ماعاۋيا سارباسوۆ: اۋعانستاندا ءوزىن «قازاقپىز» دەپ جالعان ايتۋشىلار بولۋى مۇمكىن

1901
Adyrna.kz Telegram

بۇگىن «وتانداستار قورى» كەاق ۇيىمداستىرۋىمەن قازاقستان رەسپۋبليكاسىنىڭ پرەزيدەنتى قاسىم-جومارت توقاەۆتىڭ حالىققا جولداۋى تالقىلاندى.

جيىنعا قوعام باسشىلىعى، قوعام بەلسەندىلەرى، ساراپشىلار، جۋرناليستەر مەن ستۋدەنت جاستار قاتىستى.
ءىس-شارا اياسىندا قاتىسۋشىلار مەملەكەت باسشىسىنىڭ اۋعانستانداعى احۋالعا بايلانىستى ايتقاندارىن قولدايتىنىن جەتكىزدى.

«قازىرگى كەزدە اۋعانستانداعى جاعداي ءبارىمىزدى الاڭداتىپ وتىر. بۇل، اسىرەسە، سول جاقتاعى قانداستارىمىزدىڭ حال-احۋالىنا بايلانىستى. بۇل وتە كۇردەلى جانە جان-جاقتى قاراۋدى تالاپ ەتەتىن ماڭىزدى ماسەلە. وسى ورايدا «وتانداستار قورى» ەلىمىزدىڭ سىرتقى ىستەر مينيسترلىگىمەن بىرلەسىپ، قولدان كەلەتىن ءتيىستى جۇمىستى باستاپ تا كەتتى»، - دەدى «وتانداستار قورى» كەاق ۆيتسە-پرەزيدەنتى ماعاۋيا سارباسوۆ.

سونداي-اق ول الەۋمەتتىك جەلىدە تارايتىن ءارتۇرلى جالعان اقپاراتقا سەنىپ قالماۋعا شاقىردى.

«سوڭعى كەزدە اۋعانستاننان مىڭداعان بوسقىن كەلەدى، ول جاقتا مىڭداعان قازاق تۇرادى دەگەن اقپارات الەۋمەتتىك جەلى مەن مەسسەندجەرلەردە تاراپ جاتادى. بۇل شىندىققا جاناسپايتىنان اتاپ وتكىم كەلەدى. سوندىقتان دا ازاماتتاردى تەك رەسمي اقپاراتقا، سىرتقى ىستەر مينيسترلىگىنىڭ مالىمەتتەرىنە سۇيەنۋگە شاقىرامىن. سەبەبى ساراپشىلاردىڭ ايتۋىنشا، ءوزىن قازاقپىز دەپ تانىستىراتىن ادامداردىڭ كوبى قازاق بولماي شىعادى. ءتىپتى ول جاقتا اۋعان مەملەكەتتىك مەكەمە وكىلدەرىنە پارا بەرىپ، ۇلتىڭ راستايتىن قۇجاتتى قولدان ىستەپ الۋعا بولادى دەگەن دە مالىمەت بار. ءبىزدىڭ ەلشىلىكتەگى قىزمەتكەرلەر ءار جاعدايدى جەكە ءارى مۇقيات قاراپ، ەلىمىزگە كومەككە ءزارى ءار قاناداسىمىز امان-ەسەن ورالاتىنىنا سەنىمدىمىن»، - دەدى «وتانداستار قورى» كەاق ۆيتسە-پرەزيدەنتى.

پىكىرلەر