراقتى اۋىر، ءۇشىنشىسى ورتاشا اۋىر ەكەنىن ايتتى. دەنساۋلىق ساقتاۋ باسقارماسىنىڭ حابارلاۋىنشا، بۇگىن سانيتارلىق كولىكتىڭ كومەگىمەن ءۇش بالانى وبلىستىق بالالار اۋرۋحاناسىنا اۋىستىرادى.

"ادىرنا" ۇلتتىق پورتالى

پىكىرلەر