“ورتالىق ازيا – ورتالىق” ماگيسترالدى گاز قۇبىرى ۆولگوگراد وبلىسىنداعى جارىلىس سالدارىنان ىستەن شىقتى دەگەن اقپارات تارادى، دەپ حابارلايدى “ادىرنا” ۇلتتىق پورتالى.
بۇل تۋرالى شەتەلدىك باق بەتتەرىندە جازىلۋدا.
الايدا بۇل مالىمەتتى قازاقستان رەسپۋبليكاسىنىڭ ەنەرگەتيكا مينيسترلىگى جوققا شىعاردى.
مينيسترلىك وكىلدەرىنىڭ ايتۋىنشا، قازاقستان اۋماعىنداعى گاز تاسىمالى شتاتتىق رەجيمدە جۇزەگە اسىرىلىپ جاتىر.
“ورتالىق ازيا – ورتالىق” ماگيسترالدى گاز قۇبىرى بويىنشا ورىن العان جاعدايعا بايلانىستى حابارلايمىز: قازاقستان رەسپۋبليكاسى اۋماعىنداعى گاز تاسىمالداۋ شتاتتىق رەجيمدە جۇزەگە اسىرىلۋدا. گاز ءترانزيتى مەن گاز تاسىمالداۋ ينفراقۇرىلىمىنىڭ جۇمىسىندا ەشقانداي اقاۋ تىركەلگەن جوق”، – دەلىنگەن ۆەدومستۆو حابارلاماسىندا.
سونىمەن قاتار، ەلىمىزدىڭ ەنەرگەتيكا مينيسترلىگى وزبەكستان باعىتىنداعى تابيعي گاز جەتكىزۋ بەكىتىلگەن كولەم مەن كەستە بويىنشا جۇرگىزىلىپ جاتقانىن مالىمدەدى.
“اتالعان گاز قۇبىرى – “گازپروم” جۇيەسىنە كىرەتىن ءىرى ماگيسترالدەردىڭ ءبىرى. ول تۇرىكمەنستاننان تابيعي گازدى وزبەكستان مەن قازاقستان ارقىلى رەسەيگە تاسىمالدايدى”، – دەپ ناقتىلادى مينيسترلىك.
ايتا كەتەيىك، بۇعان دەيىن رەسەيلىك اقپارات كوزدەرى 2 تامىزعا قاراعان ءتۇنى ۋكراينا قارۋلى كۇشتەرىنىڭ دروندارى رەسەيدىڭ بىرنەشە وبلىسىن قاتار شابۋىلداعانى تۋرالى حابارلاعان ەدى. Telegram-ارنا Mash تاراتقان دەرەككە سۇيەنسەك، سوققى ريازان، ليپەتسك، ۆورونەج جانە روستوۆ وبلىستارىنا تيگەن.
