ءۇشىنشى مەگاپوليستە قالا اكىمدىگى مەن قازاقستان مۇسىلماندارى ءدىني باسقارماسىنىڭ شىمكەنت قالاسى بويىنشا وكىلدىگىنىڭ ۇيىتقى بولۋىمەن «مەكتەپكە جول» اكتسياسى ءوتتى.
قايىرىمدىلىق شاراسى ەل تاۋەلسىزدىگىنىڭ 30 جىلدىعى جانە «قايىرىمدى ىستەر» مارافونى جوباسى اياسىندا ۇيىمداستىرىلدى.
اقمەشىت ورتالىق مەشىتىندە وتكەن اكتسيادا 1000-عا جۋىق مەكتەپ وقۋشىسىنا وقۋعا قاجەتتى قۇرال-جابدىقتار تابىس ەتىلدى.
-وتباسىنداعى بىرنەشە بالانى مەكتەپكە دايىنداۋ، اتا-اناعا سالماق تۇسىرەتىنى انىق. مۇنداي جاعدايدا اكە-شەشە بارلىق بالاسىن جاڭا وقۋ جىلىنا تولىق دايىنداي المايدى. وسى ورايدا الەۋمەتتىك كومەككە مۇقتاج از قامتىلعان وتباسىلار، جەتىم بالالار، اتا-اناسىنىڭ قامقورلىعىنسىز قالعان جەتكىنشەكتەرگە كوپ بولىپ، كومەكتەسۋ يگىلىكتى ءىس. ىندەت جاعدايىنا بايلانىستى سومكەلەر مەن وقۋعا قاجەتتى وقۋ قۇرالدارى ۇيلەرىنە جەتكىزىلەدى. يگى شارانى «زەكەت» قايىرىمدىلىق قورى جانە ەرىكتىلەر اتقارادى،-دەدى قالانىڭ باس يمامى باعداۋلەت قاجى ابدراحمانوۆ.
ايتا كەتەيىك، «مەكتەپكە جول» اكتسياسى اباي، ءال-فارابي، ەڭبەكشى جانە قاراتاۋ اۋداندىق مەشىتتەرىندە جالعاسىن تاباتىن بولادى.
قۇتتىبيكە نۇرعابىل
