قىزىلوردادا ماس جۇرگىزۋشى باسقارعان Toyota Land Cruiser باعدارشامدا تۇرعان جەدەل جاردەم كولىگىنە سوعىلدى، - دەپ حابارلايدى “ادىرنا” ۇلتتىق پورتالى inbusiness.kz سايتىنا سىلتەمە جاساپ.
وقيعا 29 تامىزدا تاڭەرتەڭ بولعان.
"اپات سالدارىنان ەكى ادام جاراقات الدى - فەلدشەر وماروۆا مەن جەدەل جاردەم جۇرگىزۋشىسى ماەنوۆ. ەكەۋى دە مەديتسينالىق مەكەمەگە جەتكىزىلگەننەن كەيىن قايتىس بولدى", - دەدى پوليتسەيلەر.
تەكسەرۋ كەزىندە Toyota Land Cruiser جۇرگىزۋشىسى ورتاشا دارەجەدەگى ماس كۇيدە بولعانى انىقتالدى. سونىمەن قاتار، ول قىزىلوردا قالالىق مامانداندىرىلعان اكىمشىلىك سوتىنىڭ 2016 جىلعى قاراشاداعى قاۋلىسىنا سايكەس بەس جىلعا جۇرگىزۋشى كۋالىگىنەن ايىرىلعان.
جول-كولىك وقيعاسى دەرەگى بويىنشا قر قك 346-بابىنىڭ 6-تارماعىنا سايكەس ("كولىك قۇرالدارىن باسقارۋ قۇقىعىنان ايىرىلعان جانە الكوگولدىك، ەسىرتكىلىك جانە (نەمەسە) ۋىتقۇمارلىق ماساڭ كۇيدەگى ادامنىڭ كولىك قۇرالىن باسقارۋى، سول سياقتى كولىك قۇرالىن باسقارۋدى وسىنداي ادامعا بەرۋ نەمەسە كولىك قۇرالىن وسىنداي ادامنىڭ باسقارۋىنا جول بەرۋ") قىلمىستىق ءىس قوزعالدى.
بۇل تارماق بەلگىلى ءبىر لاۋازىمداردى اتقارۋ نەمەسە بەلگىلى ءبىر قىزمەتپەن اينالىسۋعا ءومىر بويىنا تىيىم سالىنىپ، 8 جىلدان 10 جىلعا دەيىنگى مەرزىمگە باس بوستاندىعىنان ايىرۋ تۇرىندەگى جازانى قاراستىرادى. قازىرگى ۋاقىتتا دجيپ جۇرگىزۋشىسى ۋاقىتشا ۇستاۋ يزولياتورىنا قامالدى. ءتيىستى ساراپتامالار تاعايىندالدى. وقيعانىڭ ءمان-جايى ناقتىلانىپ جاتىر.
