قازاقستان پرەزيدەنتى – جوعارعى باس قولباسشى قاسىم-جومارت توقاەۆ قورعانىس مينيسترلىگىنىڭ باسشىلىق قۇرامىمەن كەزدەسۋ وتكىزىپ، جاڭادان تاعايىندالعان مينيستر مۇرات بەكتانوۆتى تانىستىردى، دەپ حابارلايدى "ادىرنا" ۇلتتىق پورتالى اقوردانىڭ رەسمي سايتىنا سىلتەمە جاساپ.
مەملەكەت باسشىسى جاڭا ءمينيستردىڭ ءبىلىمى مەن تاجىريبەسى قارۋلى كۇشتەرگە جۇكتەلەتىن مىندەتتەردى ورىنداۋعا سەپتىگىن تيگىزەتىنىنە سەنىم ءبىلدىردى.
قاسىم-جومارت توقاەۆ اسكەر الەمدەگى جانە ايماقتاعى كۇردەلى جاعدايدا كەز كەلگەن سىرتقى قاۋىپ-قاتەرگە تويتارىس بەرۋگە، مەملەكەتىمىزدىڭ قاۋىپسىزدىگىن قامتاماسىز ەتۋگە دايىن بولۋى كەرەك ەكەنىن ايتتى.
پرەزيدەنت ارىس پەن جامبىل وبلىسىنىڭ بايزاق اۋدانىنداعىداي توتەنشە وقيعالارعا جول بەرمەۋدىڭ اسا ماڭىزدى ەكەنىنە توقتالدى. بۇل رەتتە جوعارعى باس قولباسشى وق-دارىلەر قويمالارىنداعى قاۋىپسىزدىكتى قامتاماسىز ەتۋ جونىندە بەرگەن تاپسىرماسىن اسكەريلەردىڭ ەسىنە سالىپ، بۇل باعىتتا بىرقاتار جۇمىستار جاسالعانىن، دەگەنمەن ءالى دە شەشىمىن كۇتكەن ءتۇيىندى ماسەلەلەردىڭ بار ەكەنىن اتاپ ءوتتى.
مەملەكەت باسشىسى قورعانىس مينيسترلىگىنە بىرقاتار مىندەت جۇكتەدى.
قاسىم-جومارت توقاەۆ قر قارۋلى كۇشتەرىن دامىتۋدىڭ 2030 جىلعا دەيىنگى تۇجىرىمداماسىن تولىقتاي جۇزەگە اسىرۋ قاجەت ەكەنىنە، اسكەري قاۋىپسىزدىكتىڭ سىن-قاتەرلەرىنە شۇعىل ارەكەت ەتۋ ءۇشىن باسقارۋ ورگاندارىنىڭ دايىندىق ءىس-شارالارىن جالعاستىرا بەرۋگە نازار اۋداردى.
پرەزيدەنت قارۋلى كۇشتەردى جابدىقتاۋ بويىنشا مىندەتتەمەلەردى ورىنداۋ بارىسىندا وتاندىق قورعانىس ونەركاسىبى كەشەنىمەن كەلىسىپ جۇمىس ىستەۋدى تاپسىردى. سونىمەن قاتار وفيتسەرلەر مەن كەلىسىم-شارت بويىنشا الىناتىن قىزمەتكەرلەرگە ساپالى دايىندىق جۇرگىزۋدى قامتاماسىز ەتۋگە، وفيتسەرلەر مەن گەنەرالدار قاتارىندا سىبايلاس جەمقورلىققا جول بەرمەۋگە شاقىردى.
جوعارعى باس قولباسشى وق-ءدارى ساقتايتىن بارلىق قويمالاردا جانە باسقا دا قارۋ-جاراق ساقتايتىن جەرلەردە قاۋىپسىزدىكتى قامتاماسىز ەتۋ جونىندە تۇبەگەيلى شەشىم قابىلداۋدى، سونداي-اق، ەلدى مەكەندەردەن الىس جەردە وق-ءدارى ساقتايتىن زامانۋي قويمالار سالۋ جۇمىستارىن جىلدامداتۋدى تاپسىردى. بۇعان قاجەتتى قاراجات "قاۋىپسىز ەل" ۇلتتىق جوباسىنان قاراستىرىلۋى ءتيىس.
مەملەكەت باسشىسى جيىن سوڭىندا جاڭا مينيسترگە جانە بارلىق اسكەريلەرگە اسا جاۋاپتى قىزمەتتە تابىس تىلەدى. تاعايىندالعان مينيستر مۇرات بەكتانوۆ ۇكىمەت مۇشەسى رەتىندە انت قابىلدادى.
جيىن بارىسىندا وتستاۆكاعا كەتكەن بۇرىنعى مينيستر نۇرلان ەرمەكباەۆ ءسوز سويلەپ، پرەزيدەنتتەن، جامبىل وبلىسىنىڭ بايزاق اۋدانىندا بولعان قايعىلى وقيعادان قازا تاپقانداردىڭ اعايىن-تۋىسىنان جانە زارداپ شەككەندەردەن كەشىرىم سۇرادى.
"ادىرنا" ۇلتتىق پورتالى
