قاپشاعايدا جالعان پوليتسەي ۇستالدى. ول ىشكى ىستەر ورگاندارىندا جۇمىس ىستەيمىن دەپ وزگەنىڭ 737 مىڭ تەڭگە اقشاسىن يەمدەنگەن.
الماتى وبلىستىق پوليتسيا دەپارتامەنتى ءباسپاسوز قىزمەتىنىڭ مالىمەتىنشە، قاپشاعاي قالاسىنىڭ پوليتسياسىنا 21 جاستاعى تۇرعىننان ارىز تۇسكەن. ول ءوزىن پوليتسەيمىن دەپ تانىستىرعان ەر ادامنىڭ سەنىمىنە كىرىپ، اقشا العانىن جەتكىزگەن. بىراق قاراجاتتى قايتارماعاندىقتان، ول پوليتسياعا ارىزدانعان.
جەدەل ىزدەستىرۋ كەزىندە 23 جاستاعى كۇدىكتى ۇستالدى. قازىر ونىڭ ۇستىنەن قر قىلمىستىق كودەكسىنىڭ 190-بابى، 1-بولىگى، ياعني، «الاياقتىق» بويىنشا قىلمىستىق ءىس قوزعالىپ، تەرگەۋ ءجۇرىپ جاتىر.
ء"تارتىپ ساقشىلارى ونىڭ نە سەبەپتى ءوزىن پوليتسەيمىن دەپ تانىستىرىپ، قانداي ماقساتپەن اقشا العانىن، سونىمەن قاتار، وزگە قىلمىستارعا قاتىسى بار-جوعىن انىقتاپ جاتىر", - دەلىنگەن الماتى وبلىستىق پوليتسيا دەپارتامەنتىنىڭ حابارلاماسىندا.
دەپارتامەنت ۇستالعان ادامنىڭ پوليتسيا قىزمەتكەرى ەمەس ەكەنىن جانە ونىڭ بۇل جۇمىسقا مۇلدەم قاتىسى جوق ەكەنىن مالىمدەدى. «تەرگەۋ بارىسىندا انىقتالعانداي كۇدىكتى جابىرلەنۋشىنىڭ سەنىمىنە كىرىپ، 737 مىڭ تەڭگە اقشاسىن يەمدەنگەنى انىقتالدى. جابىرلەنۋشى دەر كەزىندە پوليتسياعا شاعىمدانعاندىقتان كۇدىكتى دە دەر كەزىندە ۇستالدى»، - دەپ تولىقتىردى پوليتسيانىڭ باسپاسوز قىزمەتى.
