تۇركىستان وبلىسىندا كۇدىكتى ەر ازامات ۋچاسكەلىك ينسپەكتورگە پىشاق جاراقاتىن سالدى. بۇل تۋرالى وبلىستىق پد ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
سارىاعاشتىق ۋچاسكەلىك پوليتسەيلەردىڭ ءبىرى پوليتسيا كاپيتانى اسقار ۋاليەۆ ءوز اۋماعىنىڭ تۇرعىنى، ەسىرتكى بويىنشا كۇدىكتى دەپ تانىلعان ەر ازاماتتى سوتقا دەيىنگى تەرگەۋگە شاقىرۋ كەزىندە جاراقاتتانعان.
«ناقتىراق ايتار بولساق، سارىاعاش اپب-نىڭ ساقشىلارىمەن ارنايى رەيد جۇرگىزۋ كەزىندە ءجۇرىسى كۇدىك تۋدىرعان جاياۋ جۇرگىنشى انىقتالىپ، اڭگىمەگە تارتىلدى. قۇجاتتارى تەكسەرىلدى. تەكسەرۋ بارىسىندا كۇدىك تۋدىرعان جاياۋ جۇرگىنشىدەن ەسىرتكى زاتى انىقتالدى. ەسىرتكى ساراپتاماعا جولدانىپ، قورىتىندىسى بويىنشا «كەپتىرىلگەن ماريحۋانا» بولىپ شىقتى. وسىدان سوڭ اۋداننىڭ ءتارتىپ ساقشىلارى ەر ازاماتقا قاتىستى قر قك-ءنىڭ 296-بابىمەن «ەسىرتكى، پسيحوتروپتىق زاتتارمەن، سول تەكتەستەرمەن وتكىزۋ ماقساتىنسىز زاڭسىز جۇمىس ىستەۋ» سوتقا دەيىنگى تەرگەۋ باستالادى. كۇدىكتى تەرگەۋگە شاقىرىلادى. الايدا ەر ازاماتتىڭ كەشىگۋىنە بايلانىستى ۋچاسكەلىك پوليتسيا ينسپەكتورى پوليتسيا كاپيتانى اسقار ۋاليەۆ كۇدىكتىگە جولىعىپ، زاڭعا باعىنۋ قاجەتتىلىگىن تۇسىندىرەدى. وسى كەزدە كۇدىكتى ەر ازامات اسحانا پىشاعىن الىپ، كۇتپەگەن جەردەن پوليتسەيدىڭ اياعىنا سۇعىپ الادى. سودان سوڭ وقيعا ورنىنان قاشىپ كەتتى»،– دەلىنگەن حابارلامادا.
كۇدىكتى ەر ازامات ۇيىنەن ۇستالدى. ودان ايعاقتى زات رەتىندە «اسحانا پىشاعى» الىندى. بۇگىندە ەر ازامات قاماۋدا.
ۇستالعان ازاماتقا قاتىستى قر قك-ءنىڭ 296-بابىمەن بىرگە قر قك-ءنىڭ 380-1-بابى 1 بولىگىمەن «قۇقىق قورعاۋ ورگانى، ارناۋلى مەملەكەتتىك ورگان قىزمەتكەرىنىڭ ومىرىنە قولسۇعۋشىلىق» سوتقا دەيىنگى تەرگەۋ امالدارى جۇرگىزىلۋدە.
«ادىرنا» ۇلتتىق پورتالى
