Aqtóbe oblysynyń ortalyǵynan shalǵaı jatqan Yrǵyz aýdanynyń birneshe aýylyna gaz bardy. Kógildir otyn endi Sheńbertal, Qurylys jáne Aqshı aýyldarynyń 2 200-den asa turǵynyna qoljetimdi. 31 shaqyrymdaı gaz qubyryn júrgizýge memleket 328 mıllıonnan astam teńge bólgen dep habarlaıdy "Adyrna" ulttyq portaly.
Yrǵyz aýdanyna jumys saparymen barǵan oblys ákimi Ońdasyn Orazalın aýyl turǵyndaryn qýanyshtarymen quttyqtady.
"Yrǵyz aýdany gazdandyrý jaǵynan problemalyq aýdandardyń biri boldy. Óıtkeni gaz tek eki aýylda ǵana bolǵan. Búgin memleket basshysynyń aýyldyq aımaqtardy damytý, halyqtyń ál-aýqatyn jaqsartý jónindegi tapsyrmasyna sáıkes taǵy úsh aýyl gazdandyryldy. Bul baǵyttaǵy jumystar jalǵasýda, sonymen qatar, sýmen qamtý suraqtary da sheshilip jatyr. Osynyń bári elimizdiń táýelsizdiginiń arqasynda",- dedi O.Orazalın.
Aýyl turǵyndary kómir satyp alý úshin jylyna 200 myń teńgege deıin jumsaǵandaryn aıtty.
"Gaz baǵasynyń arzandyǵymen qosa qansha turmystyq problemadan arylamyz! Qýanyshymyzda shek joq. Úlken armanymyz oryndaldy. Sol úshin memleket basshysyna, oblys ákimine alǵys aıtamyz",-dedi rızashylyǵyn bildirgen Qurylys aýylynyń turǵyny Shamshat Aıtpambetov.
Aıta keteıik, qazirgi tańda Yrǵyz aýdanynda Qutıkól aýylyn gazben qamtý boıynsha qurylys-montajdaý jumystary júgizilip, taǵy úsh aýylǵa gaz berý úshin jobalyq-smetalyq qujattama ázirlenip jatyr. Bıyl Aqtóbe oblysynda barlyǵy 14 eldi mekenge gaz kirgizilmek.
Keıin oblys ákimi Yrǵyz-Torǵaı memlekettik tabıǵı rezervatyna bardy. Mekeme dırektorynyń mindetin atqarýshy Meıirhan Dýanbekov óńir basshysyn qoryq jumysymen tanystyrdy. Ońdasyn Orazalın qoryqtyń óńirdiń tabıǵı resýrstaryn saqtap, qorǵaýda orny erekshe ekenin atap ótti.
Jamanshyń biregeı meteorıt kraterin qarap shyqqan oblys basshysy quzyrly organdarǵa biregeı geologııalyq nysanǵa aparatyn týrıstik baǵyttardy ázirleýdi, sonymen qatar, ony qorǵaý jáne qyzmetti damytý boıynsha usynystardy qarastyrýǵa engizýdi tapsyrdy.
Oblys ákimi aýdan aýyl sharýashylyǵynyń qazirgi jaǵdaıyna basa nazar aýdardy. Ońdasyn Orazalın jergilikti taýar óndirýshilermen kezdesip, olardyń óndirip jatqan ónimderimen tanysty, sharýalardyń tolǵandyratyn máselelerin tyńdady, memlekettik qoldaý sharalaryn túsindirdi. Oblys basshysy mal azyǵyn daıyndaý kólemin ulǵaıtý úshin barlyq múmkindikterdi paıdalaný kerektigin basa aıtty.
"Byltyr jemshóp daıyndaýǵa sýbsıdııa tóleý úshin jergilikti bıýdjetten 5,5 mlrd teńge bólinse, bıyl osy maqsatqa 6,8 mlrd teńge bólý josparlanýda. Tólem engizilgennen keıin kóptegen sharýa qojalyqtary maldyń naqty sanyn tirkeı bastaǵan soń bul soma ósti. Máselen, jylqy basy 124 paıyzǵa ósti. Tólemdi shama kelgenshe erterek jasaımyz, tamyz aıynyń sońynda bastaımyz dep josparlap otyrmyz.
Memleket qoldaýy bar. Qysta mal qyrylyp qalmas úshin túbegeıli sharalardy qabyldaý kerek", - dedi oblys ákimi.
Bul rette Ońdasyn Orazalın osy jazda qurǵaqshylyqtan eń kóp zardap shekken kórshi oblystarǵa qoldan keler kómek kórsetý qajettigin atap ótti.
"Adyrna" ulttyq portaly.
