كوپشىلىكتىڭ كوكەيىنە كۇمان ۇيالاتپاساق

681

سوڭعى كەزدەرى بۇقارالىق اقپارات قۇرالدارى مەن الەۋمەتتىك جەلىدە ءدىن قىزمەتكەرلەرىنە قاتىستى، ونىڭ ءدىني ءبىلىمى جايلى نەگىزسىز ايىپتاۋلار مەن ورىنسىز سىن جازبالار ءجيى جاريالانىپ، مۇسىلمان قاۋىمى اراسىندا تۇسىنبەۋشىلىك تۋدىرۋدا. ەڭ وكىنىشتىسى، وسى باعىتتا جازىلعان ماقالالار مەن جازبالارعا پىكىر قالدىرعان الەۋمەتتىك جەلى قولدانۋشىلارى قوعامدا يسلام، مەشىت تۋرالى جاعىمسىز پىكىر قالىپتاستىرىپ جاتقانىن بايقاماۋدا.

حالقىمىز: «ادام بىلمەگەننىڭ جاۋى»، – دەگەندەي، يسلام ءدىنى تۋرالى تولىق كوزقاراسى قالىپتاسپاعان، مەشىت جۇمىسىنان حابارسىز كەيبىر اعا-باۋىرلارىمىز بەن اپكە-قارىنداستارىمىز قاسيەتتى ءدىنىمىز جايلى جاعىمسىز پىكىرىن اشىق ايتىپ، وزگەلەردىڭ كوكەيىنە كۇمان ۇيالاتۋدا.

بۇقارالىق اقپارات قۇرالدارى قىزمەتكەرلەرى مەن الەۋمەتتىك جەلى قولدانۋشىلارى يسلام تۋرالى، سونىمەن قاتار ەلىمىزدەگى كۇللى ءيسى مۇسىلمان قاۋىمىنىڭ قاراشاڭىراعى – قازاقستان مۇسىلماندارى ءدىني باسقارماسى جايلى تەرىس اقپارات تاراتۋ ارقىلى ءوزىنىڭ ارى مەن نامىسىن، ءدىني سەنىمى مەن اسىل ءدىنىن قورلاپ جاتقانىن تۇسىنسە ەكەن دەپ ويلايسىڭ.

وسى رەتتە 2006 جىلى ەلىمىزدە وتكىزىلگەن الەمدىك جانە ءداستۇرلى ءدىن كوشباسشىلارىنىڭ كەزەكتى سەزىندە بۇقارالىق اقپارات قۇرالدارى وكىلدەرىنە قاراتا ايتىلعان ەلباسىنىڭ مىنا ءسوزى ەرىكسىز ەسكە تۇسەدى: «بۇقارالىق اقپارات قۇرالدارى باسقا دىندەگىلەردىڭ قاسيەتتى سەزىمدەرىن قورلاۋدى ۇشىندىرا تۇسسە، وندا بۇل جۋرناليستەردىڭ ەرتە مە، كەش پە ءوز نانىمدارىنىڭ قورلانۋىمەن بەتپە-بەت كەلەتىنى ايقىن. بىرەۋ ءۇشىن قاسيەتتى نارسە باسقا بىرەۋ ءۇشىن ءازىل نەمەسە كەلەمەج تاقىرىبى بولماۋى كەرەك. بۇل قاراپايىم قاعيدانى، وكىنىشكە قاراي، جۋرناليستەر مەن ساياساتشىلار ءجيى بۇزادى».

شاريعاتىمىز ءار مۇسىلماننان دۇرىس سويلەۋدى نەمەسە ۇندەمەۋدى تالاپ ەتەدى. سوڭعى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە-كىم اللا تاعالاعا جانە اقىرەت كۇنىنە يمان كەلتىرسە، جاقسى ءسوز سويلەسىن نەمەسە ۇندەمەسىن», – دەپ ەسكەرتكەن.

ءجۇسىپ حاس قاجىب بالاساعۇني بابامىز ءبىر ولەڭىندە:

«قادىرلىسى – تىلىنە ۇيات سىڭگەندەر،

جۇرەك ءسوزىن جۇرەگىمەن بىلگەندەر.

تۋرا سوزگە كەلگەندە ءتىل تارتپاعىن،

قىڭىر ءسوزدى جاسىر، تەككە لاقپاعىن», – دەپ جىرلايدى.

قازىر اقپاراتتىڭ زامانى. ءبىز كۇنىنە قانشاما اقپارات الامىز. الايدا سول اقپاراتتاردى وي سۇزگىسىنەن وتكىزە بەرمەيمىز. ءتىپتى، كورمەگەن نەمەسە دالەلدەنبەگەن اقپاراتتى بىرەۋگە جىبەرە سالامىز. بۇل ىسىمىزگە قاتىستى قۇراننىڭ ايتار ۇكىمى بار: «ءاي مۇمىندەر! پاسىق بىرەۋ حابار اكەلسە، ونى انىقتاڭدار. ايتپەسە، بىلمەي ءبىر ەلگە كەسىرلەرىڭ ءتيىپ، ىستەگەندەرىڭە وكىنەسىڭدەر» («حۋجۋرات» سۇرەسى، 6-ايات).

بۇقارالىق اقپارات قۇرالدارى مەن الەۋمەتتىك جەلىلەردە ورىن الىپ جاتقان تاعى ءبىر جاعىمسىز جايتتىڭ ءبىرى – كۇماندى نارسەنى شىن ەتىپ كورسەتىپ، وقىرماننىڭ ويىن ودان سايىن كۇمانعا يتەرمەلەۋ. يسلام ءدىنى جالا جابىلعان ادام جايلى جامان وي ويلاۋدان ساقتانۋعا شاقىرادى. وزگەنىڭ سىرتىنان ەشبىر دالەلسىز ايتىلعان سوزدەر ارقىلى الدە بىرەۋ جايلى جامان وي ويلاۋعا، كۇماندانۋعا، ونى جەك كورۋگە بولمايدى. قۇراندا ايشا انامىزعا  جابىلعان جالادان كەيىنگى تۇسكەن اياتتا: «ەگەر ونى ەستىگەن ساتتە: «بۇنى ءبىزدىڭ ايتۋىمىزعا بولمايدى. اللا ساقتاسىن. بۇل ءبىر ءىرى جالا» دەگەن بولساڭدار ەدى» («نۇر» سۇرەسى، 12-ايات), – دەلىنەدى.

ىزگى عۇلامانىڭ ءبىرى: «ەگەر قانداي دا ءبىر مۇسىلماننىڭ جامان ءىسى تۋرالى حابار ەستىسەڭ، وعان جەتپىس ءتۇرلى اقتاۋ ىزدە. ەگەر جەتپىس ءتۇرلى اقتاۋدى قابىلداي الماساڭ «ءاي، مەنىڭ جۇرەگىم! نە دەگەن قاتتى جۇرەك ەدىڭ» دەپ ءوزىڭنىڭ جۇرەگىڭدى ايىپتا» دەگەن ەكەن. جاراتۋشى جاببار يەمىز قۇراندا كۇللى ادامزات بالاسىن جامان ويدان ساقتاندىرىپ، بىلاي دەگەن: «ءاي، مۇمىندەر! كۇماننىڭ كوبىنەن ساقتانىڭدار. ويتكەنى، كۇماننىڭ كەيبىرى كۇنا. سىر تەكسەرمەڭدەر، بىرەۋدى-بىرەۋ عايباتتاماسىن. بىرەۋلەرىڭ ولگەن تۋىسىنىڭ ەتىن جەۋدى جاقسى كورە مە؟ ارينە ونى جەك كورەسىڭدەر. راسىندا اللا تاۋبەنى تىم قابىل ەتۋشى، ەرەكشە مەيىرىمدى».

اقپارات قۇرالدارىندا جازىلعان ماقالالاردىڭ مازمۇنىنا قاراساق، اۆتور قازىرگى يمامداردىڭ بىلىمىنە كۇمان كەلتىرەدى. اللاعا شۇكىر، ءدىن قىزمەتكەرلەرىنىڭ ءبىلىمى مەن تاجىريبەسى جىلدان جىلعا شىڭدالىپ كەلەدى. يمامدارىمىز مىسىر، تۇركيا ەلدەرىنەن ءبىلىم جەتىلدىرىپ، تاجىريبە جيناقتاۋدا. ولاردىڭ قاتارىندا مەن دە بارمىن. راس، ءدىني سالاعا ءالى دە جوعارى ءبىلىمدى عالىمدار مەن تاجىريبەلى ءدىن قىزمەتكەرلەرى قاجەت. بۇل ماسەلە قازاقستان مۇسىلماندارى ءدىني باسقارماسىنىڭ ستراتەگيادىق جوسپارىنا سايكەس، كەزەڭ كەزەڭىمەن ءوز شەشىمىن تاۋاپ كەلەدى. ەندىگى ماقسات – بۇلىككە بوي الدىرماي، ساۋاپتى ىسكە قولدان كەلگەنشە ۇلەس قوسۋ.

باقداۋلەت قاجى نۇرماتۇلى،

شىمكەنت قالاسىنىڭ باس يمامى

 

 

پىكىرلەر
رەداكتسيا تاڭداۋى