رەسەيلىك جۋرناليست جانە جازۋشى ميحايل زىگار دميتري گوردونعا بەرگەن سۇحباتىندا 2005 جىلى نارازىلىق بىلدىرۋشىلەردى جاپپاي اتىپ تاستاعاننان كەيىنگى كۇنى وزبەكستانداعى ءاندىجان قالاسىندا كورگەندەرىن ايتتى.
زىگار جانە 2000 جىلداردىڭ باسىنداعى كوپتەگەن ءىرى قاقتىعىستاردى ءوز كوزىمەن كورىپ، سوعىس ءتىلشىسى بولىپ جۇمىس ىستەدى. بۇرىنعى "دوجد" تەلەارناسىنىڭ باس رەداكتورى ءاندىجان وقيعاسى وعان ەڭ قاتتى اسەر ەتكەنىن مويىندادى.
"اندىجانداعى اتىس - مەن كورگەن ەڭ قورقىنىشتى وقيعا. ادامداردىڭ قالاي ولگەنىن كورۋ، وقتىڭ قالاي تيگەنىن سەزۋ قورقىنىشتى. مەن قالاداعى از ءجۋرناليستىڭ ءبىرى بولدىم. 2005 جىلدىڭ 13 مامىرىندا بولعان كوتەرىلىس كەزىندە قالادا جۇمىس ىستەيتىن جۋرناليستەردىڭ بارلىعى دەرلىك قالا سىرتىنا شىعارىلدى. ۇزاق جىلدىق تيرانيانىڭ اسەرى، جەرگىلىكتى شەنەۋنىكتەر كەز كەلگەن كاسىپكەردى ۇستاپ الىپ، ۇزاق ۋاقىتقا تۇرمەگە قاماي بەرۋدىڭ اسەرىنەن 2005 جىلعا قاراي قالادا جۇمىسقا قابىلەتتى ەر ادامداردىڭ بارلىعى دەرلىك تۇرمەدە وتىردى. قىرعىزستاندا بولعان ءتۇرلى -ءتۇستى رەۆوليۋتسيالاردىڭ اسەرىنەن، شەكارالاس ءاندىجاندا دا كوتەرىلىس بۇرق ەتە قالدى", - دەيدى ول.
ونىڭ ايتۋىنشا كوتەرىلىسشىلەر قالاداعى تۇرمەنى باسىپ الىپ، ءبىر كۇن بويى ۇستاپ تۇرعان.
"ولار سوسىن قالادان بارلىق جۋرناليستەردى شىعاردى دا، ىشكى اسكەردى كىرگىزدى. اسكەر الاڭداعى حالىققا كىم ەكەنىنە قاراماستان وق جاۋدىردى. مەن حالىقتى اتىپ جاتقاندا بولمادىم، كەلەسى كۇنى تاڭەرتەڭ قالاعا كىرۋدىڭ امالىن تاپتىم، ول ساتتە ءالى الاڭنان مايىتتەردى اكەتە قويماعان ەدى. مەنىڭ ساناعىم بويىنشا الاڭدا 1,5 مىڭ ادامنىڭ ءمايىتى جاتتى. بۇل تەك قانا مەنىڭ ەسەبىم ەمەس، سونىمەن قاتار قالادا بولعان قۇقىق قورعاۋشىلار دا سولاي دەيدى", - دەيدى زىگار.
ول ءوزىنىڭ ەسىنەن ەشقاشان كەتپەيتىن ءبىر جايتتى ايتتى.
"مەنىڭ ەسىمدى قالىپ، كوز الدىما ۇنەمى كەلەتىن ءبىر كورىنىس بار. قالادا كۇنى بويى جاڭبىر جاۋعان ەدى، حالىقتى اتۋ ءساتى دە نوسەرمەن تۇسپا-تۇس كەلدى. ادامدار اتقان ساتتە، جان-جاققا قاشا باستاعان. بۇل قالا وڭتۇستىكتىڭ ەڭ ىستىق قالاسىنىڭ ءبىرى، قالا حالقى جەڭىل اياق كيىممەن جۇرەدى. جاۋىن جاۋىپ، اتىس باستالعاندا حالىق بىتىراپ قاشىپ، اياق كيىمدەرى شاشىلىپ قالعان. قالادا وتە كوپ جەڭىل اياق كيىم جاۋىن سۋىمەن جان-جاقتا جاتتى. ولاردىڭ اراسىندا بالالاردىڭ اياق كيىمدەرى وتە كوپ ەدى. مەن بالالاردىڭ مايىتتەرىن كورمەدىم، ولاردى ءبىرىنشى جيناعانى انىق، بىراق اياق كيىمدەرى شاشىلىپ جاتتى. بۇل وتە اۋىر جانە ەسىمنەن كەتپەيتىن كورىنىس", -دەيدى ول.
رەسمي دەرەك بويىنشا ءاندىجان وقيعاسىندا 187 ادام قازا تاپقان، الايدا بەيرەسمي ولاردىڭ سانى 2 مىڭعا جۋىق.
"ادىرنا" ۇلتتىق پورتالى
