شىمكەنت اكىمى مۇرات ايتەنوۆ سپورت كەشەنىنىڭ جۇمىسىمەن تانىستى. قالادا جاستار اراسىندا ءجۇزۋ مەن گيمناستيكا كەڭ تاراعانىن ايتقان شاھار باسشىسى مۇنداي سپورت كەشەندەرىن كوپتەپ سالۋ قاجەتتىگىن جەتكىزدى.
«شىمكەنت» ورتالىق سۋ-سپورت كەشەنى ءال-فارابي اۋدانى، قازيەۆ كوشەسى 2ۆ مەكەنجايىندا ورنالاسقان. مۇندا جۇزۋدەن وقۋ-جاتتىعۋ جيىندارى مەن سپورتتىق جارىستار وتەدى. ورتالىق سۋ كەشەنىنىڭ جالپى اۋدانى 5555 شارشى مەتر. ءجۇزۋ الاڭى، اسحانا، مەديتسينالىق كابينەت، ترەناجەر زالى، 2 كيىم اۋىستىراتىن بولمە، 725 كورەرمەنگە ارنالعان ورىندىق بار. 2012 جىلى پايدالانۋعا بەرىلگەن. سەگىز ءجۇزۋ جولاعى بار. ءبىر مەزەتتە 96 سپورتشىنى قابىلداۋعا مۇمكىندىگى بار. قالا باسشىسى سۋ كەشەنىنە كەلۋشىلەر ءۇشىن، اسىرەسە مەكتەپ وقۋشىلارى ءۇشىن جەڭىلدەتىلگەن تاريفتەر قاراستىرىپ، سانيتارلىق-گيگيەنالىق تالاپتاردىڭ قاتاڭ ساقتالۋىن تاپسىردى.
