ماسكەۋ تۇبىندەگى بالاشيحادا قولدان جاسالعان جارىلعىش زاتتىڭ كومەگىمەن كولىك جارىلعان. سالدارىنان رەسەي قارۋلى كۇشتەرى باس شتابى باس جەدەل باسقارماسى باستىعىنىڭ ورىنباسارى گەنەرال-مايور ياروسلاۆ موسكاليك قازا تاپتى، دەپ حابارلايدى “ادىرنا” ۇلتتىق پورتالى.
رەسەيلىك Telegram ارنالارىنىڭ حابارلاۋىنشا، كولىك گاز باللونىنىڭ جابدىعىنىڭ قاسىنا ورناتىلعان قولدان جاسالعان جارىلعىش زاتتىڭ كومەگىمەن جارىلعان جانە گەنەرال پودەزدەن شىققان كەزدە قاشىقتان ىسكە قوسىلعان. جارىلىس ءساتى ۆيدەوعا ءتۇسىپ قالعان.
جارىلعان Volkswagen Golf وسى جىلدىڭ قاڭتار ايىنىڭ سوڭىنان بەرى كەم دەگەندە ءۇش رەت قايتا ساتىلعان. رەسەيدىڭ تەرگەۋ كوميتەتى ادام ءولتىرۋ جانە جارىلعىش زاتتاردىڭ زاڭسىز اينالىمى فاكتىسى بويىنشا قىلمىستىق ءىس قوزعادى.
رەسەيلىك باق-تىڭ حابارلاۋىنشا، قايتىس بولعان گەنەرال-لەيتەنانت موسكاليك 2015 جىلى «نورمانديا فورماتى» اياسىندا ۋكراينامەن كەلىسسوزدەرگە قاتىسقان. سونىمەن قاتار سيرياداعى رەسەي قارۋلى كۇشتەرىنىڭ وپەراتسياسىنا قاتىستى تاقىرىپتاردا بايانداماشى بولعان.
ودان بولەك، رەسەي باس شتابىنىڭ قوعامدىق تۇلعاسى رەتىندە موسكاليك بىرنەشە رەت تاياۋ شىعىستاعى جاعدايعا قاتىستى باق-قا پىكىر بىلدىرگەن. مىسالى، 2021 جىلدىڭ ماۋسىمىندا ول اقش-تى سيريا اۋماعىندا كۇردتەرگە زاڭسىز مۇناي وندىرۋگە كومەكتەستى دەپ ايىپتاعان. سول ۋاقىتتا ول رەسەي باس شتابىنىڭ وكىلى رەتىندە قازاقستان استاناسىندا وتكەن سيريا بويىنشا كەزەكتى «استانا» كەلىسسوزدەر راۋندىنا قاتىسقان.ايتا كەتسەك، اقپان ايىندا ماسكەۋدەگى ەليتالىق تۇرعىن ءۇي كەشەنىندەگى جارىلىس سالدارىنان «اربات» باتالونىنىڭ نەگىزىن قالاۋشى ارمەن ساركيسيان قايتىس بولعان ەدى. الدىن الا مالىمەت بويىنشا، عيماراتتىڭ كىرەبەرىسىنە قولدان جاسالعان جارىلعىش زات قويىلعان. ول قاشىقتان باسقارىلىپ، سارگسيان زالدا بولعان كەزدە جارىلعان.
ارمەن ساركيسيان ارمەنيادا دۇنيەگە كەلگەن، بىراق جاس كەزىندە گورلوۆكاعا كوشكەن. 2022 جىلدىڭ قىركۇيەگىندە ول دونباسس جابايى ديۆيزياسىنىڭ قۇرامىندا ارميان باتالونىن قۇرۋ تۋرالى حابارلاعان بولاتىن. 2023 جىلدىڭ جازىندا باتالون رەسەي قورعانىس مينيسترلىگىنىڭ قۇرامىنا ەنگەن.
بۇعان دەيىن ماسكەۋدە ريازانسكي داڭعىلىندا قولدان جاسالعان جارىلعىش زات جارىلىپ، ەكى ادام قازا تاپقان ەدى. قۇربان بولعانداردىڭ ءبىرى - رەسەي قارۋلى كۇشتەرىنىڭ رادياتسيالىق، حيميالىق جانە بيولوگيالىق قورعانىس اسكەرلەرىنىڭ باستىعى گەنەرال-لەيتەنانت يگور كيريللوۆ بولاتىن.
