ۇبت-عا بايلانىستى باسى داۋعا قالعان بەلگىلى ازىلكەش تۇرسىنبەك قاباتوۆتىڭ جۇبايى ءمولدىر مۇقانوۆا جەلىدە جالعان اقپارات تاراتقاندار زاڭ الدىندا جاۋاپسىز قالمايتىنىن، وسى ۋاقىتقا دەيىن قىزىنا، وتباسىنا ءتىل تيگىزىپ، نامىسىن قورلاعانداردىڭ زاڭمەن جازالاناتىنىن ەسكەرتتى. بۇل تۋرالى ول ءوزىنىڭ الەۋمەتتىك جەلىسىندەگى پاراقشاسىندا جازدى، دەپ حابارلايدى "ادىرنا" ۇلتتىق پورتالى.
بالا دەگەندە ءاربىر اكە-شەشەنىڭ شىعار جانى بولەك. ءدال قازىر ءبىزدىڭ وتباسىمىزعا جاسالىپ جاتقان اقپاراتتىق شابۋىلعا ءۇنسىز قالىپ وتىرعان جوقپىز. ءبىز ىسكە كوشتىك. جاقىندا اق-قاراسىن دالەلمەن اجىراتىپ، حالىق الدىندا ەسەپ بەرەمىز. تەك ۋاقىت كەرەك. ومىردە جالعان جالا ارقالاعاننان اسقان سوراقىلىق جوق ەكەن. ءدال قازىر مەنىڭ انا رەتىندە جۇرەگىم قارس ايىرىلىپ ءجۇر. ءوزىمىزدىڭ قازاق باۋىرلارىمىزدىڭ ءبىزدى "حالىق جاۋى" ەتىپ كورسەتۋگە سونشا تالپىنىپ جاتقانى كۇيىندىرەدى — دەپ جازدى ءمولدىر مۇقانوۆا.
ول جاقىن ارادا اشىق تۇرعان جارامىزعا تۇز سەۋىپ، بىزبەن قوسا بالامىزدى اششى ءسوز، جالعان اقپاراتپەن تۇنشىقتىرىپ جاتقان الەۋمەتتىك جەلى بەلسەندىلەرىنە ناليمىن دەپ وتىر.
ءبىرىڭدى قازاق، ءبىرىڭ دوس، كورمەسەڭ ءىستىڭ ءبارى بوس" — دەپ اباي بابامىز كەلتىرگەن جولدار قاي كەزدە دە وزەكتى. قازاقتى جىعىپ بەرەتىن، جىعىلعان كەزدە جۇدىرىق بەرەتىن دە ءوز قازاعىمىز. حالىق الدىندا ۇپاي جيناۋ ءۇشىن، وحۆات پەن لايك سانىن كوتەرۋ ءۇشىن تەرىس اقپارات تاراتقان، جەكە باستىڭ قۇقىعىن تاپتاعان، بويجەتكەنگە ءتىل تيگىزگەن ءار بلوگەر، جازۋشى، جەلى بەلسەندىسى زاڭ الدىندا جاۋاپسىز قالمايدى. ومىرگە وكپەلى ادامدار وزگەلەردى سوككىسى كەلەدى دە وتىرادى. اللا ولاردىڭ بالالارىنا جار بولسىن! رۋحانياتقا بەت بۇرىپ، ومىردەن ء“مان” ىزدەگەندەر وزگەنىڭ بالاسىنا اۋىر ءسوز ايتپاس ەدى — دەپ مالىمدەدى تۇرسىنبەكتىڭ جۇبايى.
ايتا كەتەيىك، بۇعان دەيىن بەلگىلى زاڭگەر، ادۆوكات ابزال قۇسپان ادەمى تۇرسىنبەكقىزىنىڭ ورنىنا تەستىلەۋگە ەۋرازيا ۇلتتىق ۋنيۆەرسيتەتىنىڭ ەكىنشى كۋرس ستۋدەنتى، گرانتتا وقىپ جۇرگەن سىمبات قاناي تەست تاپسىرۋعا كىرگەنىن ءوز پاراقشاسىندا جازعان بولاتىن. كوپ ۇزاماي بۇعان بايلانىستى تۇرسىنبەك قاباتوۆ ءوزى بۇل اقپاراتقا قاتىستى تۇسىنىك بەرىپ، بولعان جايتتى راستادى. الايدا ازىلكەش بۇل ىستەن بەيحابار ەكەنىن جانە زاڭبۇزۋشىلىققا قىزىن تەستكە ازىرلەگەن ءبىلىم ورتالىعىنىڭ ماماندارى كىنالى ەكەنىن ايتتى. كەيىن ازىلكەشتىڭ قىزىن ۇبت-عا دايىنداعان رەپەتيتور دا بار شىندىقتى ورتاعا جايىپ سالدى. ول وقيعانىڭ قالاي بولعانىن دا جاسىرماي ايتىپ بەرگەن ەدى.
"ادىرنا" ۇلتتىق پورتالى
