بۇگىن ەلىمىزدەگى بارلىق مەشىتتەردە جامبىل وبلىسىنىڭ بايزاق اۋدانىندا وق-ءدارى قويماسىنان شىققان جارىلىس كەزىندە قازا تاپقانداردىڭ رۋحىنا باعىشتالىپ، قۇران حاتىم وقىلدى. قۇران حات ءار ءوڭىردىڭ جەرگىلىكتى ۋاقىتى بويىنشا ساعات 10.00-دە ءتۇسىرىلدى دەپ حابارلايدى "ادىرنا" ۇلتتىق پورتالى "حابار24-كە" سىلتەمە جاساپ.
حالىقتىڭ اماندىعى ءۇشىن شەيىت بولعاندارعا باعىشتالعان قۇران حاتى ەلورداداعى ازىرەت سۇلتان مەشىتىندە دە وقىلدى. قازاقستان مۇسىلماندار ءدىني باسقارماسىنىڭ رەسمي الەۋمەتتىك پاراقشاسىندا قۇران حاتىمدى باعىشتاۋ ءراسىمى تىكەلەي ەفيردەن كورسەتىلدى.
– ەلىمىز ءۇشىن اسكرەي قىزمەتتە جۇرگەن ءبىزدىڭ ساردارلارىمىز ، ەل قورعاپ، اسكەري مىندەتتەرىن وتەپ، ءورت ۇستىندە قازا تاۋىپ جاتىر. بۇنداي قازانى شاريعاتتا ءشايىت دارەجەسىندە دەپ سانايدى. ويتيكەن ول ەل قورعاۋ ءۇشىن، قوعامنىڭ تىنىشتىعىن ساقتاۋ ءۇشىن جاندارىن پيدا ەتتى. بۇل اللانىڭ الدىنداعى ۇلكەن دارەجە. اللا وسى قازا بولعانداردىڭ مارقۇمداردىڭ رۋحتارىن شاتتىققا بولەپ، مەيىرىمىنە بولەپ، اقىرەتتە قيامەت كۇنى جاندارىن ءجانناتتا شالقىتسىن، — دەدى قمدب نايب ءمۇفتيى ەرشات وڭعاروۆ.
"ادىرنا" ۇلتتىق پورتالى.
