ادام يگىلىگىنە ارنالعان ءساندى دە ساۋلەتتى عيماراتتار – قۇرىلىسشىلاردىڭ، قۇرىلىسقا قاجەتتى ماتەريالداردى وندىرۋشىلەردىڭ جاسامپاز ەڭبەگىنىڭ جەمىسى.
بۇگىندە تەكەلى قالاسىندا 10-نان اسا كاسىپورىن قۇرعاق قۇرىلىس قوسپالارىنا ارنالعان ءمار-ءمار ۇنتاعىن وندىرۋمەن اينالىسادى. سولاردىڭ ءبىرى – «MARMAR» ساۋدا بەلگىسىمەن وتاندىق ءوندىرىس سالاسىندا ءوزىنىڭ ورنىن ايقىنداپ كەلە جاتقان «TasUn» جشس.
سەرىكتەستىك ديرەكتورى بەكتاس ەرمەكۇلى قايىمباەۆتىڭ ايتۋىنشا، 2014 جىلى «اق-تاس بەرەكە» جشس بولىپ قۇرىلعاندا كومپانيادا تاس ۇنتاقتايتىن جالعىز عانا قۇرىلعى بولىپتى. ايتا كەتەلىگى، زاماناۋي تالاپتارعا ساي جابدىقتالعان سول ديىرمەن ءمارمار تاسىن وتە مايدا ەتىپ ۇنتاقتايتىن مۇمكىندىككە يە بولعاندىقتان، كومپانيا وندىرگەن شيكىزاتقا سۇرانىس ارتقان. وزىق تەحنولوگيانىڭ الەۋەتى جانە ۇجىمنىڭ بەرەكە-بىرلىكپەن ەتكەن ەڭبەگىنىڭ ارقاسىندا كومپانيانىڭ تابىسى دا ارتىپ، تاپقان پايداعا تاس ۇنتاقتايتىن ديىرمەننىڭ سانىن كوبەيتكەن. ناتيجەسىندە، 2017 جىلى ءمارمار تاسىن وڭدەۋمەن بىرىڭعاي اينالىساتىن «TasUn» جشس قۇرىلىپ، كاسىپورىننىڭ ءورىسى كەڭەيە تۇسكەن.
بۇگىندە ءمارمار كەن ورنىندا 30, ءمارمار ۇنتاعى وندىرىسىندە 50-دەن استام جۇمىسشى ەڭبەك ەتەدى. اتاپ ايتقاندا، جەلىلەس قوس كومپانيا – «اق-تاس بەرەكە» مەن «TasUn» سەرىكتەستىگىن-دە 90-عا تارتا ادام تۇراقتى جۇمىسپەن قامتىلعان. اينالاسى 7-8 جىلدىڭ ىشىندە مۇنداي جەتىستىككە جەتۋ، ارينە، وڭاي ەمەس. جەمىستى جەتىستىكتىڭ سىرىن بەكتاس بىلاي تۇيىندەدى:
«جۇمىسشىلار كاسىپورىنعا ەڭبەك زاڭىنا نەگىزدەلگەن ەكىجاقتى كەلىسىم-شارت بويىنشا قابىلدانادى جانە سوعان ساي جۇمىس ىستەيدى. مۇندا قىزمەتكەرلەرگە قاجەتتى جاعدايدىڭ ءبارى قاراستىرىلعان. كۇندەلىكتى جۇمىس ەكى كەزەكپەن جۇرگىزىلەدى. ەگەر ۇستەمە جۇمىس ىستەۋگە تۋرا كەلسە، اقىسى تولەنەدى.
ەڭبەكاقىنى ۋاقىتىندا بەرۋ، جۇمىسشىلاردىڭ ەڭبەك زاڭىندا كورسەتىلگەن قۇقىقتا-رىن قورعاۋ، مادەني ومىرگە، سالاۋاتتىلىققا ىنتالاندىرۋ، ۇجىمنىڭ اۋىزبىرشىلىگىن، ىنتىماعىن ساقتاۋ، ءبىر-بىرىنە كومەك كورسەتۋ، مەرەكە-مەيرامداردا مۇمكىندىككە قاراي سىياقىلار تاعايىنداۋ، مىنە، وسىنداي قاراپايىم قاعيدالارعا ءمان بەرۋ جۇمىسشىلاردىڭ ءوز كاسىپ-ورنىنا دەگەن سەنىمىن نىعايتا ءتۇستى. ءبىز ارقاشان كاسىبيلىكتى، بىرلىكتى الدىڭعى قاتارعا قويدىق. سەبەبى، جۇمىسشىلاردىڭ بىلىكتىلىگى، ءوز مىندەتىنە دەگەن جاۋاپكەرشىلىگى بولماسا، زاماناۋي تەحنولوگيانىڭ الەۋەتى جەلگە ۇشادى. ونىڭ ۇستىنە مەملەكەتىمىز وتاندىق ءوندىرىستى دامىتۋعا جان-جاقتى قولداۋ كورسەتىپ كەلەدى. سوندىقتان، قورى مول، ساپالى تەكەلى ءمارمارىنىڭ اتاعىن اسپانداتۋ ءبىزدىڭ ابىرويلى مىندەتىمىز دەپ بىلەمىز».
كاسىپورىن بيزنەستىڭ الەۋمەتتىك جاۋاپكەرشىلىگىنە دە ەنجار قارامايدى. قالادا ۇيىمداستىرىلاتىن قايىرىمدىلىق شارالارىنان شەت قالماي، مۇمكىندىگىنشە كومەك كورسەتۋگە اتسالىسىپ كەلەدى.
كاسىپورىندا جۇمىسشىلاردىڭ قاۋىپسىزدىك قاعيدالارىن بەرىك ۇستانۋىنا ءمان بەرىلەدى. كەن قازۋ ورنىندا، ءوندىرىس قاۋىپسىزدىگى بويىنشا جاۋاپتى قىزمەتكەر ۆيتالي كۋلبيدا، ءمارمار ۇنتاعىن شىعاراتىن زاۋىتتا دۋمان باعداتۇلى كۇندەلىكتى قاۋىپسىزدىك ەرەجەلەرىن ەسكە سالىپ، قاۋىپسىزدىك شارالارىن قاداعالاپ وتىرادى.
اسىرەسە، پاندەمياعا بايلانىستى تۋىنداعان قيىندىقتار تۇسىندا جۇمىسشىلاردىڭ جۇمىستان قىسقارىپ قالۋىنا جول بەرمەۋ ءۇشىن كاسىپورىن باسشىلارى تارعالاڭنان جول تاۋىپ، جۇمىستىڭ توقتاپ قالماۋىنا كۇش سالىپ كەلەدى. ۇجىمنىڭ سانيتارلىق تالاپتاردى قاتاڭ ورىنداۋىن قاداعالاپ، بارلىق قىزمەتكەرلەردىڭ جانە ولاردىڭ وتباسىنىڭ قالىپتى ءومىرى ءۇشىن سانالى تۇردە ەكپە الۋدىڭ قاجەتتىلىگىن تۇسىندىرۋدە. بۇگىندە كاسىپورىندا ەكپە العان جۇمىسشىلاردىڭ سانى ارتىپ وتىر.
قالالىق كاسىپكەرلەر پالاتاسىنىڭ ديرەكتورى تۇرىسبەك ءجۇمادىلوۆ بۇگىندە قالامىزداعى 6 تاۋ-كەن ورنىن قامتىعان 10-نان اسا كاسىپورىن ىشكى نارىقتاعى قۇرعاق قۇرىلىس قوسپالارىنا قاجەتتى شيكىزاتتىڭ 70 پايىزىن ءوندىرىپ وتىرعانىن، بۇل شىنىمەن دە ماقتانارلىق جەتىستىك ەكەنىن ايتتى.
نارىقتا ءمارمار ۇنتاعىنىڭ «ميكروكالتسيت» دەپ اتالاتىن وتە مايدا سۇرپىن وندىرەتىن وتاندىق ءوندىرىس ساۋساقپەن سانالادى. قازىر قۇرىلىس سالاسىندا جاپپاي قولدانىلىپ كەلە جاتقان قۇرعاق قوسپالار مەن ءتۇرلى ەمۋلسيالاردى شىعاراتىن كاسىپورىندار رەسەي، تۇركيا، وزبەكستان سەكىلدى ەلدەردىڭ يمپورتىنا تاۋەلدى. ادەتتە، قۇرعاق قۇرىلىس قوسپالارى ءتۇرلى نىسانداردىڭ ىشكى قابىرعالارى مەن توبەلەرىن سىلاۋعا، ال، ەمۋلسيالار بوياۋعا پايدالانىلاتىندىقتان ونىڭ ادام دەنساۋلىعىنا قاۋىپسىزدىگىنە، ەكولوگيالىق تازالىعىنىنا باسا ءمان بەرىلەدى. سوندىقتان، تەكەلىنىڭ تابيعي تاسىنان، اق مارمارىنەن الىنعان شيكىزاتتىڭ وتاندىق وندىرىستەگى الاتىن ورنى وتە ماڭىزدى. وسى قاجەتتەلىكتى ءدوپ باسىپ، سۇرانىسقا ساي جوعارى ساپالى، ەكولوگيالىق تازا تابيعي ونىمدەرىمەن قازاقستاندىق ءوندىرىستىڭ قاجەتىن قامتۋعا كۇش سالىپ كەلە جاتقان كاسىپورىننىڭ بولاشاعى زور.
ايمان اسىل
