اقتوبە وبلىسىنىڭ ورتالىعىنان شالعاي جاتقان ىرعىز اۋدانىنىڭ بىرنەشە اۋىلىنا گاز باردى. كوگىلدىر وتىن ەندى شەڭبەرتال، قۇرىلىس جانە اقشي اۋىلدارىنىڭ 2 200-دەن اسا تۇرعىنىنا قولجەتىمدى. 31 شاقىرىمداي گاز قۇبىرىن جۇرگىزۋگە مەملەكەت 328 ميلليوننان استام تەڭگە بولگەن دەپ حابارلايدى "ادىرنا" ۇلتتىق پورتالى.
ىرعىز اۋدانىنا جۇمىس ساپارىمەن بارعان وبلىس اكىمى وڭداسىن ورازالين اۋىل تۇرعىندارىن قۋانىشتارىمەن قۇتتىقتادى.
"ىرعىز اۋدانى گازداندىرۋ جاعىنان پروبلەمالىق اۋدانداردىڭ ءبىرى بولدى. ويتكەنى گاز تەك ەكى اۋىلدا عانا بولعان. بۇگىن مەملەكەت باسشىسىنىڭ اۋىلدىق ايماقتاردى دامىتۋ، حالىقتىڭ ءال-اۋقاتىن جاقسارتۋ جونىندەگى تاپسىرماسىنا سايكەس تاعى ءۇش اۋىل گازداندىرىلدى. بۇل باعىتتاعى جۇمىستار جالعاسۋدا، سونىمەن قاتار، سۋمەن قامتۋ سۇراقتارى دا شەشىلىپ جاتىر. وسىنىڭ ءبارى ەلىمىزدىڭ تاۋەلسىزدىگىنىڭ ارقاسىندا",- دەدى و.ورازالين.
اۋىل تۇرعىندارى كومىر ساتىپ الۋ ءۇشىن جىلىنا 200 مىڭ تەڭگەگە دەيىن جۇمساعاندارىن ايتتى.
"گاز باعاسىنىڭ ارزاندىعىمەن قوسا قانشا تۇرمىستىق پروبلەمادان ارىلامىز! قۋانىشىمىزدا شەك جوق. ۇلكەن ارمانىمىز ورىندالدى. سول ءۇشىن مەملەكەت باسشىسىنا، وبلىس اكىمىنە العىس ايتامىز",-دەدى ريزاشىلىعىن بىلدىرگەن قۇرىلىس اۋىلىنىڭ تۇرعىنى شامشات ايتپامبەتوۆ.
ايتا كەتەيىك، قازىرگى تاڭدا ىرعىز اۋدانىندا قۇتيكول اۋىلىن گازبەن قامتۋ بويىنشا قۇرىلىس-مونتاجداۋ جۇمىستارى جۇگىزىلىپ، تاعى ءۇش اۋىلعا گاز بەرۋ ءۇشىن جوبالىق-سمەتالىق قۇجاتتاما ازىرلەنىپ جاتىر. بيىل اقتوبە وبلىسىندا بارلىعى 14 ەلدى مەكەنگە گاز كىرگىزىلمەك.
كەيىن وبلىس اكىمى ىرعىز-تورعاي مەملەكەتتىك تابيعي رەزەرۆاتىنا باردى. مەكەمە ديرەكتورىنىڭ مىندەتىن اتقارۋشى مەيىرحان دۋانبەكوۆ ءوڭىر باسشىسىن قورىق جۇمىسىمەن تانىستىردى. وڭداسىن ورازالين قورىقتىڭ ءوڭىردىڭ تابيعي رەسۋرستارىن ساقتاپ، قورعاۋدا ورنى ەرەكشە ەكەنىن اتاپ ءوتتى.
جامانشىڭ بىرەگەي مەتەوريت كراتەرىن قاراپ شىققان وبلىس باسشىسى قۇزىرلى ورگاندارعا بىرەگەي گەولوگيالىق نىسانعا اپاراتىن تۋريستىك باعىتتاردى ازىرلەۋدى، سونىمەن قاتار، ونى قورعاۋ جانە قىزمەتتى دامىتۋ بويىنشا ۇسىنىستاردى قاراستىرۋعا ەنگىزۋدى تاپسىردى.
وبلىس اكىمى اۋدان اۋىل شارۋاشىلىعىنىڭ قازىرگى جاعدايىنا باسا نازار اۋداردى. وڭداسىن ورازالين جەرگىلىكتى تاۋار وندىرۋشىلەرمەن كەزدەسىپ، ولاردىڭ ءوندىرىپ جاتقان ونىمدەرىمەن تانىستى، شارۋالاردىڭ تولعاندىراتىن ماسەلەلەرىن تىڭدادى، مەملەكەتتىك قولداۋ شارالارىن ءتۇسىندىردى. وبلىس باسشىسى مال ازىعىن دايىنداۋ كولەمىن ۇلعايتۋ ءۇشىن بارلىق مۇمكىندىكتەردى پايدالانۋ كەرەكتىگىن باسا ايتتى.
"بىلتىر جەمشوپ دايىنداۋعا سۋبسيديا تولەۋ ءۇشىن جەرگىلىكتى بيۋدجەتتەن 5,5 ملرد تەڭگە بولىنسە، بيىل وسى ماقساتقا 6,8 ملرد تەڭگە ءبولۋ جوسپارلانۋدا. تولەم ەنگىزىلگەننەن كەيىن كوپتەگەن شارۋا قوجالىقتارى مالدىڭ ناقتى سانىن تىركەي باستاعان سوڭ بۇل سوما ءوستى. ماسەلەن، جىلقى باسى 124 پايىزعا ءوستى. تولەمدى شاما كەلگەنشە ەرتەرەك جاسايمىز، تامىز ايىنىڭ سوڭىندا باستايمىز دەپ جوسپارلاپ وتىرمىز.
مەملەكەت قولداۋى بار. قىستا مال قىرىلىپ قالماس ءۇشىن تۇبەگەيلى شارالاردى قابىلداۋ كەرەك", - دەدى وبلىس اكىمى.
بۇل رەتتە وڭداسىن ورازالين وسى جازدا قۇرعاقشىلىقتان ەڭ كوپ زارداپ شەككەن كورشى وبلىستارعا قولدان كەلەر كومەك كورسەتۋ قاجەتتىگىن اتاپ ءوتتى.
"ادىرنا" ۇلتتىق پورتالى.
