اقتاۋ قالاسىندا ەل تاۋەلسىزدىگىنىڭ 30 جىلدىعى اياسىندا جانە كونستيتۋتسيا كۇنىنە وراي №18 شاعىن اۋداندا ورنالاسقان 4 تۇرعىن ءۇي پايدالانۋعا بەرىلدى. 180 پاتەردەن تۇراتىن تۇرعىن ۇيلەر «نۇرلى جەر» مەملەكەتتىك باعدارلاماسى اياسىندا بوي كوتەرگەن دەپ حابارلايدى "ادىرنا" ۇلتتىق پورتالى.
كىلت تابىستاۋ راسىمىنە اقتاۋ قالاسىنىڭ اكىمى ن.قيلىباي قاتىسىپ، باسپانالى بولعان ازاماتتاردى قونىس تويمەن قۇتتىقتادى.
— قالامىزدا مەملەكەت قولداۋىنىڭ ناتيجەسىندە باسپانالى بولىپ، قونىس تويىن تويلايتىندار سانى ارتىپ كەلەدى. وسى جازدا «اققۋ-3» تۇرعىن ءۇي كەشەنىنەن 443 پاتەر تابىستالىپ، قۋانىشتىڭ كۋاسى بولدىق. بۇگىن، مىنە، جالپى اۋدانى 10150 شارشى مەتر بولاتىن جاڭا تۇرعىن ءۇيدى پايدالانۋعا بەرۋدەمىز. مەرەكەمەن تۇسپا-تۇس كەلگەن قونىس تويلارىڭىز قۇتتى بولسىن. شاڭىراقتارىڭىز شاتتىققا تولى بولىپ، بەرەكە-بىرلىگىمىز ارتا بەرسىن، - دەدى قالا اكىمى.
شاراعا جينالعاندار باسپانالى بولعان مەدينا الاگوزوۆانىڭ شاڭىراعىنا بارىپ، ءدام تاتتى. جاڭا قونىستىڭ العاشقى قوناعى بولعان اۋىل اقساقالدارى باتا بەردى.
كەلەر جىلى قالادا №19ا جانە №18 شاعىن اۋدانداردان كوپپاتەرلى 9 ءۇي پايدالانۋعا بەرۋ جوسپارلانۋدا. وسىلايشا وڭىردە قونىس تويىن تويلاۋشىلار سانى ارتپاق.
"ادىرنا" ۇلتتىق پورتالى.
