كابۋلدا ءبىر توپ ايەل اۋعانستاندا بيلىكتى تولىق باسىپ العان «تاليبان» راديكالدى توبىنىڭ وكىلدەرى ايەلدەردىڭ قۇقىقتارى مەن بوستاندىقتارىن قۇرمەتتەۋدى تالاپ ەتەتىن نارازىلىق اكتسياسىن وتكىزۋگە تىرىستى. بۇل تۋرالى Tوlo News تەلەارناسى حابارلايدى.
دەرەككوزدىڭ ايتۋىنشا، نارازى ايەلدەر تەڭدىكتى، سونداي-اق بولاشاق اۋعانستان ۇكىمەتىندە وكىلدىك ەتۋ مۇمكىندىگىن تالاپ ەتكەن. ولار سونىمەن قاتار ايەلدەردىڭ ءبىلىم الۋ مەن بارلىق سالادا جۇمىس ىستەۋ قۇقىعىن قورعاعىسى كەلگەن. اكتسيا كەزىندە ايەلدەر پرەزيدەنت سارايىنا بارماق بولعان، بىراق تالىبتەر ولارعا قارسى كوز جاساۋراتاتىن گاز قولدانىپ، بىرنەشە ايەلدى ۇرىپ جىبەرگەن.
2-قىركۇيەكتە كابۋل مەن اۋعانستاننىڭ گەرات قالاسىندا ءدال وسىنداي ميتينگتەر ءوتىپ، وندا بەلسەندىلەر ايەلدەردىڭ اۋعانستان ۇكىمەتىنە كىرۋىنە رۇقسات بەرۋدى تالاپ ەتكەن بولاتىن.
بۇۇ قۇقىق قورعاۋشىلارىنىڭ ايتۋىنشا، قازىرگى ۋاقىتتا اۋعان ايەلدەرىنىڭ قۇقىقتارى بويىنشا جاعداي وتە قيىن. ولاردى كوشەدە ۇرادى، مەكتەپكە بارۋعا تىيىم سالادى جانە ۇرلاپ كەتەدى. 25 تامىزدان باستاپ تالىپتەر ايەلدەرگە ۇيلەرىنەن شىعۋعا تىيىم سالدى.
"ادىرنا" ۇلتتىق پورتالى
