وبلىس اكىمى ماحامبەت دوسمۇحامبەتوۆتىڭ توراعالىعىمەن جيىن وتكىزىلىپ، وڭىردەگى حالىق ساناعىنا قاتىستى جۇمىستار پىسىقتالدى.
بيىلعى ۇلتتىق ساناعى اعىمداعى جىلدىڭ 1 قىركۇيەگى مەن 15 قازان ارالىعىندا ينتەرنەت جەلىسى ارقىلى ونلاين رەجيمدە جانە 1-30 قازاندا پلانشەتتەردى قولدانا وتىرىپ، ارالاۋ ارقىلى وتكىزۋ جوسپارلانۋدا. قازىرگى تاڭدا بۇل جۇمىستار اياسىندا وبلىستا ارنايى كوميسسيا قۇرىلىپ، بەكىتىلگەن جوسپارعا سايكەس ءتيىستى جۇمىستار ۇيىمداستىرىلۋدا.
قر ستراتەگيالىق جوسپارلاۋ جانە رەفورمالار اگەنتتىگى ۇلتتىق ستاتيستيكا بيۋروسىنىڭ اتىراۋ وبلىسى بويىنشا دەپارتامەنتىنىڭ باسشىسى گاليا مۇحانعاليەۆانىڭ سوزىنشە، حالىق ساناعىنىڭ دايىندىق كەزەڭى وسى جىلدىڭ 1-30 ماۋسىم ارالىعىندا وتكىزىلگەن. بۇل جۇمىسقا وبلىس بويىنشا بارلىعى 170 ادام تارتىلعان. ولار تۇرعىن ۇيلەردىڭ، عيماراتتار مەن تۇرعىن ەمەس ءۇي-جايلاردىڭ ءتىزىمىن جاساقتاپ، تۇرعىنداردىڭ سانىن ناقتىلاعان.
«ۇلتتىق ستاتيستيكا بيۋروسىنىڭ «اۋدانداستىرۋ» اۆتوماتتاندىرىلعان جۇمىس ورنى اقپاراتتىق جۇيەسىنە وبلىس بويىنشا 176 389 وبەكت ەنگىزىلگەن بولاتىن. ارالاۋ جۇمىستارى قورىتىندىسىندا وبلىس بويىنشا 175 641 وبەكت انىقتالدى نەمەسە جوسپارلى وبەكتىلەردىڭ 99,6%-ى قامتىلدى. قاتە وبەكتىلەردىڭ سانى 2 178 بىرلىكتى قۇرادى.
اتىراۋ وبلىسى بويىنشا 149 نەگىزگى تىركەۋ ۋچاسكەلەرىنەن بولەك ارنايى ۇيىمداردا بارلىعى 139 وبەكت قالىپتاستىرىلدى. ولاردا تۇراقتى تۇراتىنداردىڭ سانى 2 877 ادامدى جانە 11 369 بىرلىك توسەك-ورىندى قۇرادى»،-دەدى ول. وسىلايشا انىقتالعان وبەكتىلەردەگى تۇرعىنداردىڭ سانى ارنايى ۇيىمداردا تۇراقتى تۇراتىنداردىڭ سانىن قوسا 664 493 ادامدى قامتىپ وتىر.
دەپارتامەنت باسشىسى دايىندىق كەزەڭىن وتكىزۋ كەزىندە تۋىنداعان پروبلەمالىق ماسەلەلەردى دە اتاپ ءوتتى. ياعني، ساناق پەرسونالىنىڭ جاۋاپسىزدىعى مەن نەمقۇرايلىعى، كوشە اتاۋلارى مەن ءۇي نومىرلەرى ىلىنگەن انشلاگتاردىڭ جوقتىعى قيىندىق تۋعىزعان. سونداي-اق، اتىراۋ وبلىسىنىڭ ساۋلەت جانە قالا قۇرىلىسى باسقارماسىمەن ۇسىنىلعان وبلىستىڭ ەلدى مەكەندەرىنىڭ سحەمالىق كارتالارىندا كەيبىر وبەكتىلەردىڭ بەلگىلەنبەۋى، كوپتەگەن ءۇي شارۋاشىلىقتارىنىڭ ساناقتان بەيحابار بولۋلارى دا جۇمىسقا كەرى اسەرىن تيگىزگەن.
سونىمەن قاتار، گاليا مۇحانعاليەۆا ۇلتتىق حالىق ساناعىنىڭ نەگىزگى كەزەڭىندە اتىراۋ وبلىسى بويىنشا 913 ادام ۋاقىتشا جۇمىسقا تارتىلاتىنىن، ونىڭ ىشىندە 114 نۇسقاۋشى-باقىلاۋشى جانە 799 ينتەرۆيۋەر بولاتىنىن مالىمدەدى.
ولارعا قويىلاتىن تالاپتار: قر ازاماتى بولۋى، جاسى 18-گە تولۋى، كومپيۋتەردە جۇمىس ىستەۋ قابىلەتى، كانديداتتار ۆاكتسيناتسيالاۋدان وتكەن بولۋى كەرەك. كاسىبي ءبىلىمى مەن جۇمىس ءوتىلى بويىنشا تالاپتار قويىلمايدى.
جيىندا وبلىس اكىمى ماحامبەت دوسمۇحامبەتوۆ اتالعان كەمشىلىكتەردى جويىپ، قالا، اۋدان اكىمدەرىنە حالىق ساناعىنا قولداۋ ءبىلدىرۋ قاجەتتىگىن باسا تاپسىردى.
سونداي-اق، ءوڭىر باسشىسى ينتەرۆيۋەرلەردى ۆاكتسيناتسيالاۋدان وتكىزۋدى، الەۋمەتتىك جەلىلەر مەن بۇقارالىق اقپارات قۇرالدارىندا تۇسىندىرمە ماتەريالدارىن ورنالاستىرۋدى تاپسىردى. سونىمەن قاتار، مامانداردىڭ قاۋىپسىزدىگىن قامتاماسىز ەتۋ ءۇشىن قاجەتتىلىك تۋىنداعان جاعدايدا ۋچاسكەلىك پوليتسيا قىزمەتكەرلەرىنىڭ بىرلەسىپ ارالاۋىن ۇيىمداستىرۋدى، ساناق پەرسونالدارىن قاجەتتى ورىنجايلارمەن، قۇرال-جابدىقتارمەن قامتاماسىز ەتۋدى مىندەتتەدى. وعان قوسا، نۇسقاۋشى - باقىلاۋشىلارمەن مامانداردىڭ قوعامدىق كولىكتەرىندە تەگىن ءجۇرۋىن ۇيىمداستىرۋدى تاپسىردى.
ايتا كەتۋ كەرەك، «2020 جىلى قازاقستان رەسپۋبليكاسى حالقىنىڭ ۇلتتىق ساناعىن وتكىزۋ تۋرالى» قازاقستان رەسپۋبليكاسى ۇكىمەتىنىڭ №419 قاۋلىسى قابىلدانىپ، الايدا، ەلدەگى پاندەمياعا بايلانىستى ۇلتتىق ساناقتى وتكىزۋ وسى جىلعا اۋىستىرىلعان بولاتىن.
