الماتىدا ەمحانا مەڭگەرۋشىسى جالعان ۆاكتسينالاۋ پاسپورتىن ساتقانى ءۇشىن ۇستالدى، دەپ حابارلادى قالالىق سىبايلاس جەمقورلىققا قارسى قىزمەت.
ونىڭ قاراماعىنداعىلار مەن دەلدالدار دا ۇستالدى.
ولار اقشالاي سىياقىعا 100-دەن استام جالعان ۆاكتسينالاۋ پاسپورتىن جاسادى جانە ساتتى دەگەن كۇدىككە ءىلىندى، ياعني مەديتسينا قىزمەتكەرلەرى دەنساۋلىق ساقتاۋ مينيسترلىگىنىڭ "ۆاكتسينالاۋ" ەلەكتروندى مودۋلىنە جالعان اقپارات ەنگىزگەن، سونىڭ نەگىزىندە "egov.kz" ەلەكتروندى ۇكىمەت پورتالىندا ازاماتتاردىڭ كوروناۆيرۋس ينفەكتسياسىنا قارسى ۆاكتسينا العانى تۋرالى جالعان ەلەكتروندى پاسپورتتار جاسالعان.
سوتقا دەيىنگى تەرگەۋ جالعاسىپ جاتىر. كۇدىكتىلەرگە قاتىستى سوڭعى شەشىمدى سوت قابىلدايدى.
جالعان ۆاكتسينالاۋ پاسپورتىن جاسادى دەگەن كۇدىككە ىلىنگەندەردى قالا پروكۋراتۋراسىنىڭ ۇيلەستىرۋىمەن سىبايلاس جەمقورلىققا قارسى قىزمەت ۇستادى.
