شىمشاھارداعى ءبىلىم بەرۋ مەكەمەلەرىندە ەل تاۋەلسىزدىگىنىڭ 30 جىلدىعىنا ارنالعان «تاۋەلسىزدىك جەتىستىكتەرى» تاقىرىبىندا اشىق ساباقتار جالعاسۋدا. شىمكەنت قالاسى حيميا-بيولوگيا باعىتىنداعى نازارباەۆ زياتكەرلىك مەكتەبىندەگى وقۋشىلار اراسىندا دا تاۋەلسىزدىك ۇعىمى ناسيحاتتالىپ، ونىڭ تاريحي العىشارتتارى مەن ساياسي كورىنىسى ءتۇسىندىرىلدى.
مەكتەپ ديرەكتورى كايىربەك ءسابيتۇلىنىڭ ايتۋىنشا، قىركۇيەك ايىنا جوسپارلانعان «تاۋەلسىزدىك جەتىستىكتەرى» تاقىرىبىنداعى اشىق ساباقتى قىتايلىق ارىپتەستەرىمەن دە ونلاين وتكىزبەك. بۇل تاربيە ساعاتى «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ «قازىرگى الەمدەگى قازاقستان» اۆتورلىق باعدارلاماسى نەگىزىندە ازىرلەنگەن.
بۇگىنگى ءىس-شارانى قالاداعى جەتەكشى 30 مەكتەپتىڭ 900 وقۋشىسى حيميا-بيولوگيا باعىتىنداعى نازارباەۆ زياتكەرلىك مەكتەبىنىڭ youtube-تاعى ارناسى ارقىلى تىكەلەي ترانسلياتسيادا تاماشالادى. ساباق بارىسىندا 1991 جىلدان باستاپ بۇگىنگى كۇنگە دەيىنگى ماڭىزدى حرونولوگيالىق كەزەڭدەر ءتۇسىندىرىلدى.
– جوبانىڭ باستى ماقساتى – وقۋشىلارعا تاۋەلسىزدىكتىڭ 30 جىلدىق مەرەيتويىنىڭ ماڭىزدىلىعىن جانە قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ تاۋەلسىز مەملەكەتتىڭ قالىپتاسۋى مەن دامۋىنداعى ەڭبەگىن جەتكىزۋ. نازارباەۆ زياتكەرلىك مەكتەپتەرى – تاۋەلسىزدىك تارتۋ ەتكەن ءتاتتى سىي. مۇندا قانشاما بالانىڭ ارمان-قيالى شىندىققا اينالىپ، بيىك شىڭداردى باعىندىرۋدا. بيىل مەكتەبىمىزدە قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ «وركەن» ءبىلىم گرانتىن 145 ۇمىتكەر يەلەنىپ، 7-سىنىپقا وقۋعا قابىلداندى. وزىق ويلى شاكىرتتەرىمىزدىڭ جارقىن جەتىستىكتەرىمەن الداعى جىلدارى ەلەمىزدىڭ بارلىق سالاسى داميدى دەگەن ۇمىتتەمىز، - دەيدى كايىربەك بۋكسۋكباەۆ.
اشىق ساباققا قاتىسقان قاراتاۋ اۋدانى اكىمىنىڭ ورىنباسارى ەرلان بەكنازاروۆ قازاقستاننىڭ ەكونوميكالىق دامۋى، ەل تاۋەلسىزدىگىنىڭ ءرولى مەن حالىقارالىق ارەناداعى جەتىستىكتەرى تۋرالى وقۋشىلارعا ءوز ويىن ايتسا، ايتىسكەر اقىن ابىلاي قۇلتاي تاۋەلسىزدىكتىڭ قۇرداسى ەكەنىن قارا ولەڭمەن جەتكىزدى.
ازامات جاپپار
