تاجىكستاننىڭ سوعدى وبلىسىنداعى كومىر شاحتاسىندا بولعان جارىلىستان اۋعانستاننىڭ التى ازاماتى قازا تاپتى، دەپ حابارلايدى «ادىرنا» ءتىلشىسى Tasnim اگەنتتىگىنە سىلتەمە جاساپ.
قايعىلى جاعداي ايني اۋدانىندا بولعان. جارىلىس كەزىندە تۋننەل ىشىندە التى ادام بولعان، ولاردىڭ بارلىعى دا مەرت بولعان. مارقۇمداردىڭ دەنەلەرى ءالى دە ءۇيىندى استىنان شىعارىلعان جوق. قازىرگى تاڭدا قۇتقارۋ جۇمىستارى جالعاسىپ جاتىر.
قازا تاپقانداردىڭ بەسەۋى – اۋعانستاننىڭ دايكۋندي پروۆينتسياسىنىڭ تۇرعىندارى، تاعى بىرەۋى – گور پروۆينتسياسىنداعى لال-ۆاسر-دجانگال اۋدانىنىڭ ازاماتى. تاجىك بيلىگى مارقۇمداردىڭ ەسىمدەرىن ازىرگە جاريالاعان جوق.
مامىر ايىندا سوعدى وبلىسىنداعى باسقا كومىر شاحتاسىندا وسىنداي قايعىلى جاعداي بولعان. ونىڭ سالدارىنان دايكۋندي پروۆينتسياسىنان كەلگەن سەگىز اۋعان جۇمىسشىسى ءۇيىندى استىندا قالىپ، كوز جۇمعان ەدى.
ايتا كەتەيىك، تاجىكستاننىڭ كومىر شاحتالارىندا جۇزدەگەن اۋعان ازاماتى ەڭبەك ەتەدى. ولار ءوز ەلدەرىندە تابىس تابۋ مۇمكىندىگىنەن ايىرىلعاندىقتان، وتباسىلارىن قامتاماسىز ەتۋ ءۇشىن وسىندا كەلگەن. جۇمىسشىلاردىڭ ايتۋىنشا، اۋىر ەڭبەك جاعدايى مەن قاۋىپسىزدىك شارالارىنىڭ جوقتىعىنان ءولىم-ءجىتىم ءجيى بولادى. الايدا اۋعان جۇمىسشىلارىنا شاعىمدانۋعا نەمەسە باق وكىلدەرىمەن سويلەسۋگە تىيىم سالىنعان. بۇزعان جاعدايدا ايىپپۇل نەمەسە ەلدەن دەپورتاتسيالاۋ قاۋپى بار.
