قازاقستاندىق قوعامنىڭ ازىرشە ءدىني تەرىس اعىمدارعا قارسى يممۋنيتەتى ءالسىز. مەملەكەت باسشىسى نۇرسۇلتان نازارباەۆ «تاۋەلسىزدىك جانە ءداۋىر» اتتى كىتابىندا وسىنداي پىكىر ءبىلدىردى. تاريحي پۋبليتسيستيكا جانرىندا جازىلعان كىتاپتان الىنعان ءۇزىندى نازارباەۆتىڭ رەسمي سايتىندا جاريالانعان.
«ءبىزدىڭ ءومىرىمىز ءۇشىن ءداستۇرلى ەمەس ءدىني جانە ءدىن اتىن جامىلعان اعىمدارعا جاستاردىڭ سوقىر ەرىپ كەتۋىنە كوز جۇمىپ قاراي المايمىز. سەبەپ – ءبىزدىڭ قوعامنىڭ ءدىني تەرىس اعىمعا قارسى يممۋنيتەتىنىڭ السىزدىگىندە. ادامنىڭ ىشكى سۇزگىسى مىناداي سۇراق قويۋى كەرەك: ءبىزدىڭ انالارىمىز، اپكەلەرىمىز، قىزدارىمىز وزگە حالىقتىڭ كيىم ۇلگىلەرىن كيۋى قاجەت پە؟ بىزبەن ءبىر داستارقاندا اس ىشپەۋى كەرەك پە؟ اۆتوكولىك جۇرگىزبەۋى كەرەك پە؟ مۇنىڭ ءبارى وزگە حالىقتاردىڭ ءداستۇرى. بىراق، بۇل داستۇرلەر ءبىزدىڭ دالادا بولعان ەمەس. بىزگە زيان تيگىزەتىن ءدىني اعىمدار بار. ءبىز ونداي اعىمداردان بارىنشا اۋلاق بولۋىمىز كەرەك جانە شىنايى رۋحانياتتى ناسيحاتتايتىن ءدىندى الۋ كەرەك. قۇرانداعى قاسيەتتى وسيەتتەردى ورىنداۋ ءۇشىن ءدىن دامۋى مەن وركەندەۋى مۇقتاجدارعا كومەكتەسۋ، باۋىرمالدىق، ۇلكەنگە قۇرمەت، بالالارعا تاربيە بەرۋ، وتاندى جانە حالىقتى قورعاۋ، بىرلىككە شاقىرۋ ىستەرىمەن اتقارىلۋى ءتيىس» دەلىنگەن پرەزيدەنت كىتابىندا.
دايىنداعان: ماديار مەڭدىباي،
"ادىرنا" ۇلتتىق پورتالى
