بۇۇ-نىڭ ادام قۇقىقتارى جونىندەگى جوعارى كوميسسارى ميشەل باچەلەتتىڭ ايتۋىنشا، ونىڭ كەڭسەسىندە "تاليبان" سودىرلارىنىڭ ورەسكەل قۇقىق بۇزۋشىلىقتارى تۋرالى سەنىمدى مالىمەتتەر بار، دەپ حابارلايدى “ادىرنا” ۇلتتىق پورتالى Stan.kz اقپارات اگەنتتىگىنە سىلتەمە جاساپ.
بۇۇ-نىڭ ادام قۇقىقتارى جونىندەگى جەتەكشىسى سەيسەنبىدە اۋعانستانداعى "تاليبان" قوزعالىسىنىڭ ورەسكەل قۇقىق بۇزۋشىلىقتارى تۋرالى سەنىمدى اقپارات العانىن ايتتى، ونىڭ ىشىندە بەيبىت تۇرعىندار مەن اۋعان قاۋىپسىزدىك كۇشتەرىنىڭ ء"ولىم جازالارى" تۋرالى اقپاراتتار بار.
بۇۇ وكىلى، اتاپ ايتقاندا، بەيبىت تۇرعىنداردى ءتيىستى زاڭ شەڭبەرىنسىز ءولىم جازاسىنا كەسۋ، نارازىلىقتاردى باسۋ جانە بالالاردى اسكەر قاتارىنا قوسۋ تۋرالى ايتتى.
"بۇل بەيبىت تۇرعىندار مەن اۋعانستان ۇلتتىق قاۋىپسىزدىك كۇشتەرىنىڭ بۇرىنعى مۇشەلەرىن سوت اياسىنان تىس ءولتىرۋ، ايەلدەر قۇقىعىنىڭ شەكتەلۋى، ونىڭ ىشىندە ەركىن ءجۇرۋ جانە قىزداردىڭ مەكتەپكە بارۋ قۇقىعى جايىندا ايتىلىپ وتىر. سونىمەن قاتار بالا-ساربازدار اسكەر قاتارىنا الىنىپ، بەيبىت شەرۋلەر باسىلۋدا" ، - دەدى بۇۇ كوميسسارى.
ول بۇعان دەيىن توپ وكىلدەرى ايەلدەر مەن ەتنيكالىق جانە ءدىني ازشىلىقتاردىڭ قۇقىقتارىن قۇرمەتتەۋگە مىندەتتەمە العانىنا ەرەكشە نازار اۋداردى. باچەلەت تالىپتەردى ايەلدەردىڭ قۇقىقتارىن قۇرمەتتەۋگە شاقىرىپ سونىمەن بىرگە بۇل سالاداعى كەز كەلگەن قۇقىق بۇزۋشىلىق الەمدىك قوعامداستىق الدىنداعى "قىزىل سىزىققا" اينالاتىنىن اتاپ ءوتتى.
بۇۇ كوميسسارى 1996 جىلى تاليبان شابۋىلىنان بۇرىن 3,5 ميلليون قىز بالانىڭ مەكتەپكە بارعانىن ەسكە سالدى. ال 1999 جىلدىڭ وزىندە تەك 9 مىڭعا جۋىق قىز باستاۋىش مەكتەپ تابالدىرىعىن اتتاعان.
بۇۇ-نىڭ ادام قۇقىقتارى جونىندەگى تاۋەلسىز ساراپشىلارى جاساعان بىرىككەن مالىمدەمەدە "تاليبان ۇيلەردى ارالاپ ىزدەۋدى جالعاستىرۋدا" دەپ كوپتەگەن ادامدار جاسىرىنىپ جاتقانىن جانە جەكە مۇلىكتەردى تارتىپ الۋ مەن رەپرەسسيا تۋرالى حابارلاما تۇسكەنىن ايتقان.
"تالىپتەردىڭ وسى ايلاردا جانە وسى ۋاقىتقا دەيىن جاساعان ارەكەتىن سوعىس قىلمىستارى مەن ادامزاتقا قارسى قياناتپەن تەڭەستىرۋگە بولادى" ، - دەدى ولار.
بۇعان دەيىن تالىپتەر قازىرگى "تاليباننىڭ" 20 جىل بۇرىنعىدان وزگەشە ەكەنىن ايتقان بولاتىن: اۋعانستاندا بيلىكتى قولعا العاننان كەيىن ولار ادام قۇقىقتارىن قورعاۋعا ۋادە بەرگەن، سونىڭ ىشىندە ايەلدەردىڭ، ەشكىمنەن كەك الماۋ جانە تۇتاستاي العاندا كۇشتى يسلامدىق مەملەكەت قۇرۋ ءۇشىن وتكەننىڭ بارلىق قاتەلىكتەرىن ەسكەرۋدى مەجە قىلعانىن مالىمدەگەن.
الايدا، كەيىنىرەك بۇقارالىق اقپارات قۇرالدارىندا پايدا بولعان جاڭالىقتار بارلىعى كەرىسىنشە ەكەنىن كورسەتتى. بۇعان دەيىن اۋعانستاننىڭ سولتۇستىگىندە تالىپتەر جاس ايەلدى ءدامسىز تاماق پىسىرگەنى ءۇشىن ورتەپ جىبەرگەنى ايتىلعان بولاتىن.
